Luka 7

[Sorodaasinxirise yogo komoyugon sahandiye]

(Mace 8.5-13 ; Yohanna 4.46-54)

Bire be Isa Alimasiiwu ga duguta sefen ŋa jama ke da, a daga . 2 Kuranlenxirise yogo wa ken debe yi, a komo yugon fin ga n liŋa a da siri. Komo yugo ke jangiranten wa xoyi a gaa kalla. 3 Kuranlenxirise ke ga da Isa fin mugu, a da Yehuudiyanun xirisu yogonu xayi katta a yi, i nan daga a muuru a maxa kuudo a nan ri i komo yugo ke sahandi. 4 I daga katta Isa yi na a ɲaaga moxosiri nan ti a da : « An nan xawa ke kuranlenxirise deemana 5 baawo a wa o xabiilan mulla, a du ya n da o taga o da. »

6 Ken ya ni, Isa do i daga doome. I ga ɲa xoyi i wa kiɲene kan ŋa tannu, kuranlenxirise ke da i menjanŋu yogonu xayi nan ti i n daga a ko a da ti : « Kamanyugo, maxa du suxula ; anken me seri dare ma xawa roono inke kan ŋa. 7 Ken ya n sigi, n ga ti in yinme ma xawa dagana an sagata. Xa, fo ko tannu, ken gaa in golliɲaŋaanan sahandini. 8 Baawo xirisu yogonu ya na inke yinme kandana, kuranlenmo yogonu wa in xa kandan noxon ŋa. N ga na ti i du baananbe be da : “ Wuyi sikki ! ”, a wa wuyini sikki ; n ga na ti baane be da : “ Kira sikki ! ”, a wa kirana sikki ; n ga na ti in komo yugon da : “ Ke dabari ! ”, a wa a dabarini. » 9 Isa ga da ku sefo mugu, a kaawa a yi. A da i falle faayi jama ke yi nan ti i da : « N wa a koono axa da ti, hari , n ma ke danqanaaxun me wari non ŋa. » 10 Kuranlenxirise ke menjanŋun saage katta a yi i kan ŋa, i da a ɲi komo yugo ke yonkin saha.

[Maxanbaanen wundiye kallen ŋa]

11 Ken falle Isa daga debe yogo yi, a toxon ga ni Neene. A xaranlenmon do jama gabe daga do a batten ŋa. 12 Ayiwa bire be a ga tinko debe ke roraqen ŋa, a do seron xosi gemu i do maxanbaane yogo furen gaa telle xaburon ŋa. Maxanbaane ke baane ya na saaxen maxa, saaxe ke xa kiina bono. Deben ŋa, seri gabe daga do saaxe ke batten ŋa xaburon ŋa. 13 Kamanyugo ga da saaxe ke wari, a hinneyen da a raga siri, a ti a da : « Maxa wu ! » 14 A daga katta fure ke yi nan kati sanbaxan ŋa, a ga ɲi sero beenu maxa, i sigi. A ti : « Maxanbaane ke, n da an ɲaamari, giri ! » 15 Fure ke xosi giri nan taaxu na a ɲa sefen ŋa. Isa da a saaga saaxen ŋa. 16 Sero ku su kanu, i gaa Alla tiigana nan ti : «  xoore yogo bange o da yere ; Alla da i seron faayi keeta na i deema ! » 17 Ke xibaare sanqi do maran su yi, do maranu beenu gaa a tinkoyen ŋa.

[Yahaya xaranlenmon xayinde katta Isa yi]

(Mace 11.2-11)

18 Yahaya xaranlenmon da ku fiinu su laxami a da [kason ŋa]. A da fillo xiri i ya, 19 na i xayi katta Kamanyugo yi, i nan daga a tirindi ti : « Yaala an ya ni ke be ga n xawa riini ba, ma o nan xawa sere tana ya dukku ? » 20 Sero ku ri katta Isa yi, i ti a da : « Annabi ya n da o xayi an ŋa ti, o nan ri an tirindi ti : “ Yaala an ya ni ke be ga n xawa riini ba, ma o nan xawa sere tana ya dukku ? ” » 21 Ken sigira yi, Isa da watunta gabe do jangiranta gabe sahandi, a da jinnanun xata bakka seri gabe yi, na finkinta gabe yaaxon wuɲi. 22 Ken falle a da Yahaya faaru ku jaabi, a ti i da : « Axa ga da ke be mugu na a wari, xa daga ken ko Yahaya da : finkinton yaaxon wa wuɲiini, muruxunton wa terene, fatanwattiburugumun wa senoono, lungunton wa mugiini, furun wa wundiini, wa koniini misikiinun da. 23 Seren ya n wulluliŋontaaxu, ke be danqanaaxu ga ma bono ti inke yi ! »

24 Faaru ku ga saage, Isa sefe Yahaya xibaaren kanma jaman da nan ti : « Axa daga manne faayi gunnen ŋa ? Fanken gaa sokkitiŋe yonkono ba ? 25 Axa daga manne xa faayi kuŋa ? Axa daga yugo yogo ya faayi, dakkabananyiraamun gaa a yi ba ? Xa ku beenu gaa dakkabananyiraamun rondini i gaa bireene neema xooren noxon ŋa, kun xa na tunkankaanun ya noxon ŋa de. 26 Axa daga manne xa faayi kuŋa ? ba ? Yabo, annabinyinmen ya ni. Xa, n na a ko axa da ti, Yahaya n xoora annabinyinme yi. 27 A ya xibaaren nan koni Safandi Sennun ŋa nan ti :

“ Terinke ! N faayi in faaren denne an kaane, a na an killen sirondi an kaane. ”

28 « Tonŋu, n na a ko axa da : yaxare su ma Yahaya me saara. Ken do i fi su, ŋa, ku beenu ga ni seron su seri maxayanqanton ŋa, kun ya n wuruginta Yahaya yi. »

(Mace 11.16-19)

29 Sere wo sere ga da Yahaya digaamun terinka, hari , i su toŋondi ti Alla teleŋonten ni, i duŋe wanqini Yahaya maxa. 30 Ganta do , Alla ga da fo be xanu i da, ikun bara ken ŋa.

31 Isa yille tini xadi : « N na ku seran danbu do ko katta me yi ? I do manne nan xawa ? 32 I na xoyi leminun ya yi i gaa taaxunu sangaberan ŋa, yogonu gaa tini kuttun da : “ O da danŋun tinmi axa yi ; axa ma rege ! O da saŋa buren kara axa yi ti suugen ŋa ; axa ma wu. ” 33 Yahaya ga ri, a ɲi suumini, a ma ɲi reesendolo minni, axa ti : “ Jinnan ya na a yi. ” 34 Nke be ga ni ŋa, n ri, n wa yigene, n wa minni, axa ti : “ Ke yugo menjanŋun ni sagalliragaanon do junuubuɲaŋaanon ya yi, yiganfaren do minnanfaren ya ni. ” 35 Xa, Alla fontuwaaxu gaa riini saare ti ke be su yi, a teleŋontaaxun bangeene ti ken ya yi. »

[Yaxarin sangaanan xibaare]

36 Farisiganke yogo da Isa xiri yigeyen ŋa i kan ŋa. A ga ro yugo ke kan ŋa, a soxonanlaxi nan yige. 37 Ayiwa, yaxarin sangaana yogo wa ken debe yi, a ga da a mugu ti Isa ri yige Farisiganke ke kan ŋa, a da woridon faranpare yogo faga te timi liŋen ŋa, a do a daga non ŋa. 38 A daga sigi Isa falle, a taanun ŋa. A wu na Isa taanun sefindi ti i yaaxanjin ŋa. Ken falle a da i yinten ɲa na taanu ku suusa. A da i sugu-sugu na te ke daari i ya. 39 Farisiganke ke ga da ken wari, a ti i noxoodu : « Ke yugo gan n ɲi yi tonŋun-tonŋun ŋa, ke yaxare be ga kati a yi kundu, a wa a tuunu : yaxarin sangaana ! »

40 Isa ti Farisiganke ke da : « Simoona, sefe wa in maxa, n gaa a mulla na a ko an da. » Farisiganke ke ti : « A ko ke, Xaranmoxo ! » 41 Isa ti : « Ke ɲa yugo yogo ya yi, a tanbon gaa sero filli yi. A kamo karagi godoxulle wa baanen ŋa, a tankarage godoxulle wa baanen xa yi. 42 A ga da a tu ti fo nta i filli su maxa i ra gaa i tugana, a yanpa i filli su tanbon ŋa. An sinmeye maxa ku sero filli, kan baane na yugo ke xanna diinanta i funen ŋa ? » 43 Simoona ti : « N sinmeye maxa, tanbu xooren gaa ke be xannen ŋa, ken ya na a xanna siri. » Isa ti a da : « An da tonŋu ko. »

44 Ken falle a jonkoyi katta yaxare ke yi, nan ti Simoona da : « An yaaxen nta ke yaxare yi ? Ayiwa, n ro an kan ŋa, an ma ji kini in ŋa in gaa in taanun wanqini, xa aken da in taanun wanqi ti i yaaxanjin ŋa, na i suusa ti i yinten ŋa. 45 An ma in kuuɲi siri, xa gelli in nan ro an kan ke do saasa naxa, aken wa a kanma na in taanun tiigi. 46 An ma te daari in yinmen ŋa, xa aken da te timi liŋen daari in taanun ŋa. 47 Ken ya saabu da in wa a koono an da ti, a ga da xanuyi xoore ke be koyi kundu, ken da a koyi ti a junuubu ke su xafari. Xa, yanpayen ga na ɲaŋi sere be maxa junuubu bucinnen ŋa, ken kama nta xanuyi gabe koyini. »

48 Ken falle Isa ti yaxare ke da : « An junuubunun xafari. » 49 Sero beenu do a ga ɲi yigene doome, kun ti i noxoodu : « Ko xa ni ke yugo yi, a gaa hari junuubunun xafarini ? » 50 Xa Isa ti yaxare ke da : « An danqanaaxun da an kisi. Daga, xeeri wa do an ŋa ! »