[Tuumayinkootan golliye]
6
Tuumayinkoota yogo,
Isa Alimasiiwu do i xaranlenmon bogu ti yillinteenu yogonu noxon ŋa.
A xaranlenmon da yillijogodo yogonu fata na i tooɲi i kittun ŋa na i kanbu.*
2 Farisiganko yogonu ɲi non ŋa,
i ti :
« Nan golli Tuumayinkootan ŋa,
a kabanten ya ni.
An xaranlenmon xa gaa a dabarini kuŋa ? »
3 Isa da i jaabi,
a ti i da :
« Koota yogo yi,
dullen ga da Tunka Daawuda do i teranlenmon raga,
a ga da fo be ɲa,
keti axa ma ken xara ?*
4 A ro allanbatikan noxon ŋa,
sadaxanbuuru be ga ɲi non ŋa,
a da a wutu na fo yiga na fo kini i teranlenmo ku xa yi,
na a ɲi xa sadaxakiɲandaanon baane ya n xawa a yigana. »*
5 Isa ti i da xadi :
« Nke be ga ni Seren Renmen ŋa,
n ya ni Tuumayinkootan kaman ŋa. »
6 Ayiwa Tuumayinkoota tana yi,
Isa ro allanxaranka yogo noxon ŋa nan xaranŋundindi.
Yugo yogo ɲi non ŋa,
a kitti tayen kaawanten ya ni.
7 Sariyanxaranmoxonun do Farisigankon wa Isa koroosini na a faayi selli a gaa yugo ke sahandini Tuumayinkootan ŋa,
ma i na jalagindimaana kita a yi.
8 Xa Isa wa i ŋanniyen tu.
A ti yugu kittikaawante ke da :
« Giri,
an nan sigi seron naxa !
» Yugo ke giri nan sigi.
9 Ken falle,
Isa ti :
« N wa axa tirindini :
yaala o sariyan duŋe ti fisiriɲanŋen ya yi Tuumayinkootan ŋa ba,
ma fiburiɲanŋe ?
Na yonkin kisi ba,
walla na a bonondi ? »
10 A da i su faayi baane baane,
ken falle a ti yugo ke da :
« An kitten fuutu !
» A da i kitten fuutu,
kitten saha.
11 Sariyanxaranmoxonu ku do Farisiganko ku ga da ken wari,
i butu.
I da me wari nan masala,
i ga n xawa fo be ɲaana Isa yi.
[Isa faarun tanmi do fillo sugandiye]
12 Koota yogo yi,
Isa sege giden kanma na Alla batu,
a da wuron muuman ɲa a gaa Alla batta.
13 Yillen ga kare,
a da i xaranlenmon xiri na sero tanmi do fillo sugandi bakka i ya,
na kun ɲa faaru yi.
14 Kun sero toxonun ya faayi ku :
Simoona,
a da ken xiri Simoona Piyeeri,
a xoxone Handere,
Yaaxuba,
Yohanna,
Filipu,
Baritoloome,
15 Mace,
Tooma,
Haalife renme Yaaxuba,
Simoona,
i gaa a xilli « Faabankan maxawasandaana »,
16 Yaaxuba renme Yehuuda,
a do Yehuuda Hisikarooti,
a ya ga lagari Isa janbana.
[Jaman xaranŋunde]
17 I do Isa yanqa doome bakka giden ŋa.
I sigi beran xulle yogo yi a do i xaranlenmon jama gabe,
do jama xoore tana nan giri Yehuuda maran su yi,
do Yerusalaamu do geeji xannen maran debu beenu ga ni Sooro do Sidooni yi.
18 I ri Isa digaamun terinka,
i wattun xa wa sahana.
Jinnan ga ɲi sero beenu yi,
kun saha.
19 Jama ke su ɲi a mulla nan kati a yi,
baawo senbe yogo wa gilli a yi,
a gaa seren su sahandini.
20 Isa da i yaaxon wutu na i xaranlenmon faayi,
a ti :
« Wulluliŋontaaxun wa axa da,
axakun beenu ga ni misikiinun ŋa,
baawo Allantunkaaxun na axa ya da !
21 Wulluliŋontaaxun wa axa da,
dullen gaa axakun beenu yi saasa,
baawo axa wa riini baabuwase !
Wulluliŋontaaxun wa axa da,
axakun beenu gaa wuunu saasa,
baawo axa wa riini soyi !
22 Wulluliŋontaaxun wa axa da,
seron ga na axa xoni,
nan bara axa yi,
na axa ka,
na axa toxon bonondi do Seren Renmen batten ŋa.
23 Ken ga na ɲaŋi axa yi,
xa sewo axa nan bonte ɲaxaliyen maxa,
baawo axa tugaadin xooren ya ni Alla noqu.
I xooxonu xa da annabinyinmun tooro kundu ya yi.
24 Xa bone wa axa da,
axakun beenu ga ni bannanun ŋa,
baawo axa da axa xeerin kita nan duguta !
25 Bone wa axa da,
naxafan gaa axakun beenu maxa saasa,
a gabe,
baawo axa wa riini dullu.
Bone wa axa da,
axakun beenu gaa soyini saasa,
baawo axa wa riini suno nan wu !
26 Bone wa axa da,
seron su gaa axakun beenu tiigana saasa,
baawo i xooxonu ɲi duxayifaarun ya tiigana.
»
27 Isa ti :
« Axakun beenu gaa in terinkana,
n wa a koono axa da :
xa da axa xonnon xanu ;
xa nan siro katta ku beenu ga bara axa yi.
28 Sero beenu gaa axa langana,
xa duwa i da.
Sero beenu gaa axa toorono,
xa da Alla ɲaaga i da.
29 Sere be ga na fentan kara an kankanbaaran ŋa,
an na an kankanbaara baanen xa koyi a kaman ŋa.
Sere be ga na an doroki xooren boosi an ŋa,
an na an turukin xa toxo a kaman maxa.
30 Sere wo sere ga na an ɲaaga,
a ku.
Sere wo sere ga na an xallen wutu,
maxa a tirindi a kaman ŋa.
31 « An gaa a mulla seren ya na fo wo fo ɲa an da,
an xa na ken me ɲa seron da.
32 Selli axa gaa sero ya xanna tannu,
sero beenu gaa axa xanna,
manne taqe tana na axa da ?
Hari junuubuɲaŋaanon xa wa sero xanna,
sero beenu gaa i xanna !
33 Selli axa ga nta fo sire ɲaana sere da ma sere be ya ga na fo siren ɲa axa da,
manne taqe tana na axa da ?
Hari junuubuɲaŋaanon na ken me ya ɲaana !
34 « Axa haqilen gaa a yi ti sero beenu wa axa saagana,
selli axa gaa kun baane ya sumundini,
manne taqe tana na axa da ?
Junuubuɲaŋaanon xa wa me sumundini i gaa me saagana !
35 Ganta,
axakun ŋa,
xa da axa xonnon xanu,
xa siro i da ;
xa da i sumundi axa na axa haqilen bogu tanbo ke xa kanma.
Axa wa taqi dare kitana.
Axa wa ɲaana Alla wuruginten renmun ŋa,
baawo aken ya n sirono fisirinwallun do sere burun da.
36 « Xa ɲa hinnaano yi,
xo axa Faaba Alla ga ni hinnaanan ŋa moxo be.
37 « Xa maxa sere raga ti i gollen ŋa,
kuudo Alla nan maxa axa raga.
Xa maxa sere jalagi ;
Alla xa n maxa axa jalagi.
Xa yanpa seron maxa ;
Alla xa na yanpa axa maxa.
38 Xa da seron ku ;
Alla xa na axa ku.
A na xollen faga na a tiigi ma a ga joxi na a yilla axa juntan noxon ŋa.
Axa gaa xensendini ti muude ke be,
a na axa xensene ti ken muude ya yi. »
39 Isa yille ke taali xa koono i da,
a ti :
« Yaala finkinte ra wa i me finkinte geesunu ba ?
Ken ŋa i filli su nta wareene gunban ŋa ba ?
40 Xaranlenma su nta i xaranmoxo kanma,
xa xaranlenma su ga na xara ti i moxon ŋa yinme ya,
a wa ɲaana xoyi i xaranmoxo.
41 Sokke ke be gaa an maarenmen yaaxen ŋa,
manne an yaaxen gaa ken ya yi nan mungu do guruda ke be gaa sikki anken yinme yaaxen ŋa ?
42 Walla xa,
an katta tini an maarenmen da kan moxo :
“ N maarenme,
N dugu de !
Sokken faayi an yaaxen ŋa,
n na a bogu a yi.
” Ke guruda be gaa sikki anken yinme yaaxe ke yi xa ?
He !
Anken munaafaxi ke !
Guruda ke be gaa an yinme yaaxen ŋa,
an nta ken bakka a yi fina,
ken bire,
an na katu an maarenmen yaaxen sokken laabana na a bogu a yi ?
43 « Ken ya ni,
yitti sire nta ren maɲante renmunu ;
yitti jangiranten xa nta ren sire renmunu.
44 Yitte su tuyini ti i renmen ya yi :
tururenme nta kotiini bakka saasitinŋe yi ;
mango xa nta kotiini bakka saasitinŋe yi.
45 « Seri siren golli xalasinten gilli a sondon xalasinten ya yi ;
seri buren xa golli buren gilli a sondon buren ya yi.
Sondomen fakkan ga ni fo be yi,
ken ya n bakka seren raqen ŋa.
46 « Manne ni axa gaa in xilli,
“ Kamanyugo,
kamanyugo ”,
n gaa axa ɲaamarini fo be yi,
axa ga nta ken dabarini ?
47 Sere be gaa riini katta in ŋa,
a gaa in digaamun terinkana nan golli ti i ya,
n wa a koono axa da ken kaman na xo
48 sere be gaa i xuben tagana,
a ga da kunmen jaaba ma a gaa kiɲene gidinfeenan ŋa,
na xuben taaxundi a kanma.
Kan xoore ri,
ŋaamen ro xube ke yi,
xa a ma katu fo wo fo ɲaana a yi,
baawo xube ke tage nan siro ya.
49 Xa sere be gaa in digaamun terinkana,
a ga nta gollini ti i ya,
ken na xo sere be ga da xuben taga ɲiiɲa furen ya kanma.
Ŋaamen ga na ro xube ke yi,
a na xosi a kara na a su xenundi. »