[Kiiten xibaare]
7
« Xa maxa sere raga ti i gollen ŋa,
kuudo Alla nan maxa axa raga,
2 baawo axa gaa seron ragana moxo be,
Alla xa na axa ragana ken moxo ya yi ;
axa gaa xensendini ti muude ke be,
a na axa xensene ti ken muude ya yi.
3 Sokke ke be gaa an maarenmen yaaxen ŋa,
manni an yaaxen gaa ken ya yi nan mungu do guruda ke be gaa sikki anken yinme yaaxen ŋa ?
4 Walla xa,
an katta tini an maarenmen da kan moxo :
“ N dugu de !
Sokken faayi an yaaxen ŋa,
n na a bogu a yi.
” Ke guruda be gaa sikki anken yinme yaaxe ke yi xa ?
5 He !
Anken munaafaxi ke !
Guruda ke be gaa an yinme yaaxen ŋa,
an nta ken bakka a yi fina,
ken bire,
an na katu an maarenmen yaaxen sokken laabana na a bogu a yi.
6 « Xa maxa fo senne kini wullun ŋa,
i gaa yillene katta axa yi na axa xiɲi.
Xa maxa axa xaɲaxullu fitta katta faringijun ŋa,
i gaa danpi-danpini i ya.
[Haaju muuriyen xibaare]
7 « Xa ɲaage,
Alla na axa ku.
Xa muurundi,
axa na fo kita.
Xa da fonlaqen konko,
a na wuɲi axa kaane.
8 Baawo sere wo sere ga na ɲaage,
Alla wa an kuunu ;
sere wo sere ga na muurundi,
an wa kiteene ;
sere wo sere ga na konkondi,
raqen wa wuɲiini.
9 Ko baane n kafiini axa yi,
an renmen ga na an ɲaaga ti :
“ Baaba !
N ku buuru !
” an gaa gidinxunturan ya roono a kitten ŋa,
10 ma a ga na an ɲaaga ɲexe yi,
an gaa samaqen ya kinni a yi ?
11 Axa do axa kame seribonontaaxu su,
axa ra wa fo siren kinni axa renmun ŋa,
billati Faaba kallanken ken xa.
Sero beenu ga na a ɲaaga fo sire,
a wa i kuunu nan xoto axa kuyindimoxon ŋa.
[Sariyan fo xooren xibaare]
12 « An gaa a mulla seren ya na fo wo fo ɲa an da,
an yinme xa na ken me ɲa seron da.
Annabi Muusa Sariyan do annabinyinmun xaranŋundindun ni ke ya yi.*
[Fonlaqun filli xibaare]
13 « Fonlaqe ke be roxen ga ni,
xa ro ti ken ya yi de !
Baawo sankuntaaxun fonlaqen xooren ya ni,
a bakken nan newu,
ken ya saabu da,
seren gabe gaa bakka ti a yi.
14 Bireyi duumante ken xa fonlaqen roxen ya ni buru,
a bakken nan xoto,
ken ya saabu da,
seri lamaanu ya gaa a kitta.
[Duxayifaarun xibaare]
15 « Xa da axa du koroosi duxayifaarun ŋa.
I riini katta axa yi xoyi jaxo ya,
na a ɲi xa,
fonɲaatun ya ni.
16 Axa na i tuunu ti i ɲangollun ya yi xoyi axa gaa yitten tuunu ti i renmen ŋa moxo be.
Xoyi sere ra wa reeserenme fatana bakka saasitinŋen ŋa ba ?
Ma an ra wa tururenmen fatana bakka turunfan ŋa ba ?
17 Kundun ya ni :
yitte su siren ya ga ni,
a na ren siren ya renmunu ;
yitte xa su jangiranten ya ga ni,
a xa na ren maɲanten ya renmunu.
18 Yitti sire ra nta ren maɲante renmunu ;
yitti jangirante xa ra nta ren sire renmunu.
19 Yitte xa su ga nta ren sire renmunu,
a kutiini nan fitte yinben ya yi.
20 Ken moxo ya ni,
axa gaa duxayifaarun xa tuunu ti i ɲangollun ŋa.
[Xaranlen soobon xibaare]
21 « Nan ti in da :
“ Kamanyugo,
kamanyugo,
” ken baane ra nta sere rondini Allantunkaaxun noxon ŋa de,
an ga ma in Faaba kallanken xa sagon ya dabari ga fe.
22 Kiiten koota ya ni,
seri gabe gaa a tini in da :
“ Kamanyugo,
kamanyugo !
O ma xayifaaraaxun dabari ti anken ya toxon ŋa gani ?
Keti o ma jinnanun xata ti an ya toxon ŋa ?
O ma kaawafin gaben dabari ti anken ya toxon ŋa ? ”
23 Ken koota,
n na ti i da :
“ N ma axa wari abada.
Xa laato bakka in ŋa,
ku golliburiɲaŋaano ku ! ”*
[Kaanun filli xibaare]
24 « Ken kuŋa,
sere wo sere ga da in ku sefo mugu,
an ga golli ti i ya,
ken kaman na xoyi haqilante be ga da i xuben taga gidinfeenan ya kanma.
25 Hari kanmen do fanka xooren ya ga na giri,
xoolun ga ŋaami,
ken xube nta xenne,
baawo a wure xoten ya ni.
26 Ayiwa,
sere xa be gaa in digaamun terinkana,
an ga ma golli ti i ya,
ken kaman xa na xoyi haqilanloxe be ga da i xuben taga seyintuwaalen ya kanma.
27 Kanmen do fanka xooren ga na giri,
xoolun ga ŋaami,
a muuman su ya n xenne,
bonen raqen na tinme. »
[Isa xaranŋundinde ti Alla ɲaamarinden ŋa]