Luka 13

[Seron jikkunun faraaxiye walla xa i na kara]

I wa ken ŋa tan, sero yogonu ri katta Isa Alimasiiwu yi na maranyinmanke ɲangollen laxami a da, Pilaati ga da seron wara Galiilenko yogonu yi i na i kari na i toxo sadaxindinoqun ŋa. 2 Isa ti sero ku da : « Axa sinmeyen ni ya ba nan ti Galiilenko ku beenu i ga da i kari kundu, ti i ya ni junuubuɲaŋaana xooron ŋa diinanta Galiilenkon kuttun ŋa ba ? 3 Aayi, ken fe, xa, axa ga ma axa jikkunun faraaxu nan saage katta Alla yi, axa su wa kalla xoyi i moxo. 4 Ku sero tanmi do segu be xa, konpo gillen ga xenu i kanma na i kari Siloomu kundan ŋa, axa da a sinma ti kun sero xa ya maɲanton ni diinanta kuttun su yi ba ? 5 Aayi, ken fe, xa, axa ga ma axa jikkunun faraaxu nan saage katta Alla yi, axa su wa kalla xoyi i moxo. »

6 Ken falle Isa da ke ko, a ti : « Turutinŋe yogo lorinten ɲi yugo yogo noxon ŋa. Yugo ke ri ti i wa turo ke fatana, xa a ma renme ɲi a yi. 7 A ti i reesenten golliɲaŋaanan da : “ Ayiwa, a siina sikkan ya ni ke yi in gaa riini ti in wa ke turo fatana, n ga nta renme ɲiini a yi. A kutu bakka yere ! A sikki manne yi beran ŋa ? ” 8 Golliɲaŋaana ke ti a da : “ N yinmanke, a wara a na ke siine bira ; n na a kaaron soxo na jabanden ro a yi. 9 A me wa du, waaga a na renmu. A ga ma renmu xa, a na kuti. ” »

[Yaxare yogo sahandiye Tuumayinkootan ŋa]

10  yogo yi, Isa gaa xaranŋundindini yogo noxon ŋa, 11 yaxare yogo masahanten ɲi non ŋa, jinnan gaa a yi : a ga da a xoodon gungurundi, siino tanmi do segu, a ra ma ɲi sikki nan teleŋo. 12 Isa ga da yaxare ke wari, a da a xiri nan ti a da : « Yaxare ke, an do an watten fate. » 13 Isa da i kittun saxu yaxare ke kanma, ken sigira yi, yaxaren sigi nan teleŋo, na a ɲa allatiigeyen ŋa. 14 Xa, ken da allanxarankan yinmanken tooro moxoburu, ti baawo Isa jaarandi Tuumayinkootan ŋa. Yinmanke ke sefe jaman da, a ti : « Bito tunmi ya na o maxa, o ga n xawa i gollini, ken kuŋa, xa ri jaare kun bito ya noxon ŋa, xa Tuumayinkootan ken fe ! » 15 Kamanyugo da a jaabi nan ti : « Ku munaafaxinu ku ! Tuumayinkootan ŋa, axa du baananbe nta i gunbo, ma i faren janbana nan daga a minindi ya ba ? 16 Ke yaxare ken xa, Ibirahiima bonsonŋen ya ni, siino tanmi do segu kacun gaa a yi. Yaala a ma xawa kacu ku nan bogu a yi Tuumayinkootan ŋa ya ba ? » 17 Isa dan ke jaabu yaagun da a xonnon su kari, xa jama ke su ya ɲaxalinten ni ti Isa ɲangolli sirun ŋa.

[Allantunkaaxun tuyiye]

(Mace 13.31-33 ; Maarika 4.30-32)

18 Isa ti : «  do manne nan baana ? N katta a do manne katta me yi ? 19 Allantunkaaxun na xo dindifunsen ya yi, yugo yogo ga da a tifi i naaxongallen ŋa : a bogu nan ɲa yitti xoore yi, ma yeliŋun na i sonkon dabari a kingun ŋa. »

20 Isa yille tini xadi : « N katta Allantunkaaxun do manne katta me yi ? 21 A na xo ya yi, yaxaren ga na a fonne ro farijura xootinten gaben ŋa, a su gaa buukunu. »

[Allantunkaaxun royen tirindinde]

(Mace 7.13-14 ; 21-23)

22 Isa dagante Yerusalaamu yi, a xaranŋundindi debi xooron do debi lenmun ŋa. 23 Yogo da a tirindi nan ti : « Xaranmoxo, xoyi seri lamaanu ya n kisiini ba ? » Isa ti i da : 24 « Fonlaqe ke be roxen ga ni, xa duruxoto axa nan ro ti ken ya yi de ! Ganta, n wa a koono axa da nan ti, seri gabe ya na royen muurunu, xa i nta a kitana.

25 « Kaagumen ga na i ganlaqen texe, axa ga toxo sellan ŋa, axa na xenu baafen konkono nan ti : “ Xirise, fonlaqen wuɲi o kaane ! ” A wa tini axa da : “ N nta axa girinoqun tu ! ” 26 Ken falle, axa na ti a da : “ He ! O do an yige doome ; an xaranŋundindi do o deben beddun ŋa ! ” 27 A na yille tini axa da xadi : “ N nta axa giri noqu tu ! Xa laato bakka in ŋa, ku golliburiɲaŋaano ku ! ” 28 Non ya ni, axa na wu ma axa ga giige, axa yaaxen gaa Ibirahiima do Isiyaaxa do Yaaxuba do su yi Allantunkaaxun noxon ŋa, xa axakun sedinton wa sellan ŋa. 29 Kootan wa riini, jamon gaa gilli kinbakkan do kinxenna, saahelin do banboxu, nan yige doome Allantunkaaxun noxon ŋa. 30 Ken kuŋa, sero beenu ga ni fallankon ŋa, i ɲaana kaanankon ŋa ke moxo ya yi ; kaanankon xa na ɲa fallanko yi. »

[Isa digaamuye Yerusalaamu fin kanma]

31 Ken sigira yi, yogonu tinko Isa yi nan ti a da : « Giri yere, an nan daga noqu tana yi, baawo wa a mulla na an kari. » 32 Isa ti i da : « Xa daga a ko serankanjaane ke da nan ti : lenki do xunbane baane ya ni, n gaa jinnanun xatana bakka seron ŋa, na watunton sahandi, xunbanefalla in gollen na tinme. 33 Xa ganta, n jokkini do in killen ŋa ya lenki, do xunbane, do xunbanefalla, baawo a ra nta ɲaana i gaa karini noqu tana yi, a ga ma ɲa Yerusalaamu ya yi falle.

(Mace 23.37-39)

34 « Yerusalaamu, ee, Yerusalaamu ! An wa karini ; Alla ga da sero beenu xayi katta an ŋa, an wa i xa gididunwalla ! Taanu manime ni in ga da a xanu na an renmun kafu me yi xoyi selinjaaxen gaa i renmun roono i kanpon wure moxo be, xa an bara ! 35 Saasa ke, Alla faayi ga da an batikan toxo an maxa. Ayiwa, n na a ko an da xa nan ti : an ntaxa in walla keeta ma koota be an ga n ti :

“ Tunka Duumanten gan na bareke ro ke be gaa riini ti a toxon ŋa. ” »