[Isa xaranŋunde Yerusalaamu yi]
(21.1-25.46)
[Isa Alimasiiwu roye Yerusalaamu yi]
21
Isa Alimasiiwu do i xaranlenmon tinko Yerusalaamu yi.
I kiɲe i ga gide ke be xilli « Jayituunangide »,
Beeti-fage deben ŋa.
Isa da sero filli xayi bakka i xaranlenmon ŋa,
2 nan ti i da :
« Xa daga debe ke be gaa taŋeene o yi.
Axa wa riini fariyaxare do i renmen ŋa siitini,
axa na i wasa,
axa do i na ri.
3 Sere be ga na axa tirindi,
axa na ti :
“ Kamanen ya haaju na i ya.
” Ken ŋa,
ken kaman wa a walla axa maxa. »
4 Ke ɲa ya kuudo annabinyinmen ga da sefe be ko na tinme,
a ga ti Alla ti :
5 « Xa da a ko Siwoona debidunkon¤ da ti :
“ A faayi !
Axa tunkanyugon wa katta axa yi,
a da dumaxayanqa nan setu fari yaxaren ŋa,
fari yaxaren do i renme,
farinlen yeere.
” »*
6 Xaranlenmon daga xoyi Isa ga da a ko i da moxo be yi.
7 I do faren do i renmen ri.
I da i yiraamun ɲa japu yi ;
Isa setu a yi.
8 Jama xoore bogu :
yogonu wa i yiraamun bagandini na i boyi ;
yogonu wa yittiderun kuttu na i saxundi-saxundi do killen ŋa.*
9 Jama be gaa do a yi,
i wa luukene kaane do falle,
i gaa tini :
« Hosanna !
Tunka Daawuda renme,
wurugintaaxun wa an da !
Tunka Duumanten gan na bareke ro ke be gaa riini ti a toxon ŋa.*
Hosanna !
Wurugintaaxun wa Alla da kanmun di ! »
10 Isa ga ro Yerusalaamu yi baane tan,
deben xooti.
Haadamaaxun toxo me tirindini :
« Ko xa ni ke yi ? »
11 Jaman ti :
« Annabi Isa ya ni nan giri Nasaara,
Galiile maran ŋa. »
[Jaagundaanon xataye]
12 Ken falle,
Isa ro Allanbatikaxooren tagayen noxon ŋa,
na gaagaanon do xobaanon su xata,
na sadaxanboorigaagaanon taaxaadun do wocindaanon taabalinun su xenundi.
13 A ti i da :
« A wa Safandi Sennun ŋa,
nan ti :
“ N kan wa riini xiri allanbatika.
”
« Xa axakun da a ɲa fayaanon da muxura yi. »*
14 Finkinton do jogooninton ri katta Isa yi Allanbatikaxooren tagayen noxon ŋa,
a da i jaara.
15 Sadaxakiɲandaananyinmankon do sariyanxaranmoxonun ga da a kaawafi ɲaŋunton wari,
ken do leminun gaa xaarunu ti a toxon ŋa Allanbatikaxooren ŋa,
i gaa tini :
« Wurugintaaxun wa a da,
Tunka Daawuda renme »,
i butu,
16 nan ti a da :
« An taron wa leminun ŋa i gaa ke be koono ba ?
» Isa da i jaabi nan ti :
« N taron wa a yi ke.
Axa xa ma ke soora xara Safandi Sennun ŋa ya ba,
noqu be a ga ti :
“ An da tiigandi moxosiren ro leminun do fatanton raqun ŋa ” ? »*
17 Ken falle,
Isa da i toxo ken debe nan daga wuyi Beyitaani yi.
[Turutin boroken xibaare]
18 Isa furute gilli,
a gaa kiɲene Yerusalaamu yi,
dullen wa a yi.
19 A da turutinŋe yogo wari killinxannen ŋa,
nan sele katta a yi.
Xa,
a ma renme su ɲi turo ke yi deren ya ga fe.
A jaabi nan ti turutinŋe ke da :
« A ɲame !
Anke ntaxa saarene hari abada.
» Ken sigira su,
turutinŋe ke kaawa.
20 Xaranlenmon ga da ken wari,
i kaawafi,
i ti :
« Duudo,
ke turutinŋe kaawa kan moxo ? »
21 Isa da i jaabi nan ti :
« Tonŋu,
n na a ko axa da :
axa ga na toŋondi koota su,
sikka ga nta axa sondomun ŋa su,
axa ra wa turo ke kaawandini xoyi kundu.
Axa nta xenpene ken baane yi !
Axa ga na ti hari ke gide ya da :
“ Giri,
an nan daga fitte geeji ”,
a telle ya.
22 Axa ga na saxu Alla yi,
axa ga da a ɲaaga ti fo wo fo ya yi,
axa wa ken kitta. »
[Isa fankan girira]
23 Isa ga saage katta Allanbatikaxooren ŋa,
a gaa xaranŋundindini,
sadaxakiɲandaananyinmankon do jaman xirisun ri sigi a yi nan ti a da :
« An gaa ku gollu be dabarini,
an na i dabarini ti kan ɲaamariye yi ?
Ko n da ken ɲaamariye kini an ŋa ? »
24 Isa da i jaabi nan ti :
« Nke xa na axa tirindini baane ya yi tannu.
Axa ga na in jaabi,
n xa gaa ku gollu dabarini ti ɲaamariye be yi,
n na a ko axa da.
25 Yahaya wanqinde ke giri ko yi :
Alla ya ni,
ma seron ya ni ?
»
I yinmenu duurun da me tirindi,
a falle i ti :
« O ga na ti a giri Alla ya yi su,
a tini ya : “ Manne saabu da axa ga ma toŋondi ti a yi ? ”*
26 Xa,
o ga na ti a giri seron xa ya yi,
o wa kanna jaman ŋa,
baawo a su wa a tu ti Yahaya ni annabinyinmen ya yi. »
27 Ken falle,
i da Isa jaabi nan ti :
« O nta a tu.
» Isa xa ti i da :
« Ayiwa in xa gaa ku gollu dabarini ti ɲaamariye be,
n nta a koono axa da. »
[Leminun filli masayila]
28 Isa ti i da :
« Axa sinmayen ni manne yi ke xiisa kanma ?
Ren yugu filli ya ni yugo yogo maxa.
A ri katta fo fanan ŋa nan ti a da :
“ N renme,
daga reesenten ŋa lenki. ”
29 Renmen ti a da :
“ N nta telle.
” Xa ken falle,
a nimisi,
a daga.
30 Yugo ke daga katta i ren fillandi xa yi.
A ti a xa nan daga ten ŋa.
Ken ti a da :
“ N da a mugu,
n wa telle.
” Xa,
a maxa daga.
31 Ku sero filli,
kan baane n da i faaba sefen mugu ?
» I ti :
« Fo fana ke ya ni.
» Isa jaabi nan ti i da kuŋa :
« Tonŋu,
n na a ko axa da :
sagalliragaanon do yaxarin sangaanon wa roono axa kaane Allantunkaaxun noxon ŋa.
32 Annabi Yahaya ri katta axa yi kuudo na killi teleŋonten ya koyi axa yi,
xa,
axa ma saxu a yi.
Sagalliragaanon do yaxarin sangaano kun do i moxo su,
i saxu a yi.
Hari axa ga da ken wari,
axa ma katu axa sondomun yillandini nan saxu a yi.
[Golliɲaŋaana burun masayila]
33 « *Xa da ke masayila xa terinka :
teegume yogo ya ni,
a ga da reesetinŋun lori i ten ŋa,
na a sangallu,
na reesebollinoqun dabari,
na tangandikora gille sigindi.
Ken falle,
a da golliɲaŋaanon yogo kafu du yi na te ke toxo i maxa nan daga tere.
34 Reesen ga moyi bire be,
a da i komon xayi nan ti i na i taqi reesen kini i ya.
35 Komon ga kiɲe i ya,
golliɲaŋaano ku da baanen raga na a katu moxoburu ;
i da baanen kari,
na baanen gididunwara.
36 Teegumen yille komo tananu xayini,
kun ga n gaba fanon ŋa.
Golliɲaŋaanon da i xa ɲa kundun ya yi.
37 Fin lagarun ŋa,
a da i ren yugon deni nan ti i noxoodu :
“ I na danka toxo in renmen ken ken ŋa. ”
38 Xa golliɲaŋaanon ga da a wari,
i ti me da :
“ Ke ya n riini a xayen wutu.
Xa ri o na a kari,
o na a xayen wutu. ”
39 I da a xa raga na a bagandi reesenten ŋa,
na a kari. »
40 Isa ti :
« Ayiwa,
reesenteegumen ga na ri,
a na ku golliɲaŋaano ɲaana kan moxo ? »
41 I ti a da :
« A na ku seri buru karini kara moxo bure ya yi,
a na sere tananu kafu du yi ten ŋa,
ku beenu ra gaa reeserenmun kiɲana a yi i biren ŋa. »
42 Isa jaabi nan ti i da :
« Axa ma a xara Jabuuri noxon ŋa nan ti :
“ Tagandaanon ga bara tuufa ke be yi,
ken ya n xosi ɲa gonbontuufan ŋa.
Ken ni Tunka Duumanten gollen ya yi,
kaawafi sa ! ”*
43 « Ken ya saabu da,
n na a ko axa danŋa nan ti :
Allantunkaaxun wa riini boosi axa yi,
nan kini xabiila tana yi,
kun gaa a nafan bagandini.
44 {Sere wo sere ga na xenu ke tuufa kanma,
a kaman xottun su wa xoseene ;
ke tuufa xa ga na xenu sere wo sere kanma,
a kaman wa lopiini.
»}¤