[Isa koyi lagare : a rageye, a kiitiyen do a gengende do sallibinsollen ŋa]
(11.1-15.47)
[Isa Alimasiiwu kiɲeye Yerusalaamu yi]
11
Isa Alimasiiwu do i xaranlenmon tinko Yerusalaamu yi.
I ga kiɲe Beeti-fage do Beyitaani kaaran ŋa katta gide be i gaa a xilli « Jayituunangide »,
a da i xaranlenmon sero filli xayi.
2 A ti i da :
« Xa daga debe ke be gaa taŋeene o yi.
Axa wa farinlenme yogo siitinten ɲiini non ŋa ;
sere ma setu a yi abada,
axa na a wasa do a nan ri.
3 Sere be ga na ti :
“ Axa na ke ɲaana manne yi ?
” Axa na ti :
“ Kamanen ya haaju na a yi,
o do a wa riini saasa.
” »
4 I daga kuŋa na farinlenmen siitinten ɲi killinxannen ŋa ganlaqe yogo kaaran ŋa,
i da a wasa.
5 Sero beenu gaa non ŋa i ti i da :
« Mannen xenu axa yi axa gaa ke farinlenme wasana ? »
6 I xa da i jaabi xoyi Isa ga da a ko i danŋa moxo be,
sere maxa fo tana ko.
7 I do farinlenme ke ri na i yiraamun ɲa japu yi,
Isa setu a yi.
8 Seri gabe da i yiraamun boyi a kaane killen ŋa.
Yogonu xa da yittiderun kutu gunnen ŋa na i saxundi-saxundi.
9 Jama be gaa do a yi,
i wa luukene kaane do falle nan ti :
« Hosanna !
Tiigeyen wa Alla da !
Tunka Duumanten gan na bareke ro ke be gaa riini ti a toxon ŋa.*
10 Alla gan na bareke ro o faaba Daawuda tunkaaxu ke be gaa riini kundu !
Hosanna !
Wurugintaaxun wa Alla da kanmun di ! »
11 A ga ro Yerusalaamu yi noqu be,
a daga Allanbatikaxooren noxon ŋa.
Fo wo fo gaa ɲaana,
a yaaxen wa a su yi,
xa a do i xaranlenmon tanmi do fillon daga Beyitaani baawo wuron ro.
[Turutinŋen langande]
12 Ken yillakara,
i gaa bakka Beyitaani yi,
dullen wa a yi.
13 A yaaxen gaa turutin nirinte yogo yi laatoyen ŋa,
a daga a faayi ma i na ren lamaanu ɲi a yi.
A ga tinko a yi,
a yaaxe nta fo wo fo yi deren ga fe,
baawo renme bire fe.
14 Isa ti turutinŋe ke da :
« Sere gan nta an renme yiga hari abada !
» A xaranlenmon da ken mugu.
[Gaagaanon xateye bakka Allanbatikaxooren ŋa]
15 Ken falle,
i kiɲe Yerusalaamu yi.
Isa ga ro Allanbatikaxooren tagayen noxon ŋa,
a xenu gaagaanon do xobaanon xatanden ŋa bakka,
na wocindaanon taabalinun xenundi,
na sadaxanboorigaagaanon taaxaadun bifindi.
16 Sere su do fo ntaxa bakka ti Allanbatikaxooren noxon ŋa xoyi saxan moxo.
17 Ken falle,
a taŋe a su yi na i xaranŋunden jopa nan ti :
« A safanten nta Safandi Sennun noxon ŋa ya ba nan ti :
“ N ka ke riini xiri allanbatika xabiilan su ya danŋa ” ?
« Xa,
axakun da a ɲa fayaanon da muxura yi. »*
18 Sadaxakiɲandaananyinmankon do sariyanxaranmoxonun da ken mugu,
i da a muuru i ra gaa a faatindini moxo be keeta.
Xa,
jama ke su kaawanten gaa a xaranŋunden ŋa moxo be,
ken da i kanundi.
19 Wuron ga ro,
Isa do i xaranlenmon bogu deben ŋa.
[Turutinŋen kaawayen fasare]
20 Ken yillakara i danginto,
i da a ɲi turon kaawa ma ɲiimu.
21 Piyeeri haqilen yanqa Isa sefen ŋa,
a ti :
« Xaranmoxo,
an da a wari,
an ga da turon langa,
a kaawa ko ! »
22 Isa da i jaabi nan ti :
« Xa saxu Alla yi.
23 Tonŋu,
n na a ko axa da,
sere wo sere ga na ti ke gide da :
“ Giri yere,
an nan daga fitte geeji ”,
sikka ga nta a kaman sondomen ŋa su,
a ga saxu a yi nan ti i ga da ke be ko a ɲaana ya,
ken ɲaana a danŋa ya.
24 Ken ya ni in gaa tini axa danŋa,
axa ga na Alla ɲaaga ti fo wo fo yi,
axa nan saxu a yi nan ti axa da ken kita,
a ɲaana axa danŋa ya xa mene.
25 Axa ga na taŋe Alla yi ti axa wa a ɲaagana,
selli fo gaa axa sondomun ŋa katta sere yi,
xa yanpa ken kaman maxa,
kuudo axa Faaba kallanken xa na yanpa axa junuubunun ŋa. »
26 {Axa ga ma yanpa seron maxa,
axa Faaba kallanken xa nta yanpana axa junuubunun ŋa de.}¤
[Isa fanka]
27 Isa do i xaranlenmon saage katta Yerusalaamu yi xadi.
Isa gaa dagananriini Allanbatikaxooren tagayen noxon ŋa,
sadaxakiɲandaananyinmanko,
sariyanxaranmoxonu,
kafiini xirisun ŋa,
i tinko a yi
28 nan ti a da :
« An gaa ku gollu be dabarini,
an na i dabarini ti kan ɲaamariye yi ?
Ko n da ken ɲaamariye kini an ŋa ti an na i dabari ? »
29 Isa ti i da :
« N na axa tirindini baane ya yi tannu,
axa ga na in jaabi,
n xa gaa ku gollu dabarini ti ɲaamariye be yi,
n na a ko axa da.
30 Yahaya wanqinde ke giri ko yi,
Alla ya ni,
ma seron ya ni ?
Xa da in jaabi ke yi ! »
31 I yinmenu duurun da me tirindi,
a falle i ti :
« O ga na ti a giri Alla ya yi su,
a tini ya :
“ Manne saabu da axa ga ma toŋondi ti a yi ? ”
32 Xa,
o ga na ti a giri seron xa ya yi,
o wa kanna jaman ŋa,
baawo a su maxa tonŋun tonŋu Yahaya ni annabinyinmen ya yi. »
33 I da Isa jaabi nan ti kuŋa :
« O nta a tu.
» Isa ti i da :
« Ayiwa in xa gaa ku gollu dabarini ti ɲaamariye be,
n nta a koono axa da. »