[Reesesoxaanan masayila]
12
Ken falle,
Isa Alimasiiwu da sefen jopa i da ti masayilanun ŋa.
A ti i da :
« *Yugo yogo ya ni,
a ga da reesetinŋun lori i ten ŋa,
a da a sangallu,
na reesebollinoqun dabari,
na tangandikora gille sigindi.
Ken falle,
a da golliɲaŋaano yogo kafu du yi na te ke toxo i maxa nan daga tere.
2 Reesen ga moyi,
a da komen xayi nan ti i na i taqi reesen kini a yi.
3 Golliɲaŋaano ku da kome ke raga na a katu na a kitti duurun wara dagana.
4 A yille kome tana xayini katta i ya,
i da ken xa katu ma i na a yinmen boto na a ka.
5 A ga da sikkanden xayi katta i ya,
i da ken raga na a kari.
I da ken me gabe ya katu kundun ŋa,
na i yogonu kari.
6 Faare tana ntaxa a maxa keeta ma sere baane,
ken be ga ni a ren xanan ŋa.
A lagari a ya xayini katta i ya nan ti i noxoodu :
“ I na danka toxo in renmen ken ken ŋa. ”
7 Xa golliɲaŋaanon ti me da :
“ Ke ya n riini a xayen wutu !
O na a kari,
o na ɲa ti xayen ŋa. ”
8 I da a xa raga na a kari na a sedi reesenten falle yi. »
9 Isa ti i da :
« Ayiwa reesenteegumen ga na ri,
a na manne ɲaana ku golliɲaŋaano yi ?
A na i karini ya na ten kini sere tananu yi.
10 Axa ma a xara Jabuuri noxon ŋa nan ti :
“ Tagandaanon ga bara tuufa ke be yi,
ken ya n xosi ɲa gonbontuufan ŋa.
11 Ken ni Tunka Duumanten gollen ya yi,
kaawafi sa !*
” »
12 Diinan xirisu ku da a xanu na Isa raga,
xa i kanu jaman ŋa.
I wa a tu xa mene nan ti,
a da masayila ke ko ti i ya yi.
Xa jaman xaaxantaaxun saabu da,
i da Isa wara a daga,
i fate a yi.
[Isa tirinde sagallen fin ŋa]
13 Ken falle, diinanxirisun da Farisigankon yogo do Heroodi seron yogo wara katta Isa yi kuudo i na a sefendi ma i wa a kitta feteqe yi.
14 I ri katta a yi nan ti a da :
« Xaranmoxo,
o wa a tu nan ti tonkonŋaanan ya ni an ŋa,
an nta kanna sere yi,
an nta sere yaaxe faayini,
an wa Alla killen tonŋun xaranŋundini.
Saasa,
a daganten ni na sagallen tuga Roomu tunkanyugo Kesaari yi ba ?
O n xawa a tugana,
ma o nta xawa a tugana ? »
15 Xa,
Isa ken wa a tu nan ti munaafaxinun ya ni,
a ti i da :
« Manne saabu da,
axa gaa in muurunu feteqe yi ?
Xa da godoxullu baane riiti in na a faayi de ! »
16 I do a ri katta a yi.
Isa ti i da :
« Ko toxo do ko sawura na ke gode kanma ?
» I ti a da :
« Kesaari ya ni. »
17 Isa ti :
« Ken kuŋa,
Kesaari xallen ga ni ke be yi,
xa da ken kini Kesaari yi ;
Alla xallen ga ni ke be yi,
xa na ken kini Alla yi.
» Isa jaabinde ke kaawafin da i raga moxoburu.
[Wundiyen xibaare]
18 Saduukagankon xa ri katta a yi,
ku be gaa kallen falle wundiyen nakkarini.
I da a tirindi ti :
19 « Xaranmoxo,
a safanten wa annabi Muusa Sariyan ŋa nan ti :
“ Yugo be ga na kara,
a ga ma renme kita,
a kaman waaxin na a yaqen saagandi kuudo kallaanan na bonsonŋe kita. ”*
20 « Ayiwa saasa,
ku waaxinu ɲeri yogo ya ni,
fanan yaxi nan kara,
a ma renme kita,
21 fillanden da yaxare ke wutu,
a xa kara a ma renme kita,
sikkanden xa kundu,
22 sefe defonde,
i su da yaxare ke yaxi nan kara,
baane su ma renme kita.
Ken falle ya ni,
yaxare ke xa ga kara.
23 Ayiwa,
wundiyen koota wo,
i ga na wundi,
yaxare ke ɲaana ko baane xalle yi ?
Baawo i ɲeri su da a yaxi ya. »
24 Isa ti i da :
« Axa sankunton ya ni de,
baawo axa ma Safandi Sennun faamu,
axa ma Alla baawuden xa faamu.
25 Wundiyen koota,
yaxu nta non ŋa,
xa i ɲaana xoyi maliikanun gaa kanmun ŋa moxo be ya.
26 Fo be gaa taŋene wundiyen xibaaren ŋa,
axa ma a xara annabi Muusa kitaaben ŋa noqu be a ga sefe badagi kumunten fin kanma ba ?
Non ya ni,
Alla ga ti Muusa da :
“ Ibirahiima do Isiyaaxa do Yaaxuba Alla ni inke ya yi*. ”
27 Ken kuŋa,
Alla feti furun Alla yi,
xa ŋalinton ya Alla ni.
Axa na sankuntaaxu xoore ya noxon ŋa. »
[Alla ɲaamarindixannun fo xote]
28 Sariyanxaranmoxo yogo ɲi i terinkana i gaa me kutana.
A ga da a mugu Isa jaabun ga siro moxo be,
a tinko a yi na a tirindi nan ti :
« Ɲaamarindixannun fo xoten ni kan ŋa ? »
29 Isa ti :
« Ɲaamarindixannun fo xoten ni :
“ Terinke Banisirayila,
Tunka Duumanten ya ni o Alla yi,
a baane ya ni.
30 An na Tunka Duumanten xanu ti an sondomen su yi,
an Alla,
na a xanu ti an yonkin su yi,
na a xanu ti an haqilen su yi,
na a xanu ti an senben su yi. ”*
31 « Fillande be gaa a yi,
ken ni ya :
“ An seri tinken xanu ya du,
xoyi an yinme moxo. ”*
« Ɲaamarindixanne su nta xoto ku yi. »
32 Sariyanxaranmoxo ke ti a da :
« A siro buru Xaranmoxo,
an da tonŋu ko :
Alla ni baane ya yi,
fillanden nta a yi.
33 Na a xanu ti an sondomen su yi,
na a xanu ti an haqilen su yi,
na a xanu ti an senben su yi,
na an seri tinken xa xanu xoyi an yinme moxo,
ken ya n fasu sadaxa xuruminten do sadaxan moxonma su yi. »
34 Isa ga da a wari a ga da i jaabi ti haqili siren ŋa moxo be,
a ti a da :
« An do Allantunkaaxun nta laatu.
» Ken falle,
sere su maxa saako a tirindini.
[Kisindaanan do Daawuda]
35 Isa gaa xaranŋundindini Allanbatikaxooren noxon ŋa,
a da i tirindi nan ti :
« Sariyanxaranmoxonun katta tini Kisindaanan ni tunka Daawuda renmen ŋa kan moxo ?
36 Daawuda ken xa yinme,
Alla Fanka Sennen ga yanqa a yi,
a ti :
“ Tunka Duumanten ti in Kamanyugon da :
‘ Taaxu in tayen ŋa,
taaxura sugandinte,
ma in ga da an xonnon ro an tannun wure.
’ ”*
37 « Ken kuŋa,
Daawuda yinme gaa Kisindaanan xilli :
“ Kamanyugo ”,
ken ɲaana Daawuda renmen ŋa kan moxo xa yi ?
» Jama xoore ya n ɲi non ŋa,
i gaa Isa terinkana ti ɲaxaliye yi.
[Sariyanxaranmoxonun kiitinde]
38 Isa xaranŋundinden noxon ŋa,
a ti jaman da :
« Xa da sariyanxaranmoxonun faayi de !
Ikun na dorokoxooraronden ya mulla,
do a nan yaala ;
i wa a mulla seron na i darontankuuɲi do beddun ŋa.
39 I ga na ɲi allanxarankaanun noxon ŋa,
i taaxunu sapa kaanankon ya yi.
I ga na i xiri yigeyen ŋa noqu be,
i dagana taaxu serixoorantaaxuranun ya yi.
40 Ikun ya na kiinakariidonun naaburen su yigana,
i na yille allanbatiyi dallanten dabarini.
Ken du ya ni i yanganxatan tallan xoorondini. »
[Misikiina yaxaren sadaxan xibaare]
41 Ken falle,
Isa taaxu nan taŋe Allanbatikaxooren sadaxarofon ŋa.
Ku be gaa sadaxan roono a yi,
a wa i faayini.
Bannanun wa xaalisin gaben roono a yi.
42 Kiinakariido yogo xa ri,
misikiinen ya ni,
a xa da godo miso filli ro a yi,
nafa ga nta fo be yi.
43 Isa da i xaranlenmon xiri kuŋa nan ti i da :
« Tonŋu,
n na a ko axa da,
ke kiinakariido misikiine ga da fo be ro sadaxarofo ke noxon ŋa,
a ya n fasu a su yi.
44 Baawo,
kuttun haaju ga nta xaalisi be yi,
i da ken ya sadaxi,
ke yaxare ken xa do i misikiinaaxu su,
a da i naaburen su ya ro a yi,
fo wo fo gaa a maxa. »