[Waliiman masayila]
22
Isa Alimasiiwu xenu masayilakonŋen ŋa jaman da xadi.
A ti i da :
2 « Allantunkaaxun gaa xoyi ke be :
tunkanyugo yogo ya ni,
a ren yugon gaa yaxini,
a da waliima xoore dabari
3 na a ko seron da.
Yigeyen ga kiɲe,
a da i komon xayi i ya ti i nan ri yige,
xa i bara riini.
4 A da komo tana xayi seri xirinto ku yi nan ti :
“ A faayi ke,
n da waliima xoore ya dabari,
na gunbunun kari,
ken do tanmisen fo kate,
yiganden moyi,
axa nan ri waliiman yiga ! ”
5 Ken do i fi su,
sere ma tunkanyugon jaate :
yogo daga i ten ŋa,
yogo daga i jaagundiran ŋa,
6 kuttun da komon raga na i tooro,
ken falle na i kari.
7 Tunkanyugo ke ga da ken mugu,
a butu ma a gaa dangini haqen ŋa.
A da i kuranlenmon deni.
Ku be ga da a komo ku kari,
i da a su kari,
na i deben buyi.
8 Ken falle,
a ti i komo ku da :
“ Waliimanyiganden moyi ;
xa o ga da fo wo fo xiri yigeyen ŋa,
ken do a ma xawa.
9 Saasa,
axa daga sigi killingenmun ŋa.
Axa ga na sere su wari dangini,
axa na a xiri yigeyen ŋa. ”
10 Komon daga sigi killun ŋa.
I da seren fo siren do a fo buren su kafu me yi do i nan ri.
Ɲaxanlenmon gabo ke moxo ya yi na ɲaxannoqun faga.
11 « Tunkanyugon ga ro katta yigaanon ŋa,
a da seri baane wari,
sallinyiraamu nta a yi.
12 A ti a da :
“ He !
N yugo,
an ro yere kan moxo sallinyiraamu¤ ga nta an ŋa ?
” Yugon ma sefe a da.
13 Ken sigira su yi,
tunkanyugon ti komon da :
“ Xa da a kittun do a taanun yetu,
axa na a fitta bakka sellan ŋa,
biten noxon ŋa.
A na wu ma a ga giige.
” »
14 Isa saage tini :
« Alla da seri gabe ya xiri,
xa fonlamaanu ya sugandinton ni. »
[Sagallen tugaye tunkanyugon ŋa]
15 Ken falle,
Farisigankon da me ɲi.
I wa a mulla i ra gaa Isa kitta feteqe yi moxo be ti a yinme sefexannen ŋa.
16 I da i xaranlenmon do Heroodi seron yogo* xayi Isa yi.
I ti a da :
« Xaranmoxo,
o wa a tu nan ti tonkonŋaanan ya ni an ŋa.
Alla ga da fo wo fo ko,
an na a su koono ti i moxon ya yi.
An nta kanna sere yi,
baawo an nta sere yaaxe faayini.
17 O wa an tirindini :
yaala a daganten ni na sagallen tuga Roomu tunkanyugo Kesaari yi ba ? »
18 Ŋanniyi bure be gaa i ya,
Isa da a tu.
A ti i da :
« Ku munaafaxinu ku,
manne saabu da axa gaa in muurunu feteqe yi ?
19 Xa da sagallitugexaalisi ke koyi in ŋa de !
» I do godoxullu baane ri katta a yi.
20 Isa jaabi nan ti i da :
« Ko toxo do ko sawura na ke gode kanma ? »
21 I da a jaabi nan ti :
« Kesaari ya ni.
» Isa jaabi nan ti :
« Ken kuŋa,
Kesaari xallen ga ni ke be yi,
xa da ken kini Kesaari yi ;
Alla xallen ga ni ke be yi,
xa na ken kini Alla yi. »
22 A ga da ke ko,
a kaawafin da i raga.
I giri bakka a kaaran ŋa,
nan daga.
[Karafallen wundiyen xibaare]
23 Ken koota baane yi xadi,
Saduukaganko,
ku be gaa kallen falle wundiyen nakkarini,*
i yogonu ri katta Isa yi na a tirindi ti :
24 « Xaranmoxo,
annabi Muusa Sariyan ti :
“ Yugo be ga na kara,
a ga ma renme kita,
a kaman waaxin na a yaqen saagandi kuudo kallaanan na bonsonŋe kita. ”*
25 « Ayiwa,
oku,
waaxinu ɲeri ɲi kapa o yi :
fo fana be ga yaxi,
a kara,
a ma renme kita,
a yaaxidon da a yaqen saagandi.
26 Ken yaaxido xa kara,
a ma renme kita.
I su toxo me batta kundun ya yi,
ma xoxona ɲerundi.
27 Waaxinu ku su kara falle,
yaxare ke xa ri kara.
28 Ayiwa,
wundiyen koota wo,
ku waaxinu ɲeri,
yaxare ke ɲaana ko baane xalle yi ?
Baawo a yaxi i du baananbe su yi ya. »
29 Isa jaabi nan ti i da kuŋa :
« Axa sankunton ya ni de,
baawo axa ma Safandi Sennun faamu,
axa ma Alla baawuden xa faamu.
30 Wundiyen koota,
yaxu nta non ŋa,
xa i ɲaana xoyi maliikanun gaa kanmun ŋa moxo ke be ya.
31 Fo be gaa taŋene wundiyen xibaaren ŋa,
Alla ga da fo be ko axa danŋa,
axa ma a xara ya gani,
a ga ti :
32 “ Ibirahiima do Isiyaaxa do Yaaxuba Alla ni inke ya yi ” ?*
« Ken kuŋa,
Alla feti furun Alla yi,
ŋalinton ya Alla ni. »
33 Jama be ga ɲi Isa terinkana,
i su kaawa a xaranŋunden ŋa.
[Ɲaamarindixannun su fo dare]
34 Farisigankon ga da a mugu ti Isa da saduukagankon raga sefen ŋa,
i da me kafu.
35 Yugo yogo wa kapa i ya,
sariyanxaranmoxon ya ni.
A da Isa laxadujaga kuudo i na a kita.
36 A ti Isa da :
« Xaranmoxo,
sariyan noxon ŋa,
kan ɲaamarindixanne n dara a su yi ? »
37 Isa jaabi nan ti a da :
« “ An na Tunka Duumanten xanu ti an sondomen su yi,
an Alla,
na a xanu ti an yonkin su yi,
na a xanu ti an haqilen su yi. ”*
38 « Ke ya n dara ɲaamarindixanne ke su yi,
a ya ni fo fanan xa yi.
39 Fillande be gaa a yi,
a ga n dara xoyi fanan moxo,
ken ni ya :
“ An seri tinken xanu ya du, xoyi an yinme moxo. ”*
40 « Annabi Muusa Sariyan do annabinyinmun su jonginten na ku ya yi. »*
[Kisindaanan do Daawuda naxa]
41 Farisigankon su gaa me kanma,
Isa da i tirindi ti :
42 « Axakun sinmayen ni manne yi Kisindaanan kanma ?
Ko baane renme ni ?
» I ti Isa da :
« Tunka Daawuda ya renme ni. »
43 Isa jaabi nan ti i da :
« Manne xa saabu da,
Alla Fanka Sennen ga yanqa Daawuda yi,
ma a gaa Kisindaanan xilli “ Kamanyugo ?
” A ga ti :
44 “ Tunka Duumanten ti in Kamanyugon da :
‘ Taaxu in tayen ŋa,
taaxura sugandinte,
ma in ga n da an xonnon ro an taanun wure.
’ ”*