[Tanɲeren do xaranlenmon filli xayiye dagana gangundi]
10
Ken dangiyen falle,
Kamanyugo da tanɲere do xaranlenmo filli¤ tana sugandi na i xayi dagana du kaane sero filli filli,
i ga n xawa dagana debe wo debe do noqu wo noqu yi.
2 A ti i da :
« Sanjaanen xooro,
sanjanlenmon xa nan roxa.
Ken kuŋa,
xa da sanjangumen ɲaaga a na sanjanlenmon gabondi sanjaanen ŋa.*
3 Ayiwa,
xa daga !
N wa axa xayini xoyi jaxanlenmu,
turuŋun naxa.
4 Xa maxa xaalisi wutu do du yi ;
xa maxa fudi wutu do du yi ;
xa maxa tepu wutu do du yi.
Kuuɲinde xa nan maxa axa mungundi do axa dagayinmen ŋa.
5 Axa ga na ro ka be yi,
axa nan kuuɲindi fina nan ti :
“ Salaamalekumu. ”
6 Selli sere gaa ken ka yi xeeridunke ga ni,
axa kuuɲinden xeerin wa xenne a kaman ŋa ;
xeeridunke ga nta non ŋa xa,
axa kuuɲinden xeerin wa saageene katta axa yi.
7 Axa ga na yanqa ka be yi,
i ga na yigande be kini axa yi,
axa na ken yiga ;
i ga na minifo be kini axa yi,
axa na a mini.
Baawo golliɲaŋaanan nan xawa i tugaaden kitana ya.
Axa nan maxa giri ka yi nan daga yanqa ka tana yi.
8 Axa ga na ro debe be yi,
i ga na axa bisimilla,
i ga na yigande be kini axa yi,
axa na a yiga.
9 Axa na ken debe watunton sahandi ;
axa na a ko debidunkon da ti :
“ Allantunkaaxun tinko axa yi. ”
10 Xa,
axa ga na ro debe be yi i ga ma duŋe axa bisimillana,
axa na daga beddun ŋa nan ti :
11 “ Hari xobe be ga saxu o taanun ŋa axa deben noxon ŋa,
o wa a konkono bakka o taanun ŋa,
na a toxo axa maxa yere.
Xa ganta,
axa na a tu ti Allantunkaaxun tinko.
” »
12 Isa Alimasiiwu yille tini :
« N wa a koono axa da tonŋun ŋa ti kiiten kootan ŋa,
ken debe seron yanganxatayen wa xotoono diinanta Luutigankon debun yanganxatayen ŋa. »
[Debun balle toŋondiyen ŋa]
13 A ti :
« Bone wa an da Xoraaji !¤
Bone wa an da Beeti-saayida !
Baawo kaawafiinu be ga ɲaŋi axa yi,
i gan ɲaŋi Sooro do Sidooni ya yi,
ganpi i da i jikkunun faraaxu,
na booto xason ɲa yiraamu yi,
na xamanxullen joxi i faton ŋa,
ken gaa i jikkunun faraaxiyen koyini.¤
14 Ken ya saabu da ni kiiten koota,
Sooro do Sidooni seron yanganxatayen gaa newono diinanta axa xallen ŋa.
15 Anken Kafarinoomu xa,
an da a sinma an wa wurugini ma kanxotten ŋa ya ba ?
Aayi !
An yanqana ya ma Jahannaba tinŋe ! »
16 A yille tini i xaranlenmon da :
« Sere be ga na axa terinka,
a kaman da inke ya terinka ;
sere be ga na bara axa yi,
a kaman bara inke ya yi ;
sere be xa ga na bara inke yi,
a kaman bara ke be ga da in xayi ya. »*
[Tanɲeren do xaranlenmon filli saageye]
17 Tanɲeren do xaranlenmon filli¤ saage riini,
i ɲaxalinta xooro,
i ti Isa da :
« Kamanyugo,
o ga na fo be ko hari jinnanun da ti an toxon ŋa,
i na ken ya ɲaana. »
18 Isa ti i da :
« N yaaxen ɲi Ibiliisa yi yereene gilli kanxotten ŋa xo kanmen meɲexetiyen moxo,
a ga halaki.
19 A faayi,
n da senben kini axa yi nan tere kacinton do ɲantonun kanma,
do na Ibiliisa fankan su ro axa tan wure.
Fo wo fo xa ra nta fo bure ɲaana axa yi.
20 Jinnanun wa kanna axa yi baawo axa ga na ti i na fo be ɲa i wa ken ɲaana.
Xa,
xa maxa ɲaxali ti ken ŋa de !
Xa ɲaxali ya,
ti axa toxonun safanton wa Alla maxa kanxottun ŋa. »
21 Ken sigira yi,
Alla Fanka Sennen da Isa ɲaxalindi siri,
a ti :
« N wa an tiigana,
n Faaba,
kanmun do ɲiiɲen Kama.
An da ku fiinu muxundi haqilaxoorogumun do tuwaana xooron ŋa,
na i tuyindi leminan lamaanun ŋa.
Yabo,
n Faaba,
ke moxo ya n liŋa an da.
22 N Faaba da fo wo fo su ya kini in ŋa :
sere su nta Renmen tu Faaben ga fe ;
sere su xa nta Faaben tu Renmen ga fe,
a do Renmen ga na a tuyindi sere be yi. »
23 Ken falle Isa taŋe i xaranlenmon ŋa na a duran ko i da ti :
« Wulluliŋontaaxun wa axa da na a sababun ɲa axa yaaxen gaa fo be yi !
24 Baawo,
n na tonŋun ko axa da ti :
axa ga da ke be wari,
annabinyin gaben do tunkanyugu gabe da a xanu na a me wari,
xa i ma a wari ;
i da a xanu na a me mugu,
xa i ma a mugu. »
[Somooronka siren masayila]
25 Ken falle,
sariyanxaranmoxo yogo da Isa laxadujaga,
na a tirindi ti :
« Xaranmoxo,
n nan xawa manne ɲaana kuudo in na bireyi duumanten kita ? »
26 Isa ti a da :
« Manne safanten na annabi Muusa Sariyan ŋa ?
An da a xara na a faamu kan moxo yi ? »
27 Yugon ti a da :
« A safanten ni ti :
“ An na Tunka Duumanten xanu ti an sondomen su yi,
an Alla,
na a xanu ti an yonkin su yi,
na a xanu ti an senben su yi,
na a xanu ti an haqilen su yi ;
an seri tinken xanu ya du,
xoyi an yinme moxo. ” »*
28 Isa ti a da :
« An jaabun siro.
An ga na ken dabari,
an wa Arijanna kitana. »*
29 Xa sariyanxaranmoxo ke gaa a mulla na jalagin bogu du yi,
a ti Isa da :
« Ken kuŋa,
ko xa ni in seri tinken ŋa ? »
30 Isa ti a da :
« Ke ɲa yugo yogo ya yi,
a gaa gilli Yerusalaamu nan daga Yeriiho,
killimaxasaqaanon xenu a yi na a kittidufon su boosi a yi.
I da a katu ma i gaa ɲaana xoyi i wa a karini,
nan daga na a toxo saqa.
31 Ken da sadaxakiɲandaana yogo ɲi do kille ke yi riini.
A ga ri ware yugo ke yi saqa,
a da a goori nan daga do i killen ŋa.
32 Leewikaaranke yogo xa ri do kille ke yi.
A ga ri ware yugo ke yi saqa,
a da a goori nan daga do i killen ŋa.
33 Xa Somooronka yugo yogo,
[xonnaaxun gaa o do ikun beenu naxa,]
a xa riyinte do killi baananne ke yi,
a ri ware yugo ke yi.
A ga da a wari saqa,
yugo ke hinneyen da a raga.
34 A tinko yugo ke yi na ten do reesendolon¤ ro a joogiraqun ŋa na i yetu.
A yille a setundini i yinme daaban kanma,
na a deni mukkuyanqara yogo yi na a sorogo non ŋa.
35 A bita fillandin ŋa,
a da godoxullu¤ filli deniye bagandi na i kini mukkuyanqara ke kaman ŋa,
nan ti a da :
“ Ke yugo sorogo,
an ga na in batu haqe be yi,
n saaganten ŋa ti yere yi,
n na a tuga an ŋa.
” »
36 Isa yille tini yugo ke da :
« An sinmeye maxa,
killimaxasaqaanon ga xenu yugo ke be yi,
ko n da a raga i seri tinke yi ku sero sikki yi ? »
37 Sariyanxaranmoxon ti a da :
« Ke be ga hinne a yi nan siro a da,
a ya n da a raga i seri tinke yi.
» Isa ti a da :
« Ken kuŋa,
daga an xa na ken me dabari. »
[Maarata do Maariya]
38 Ayiwa,
Isa do i xaranlenmon gaa terekillen kanma telle,
a ro debe yogo yi.
Yaxare yogo da a bisimilla i kan ŋa,
a toxon ga ni Maarata.
39 Xoxona yaxare ɲi Maarata maxa,
a toxon ga ni Maariya.
Maariya daga taaxu Kamanyugo taanun ŋa na a digaamun terinka.
40 Xa,
Maarata ken yaaxandunbunten wa do kaadungollen ŋa.
A ri katta Isa yi nan ti a da :
« Xaranmoxo,
n xoxona yaxaren ga da ke golle su toxo in baane maxa wo,
xoyi ken nan xawa ya ba ?
A ko a da,
ti a nan ri in deema ke. »
41 Xa Kamanyugo ti a da :
« Maarata,
an wa jootini na du lasama fi gabe yi.
42 Xa maanan na fi baane ya yi.
Maariya da ken fi sire ya sugandi,
sere su xa nta a boosini a yi. »