Mace 13

Ken koota su yi, Isa Alimasiiwu giri kan ŋa nan daga taaxu Galiile xaaranxannen ŋa, kuudo nan xaranŋundindi. 2 Jama xoore da me ɲi a kaaron ŋa, ma a gaa gilli nan ro fuuren noxon ŋa nan taaxu. Jaman wa sikki doŋan ŋa.

[Soxoodi sanqinten masayila]

(Maarika 4.1-9 ; Luka 8.4-8)

3 Isa da fo gabe tuyindi i ya ti ya yi. A ti i da : « Xa terinke ! Soxaana yogo daga i ten sanqi. 4 A gaa sanqindini, soxoodin yogo yere killinxannen ŋa. Yeliŋun ga ri, i da i sagara na i toni. 5 Fo yere gidinnoqun ŋa. Kun funtiyen jawo, baawo doori gabe nta no. 6 Xa, kiyen tewoyen da i xurumindi, baawo i ɲiimun ma katu laatono. 7 Soxoodinu yogonu yere saasinbadagun noxon ŋa. Badagun ga xooro, i da i bitta. 8 I yogonu yere soxoɲiiɲa siren ŋa, i bogu nan xooro, noqu yogo da i me tanjikke bagandi ; noqu, tandunme ; noqu, kame. 9 Taro gaa sere be yi, a nan terinke de ! »

[Isa masayilanun koni yinme]

(Maarika 4.10-12 ; Luka 8.9-10)

10 Xaranlenmon tinko Isa yi nan ti a da : « Manne saabu da an gaa sefene seron danŋa ti masayilanun ya yi ? » 11 A jaabi nan ti i da : «  gundon tuwaaxun kini axakun ya yi, xa a ma kini kuttun ŋa, 12 baawo fo gaa sere be maxa, fo ga na kafi a yi, a jiidini ya, a na gabo. Xa, fo gabe ga nta sere be maxa, hari fonne ke be gaa a kaman maxa, a boosini a yi ya. 13 Ken ya saabu da, n gaa sefene i danŋa ti masayilanun ŋa, baawo yaaxon wa i ya, xa i nta warini ; tarun wa i ya, xa i nta mugini, i nta faamini. 14 Kundu ya ni, annabi ga da xayifaaraaxu be dabari, a na tinme i da, a ga ti Alla ti :

“ Tarun wa axa yi, axa gaa terinkene de, xa axa nta mugini,

yaaxon wa axa yi, axa gaa faayindini, xa axa nta warini.

15 Baawo ke jama sondomun beexi ya,

i tarun suti, i yaaxon finki,

kuudo i yaaxon nan maxa wari,

i tarun nan maxa mugi,

i sondomun nan maxa faami.

Ken ga n maxa fe, i na i du rasaaga,

n na i sahandi. ” »

16 Isa jaabi nan ti i faarun da : « Ganta axakun, wulluliŋontaaxun wa axa da, baawo axa wa warini, axa wa mugini. 17 Tonŋu, n na a ko axa da : axa ga da ke be wari, gaben do seri teleŋonten gaben da a xanu na a me wari, xa i ma a wari ; i da a xanu na a me mugu, xa i ma a mugu.

[Soxoodi sanqinten masayilan fasare]

(Maarika 4.13-20 ; Luka 8.11-15)

18 « Xa, axakun na soxoodi sanqaanan masayilan fasaren terinka. 19 Seren ga na Allantunkaaxun xibaaren mugu, a ga ma ro a yi, Ibiliisa na ri a xiili bakka a sondomen ŋa. Ken ni soxoodi ke be ga yere killinxannen ŋa ya. 20 “ Gidinnoqu ke soxoodinu ” : ken ni sere ke be ga n jawo Alla Digaamen mukku ya nan duŋe a yi ti ɲaxaliye yi. 21 Xa, a xa ra nta sabatini, baawo ɲiime nta a yi. Xotoye ma toora ga na a kita do Alla Digaamen ŋa, danqanaaxun na xosi duguta a yi. 22 Sere ke xa be gaa Alla Digaamen mukku, a ra ga nta a gollen dabarini dunadunhanminun do naaburun xannaaxun jaaraben saabu da, ken kaman xa ni saasinbadagu ku soxoodinun ya, a nta funsunu. 23 Sere ke be gaa Alla Digaamen mukku na a faamu nan golli ti a yi, ken ni soxoɲiiɲa sire ke soxoodinun ya, a ga siro. Noqu yogo da i me tanjikke bagandi, noqu tandunme, noqu kame. »

[Sangangen masayila]

24 Isa da masayila tana ko i da nan ti : « Allantunkaaxun gaa xoyi ke be : a wa xoyi sere yogo ga da i ten tifi ti yillinsoxoodi siren ŋa ; 25 wuron kaanana, seron gaa xenqene, ken sere xonnen daga a ten ŋa na sangangen soxoodin sanqi a yi na i falle koyi. 26 Yillen ga bogu bire be nan kare, sangangen xa bange. 27 Teegumen golliɲaŋaanon ri katta a yi nan ti : “ O yinmanke, an ma soxoodi siren ya tifi an te ke yi gani ? Ke sangange xa giri ti minna yi kuŋa ? ” 28 A ti i da : “ Xonne yogo ya gollen ni ken ŋa. ” Golliɲaŋaanon ti kuŋa : “ O n daga a soxo ba ? ” 29 A ti : “ Aayi, baawo in wa kanna axa n maxa yillen kari do a batten ŋa. 30 Xa da a wara i su nan moyi doome. Fate biren ŋa, n na ti fataanon na sangange ke fina fata na a ro me kanma i na a buyi. Ken bire i na yillen xa fata na a ro in maran ŋa. ” »

[Dindifunsen masayilan do buukaadon masayila]

(Maarika 4.30-32 ; Luka 13.18-19)

31 Isa da ke masayila xa ko i da nan ti : « Allantunkaaxun gaa xoyi ke be : a na xoyi dindifunsen ya, yogo ga da a tifi. 32 Dindifunsen xa ya ni funsun su fo roxen ŋa, xa a ga na funti, a ya n xoora yitten su yi ; a wa xoorono ma yeliŋun ga ri i sonkon dabari a kingun kanma. »

33 Isa da masayila tana ko i da ti : « Allantunkaaxun gaa xoyi ke be : a na xo ya yi, yaxaren ga na a fonne ro farijura xootinten gaben ŋa, a su gaa buukunu. »

[Isa masayilanun koni yinme]

(Maarika 4.33-34)

34 Isa da ke su masayilanman ya ko jaman da. A ma ɲi fo wo fo koono i da masayilan ya ga fe. 35 Ke su ni ya, ga da sefe be ko na tinme, a ga ti Alla ti :

« Ma in ga ri sefe ti masayilanun ŋa.

Fi muxunto be ga ɲaŋi gelli duna jopaadun ŋa, ma in ga da i bangandi. »

[Sangangen masayilan fasare]

36 Ken falle, Isa giri jaman ŋa, nan daga kan ŋa. A xaranlenmon tinko a yi nan ti a da : « Sangange ke masayila fasari o da. » 37 A ti i da : « Ke be ga da yillen tifi, ken ni inke ya yi, Seren Renme ; 38 duna ya ni te ke yi ; soxoodi sire ke ni Allantunkaaxun renmun ya yi ; sangange ke soxoodi, ken ni seyitanlenmun ya yi ; 39 xonne ke be ga da sangangen tifi, ken ni ya yi ; fate biren ni duna lagaren ya yi ; fataano, kun ni maliikanun ya yi. 40 Seron gaa sangangen kapa me yi na a buyi moxo be yi de, duna lagaren xa ɲaana ken moxo ya yi. 41  wa i maliikanun ɲaamarini. Fo wo fo ga ɲi seron ya falle koyini tonŋun ŋa, do fo wo fo ga ɲi fo buru ɲaŋiini ya, i wa a su xoorono na i bagandi a tunkaaxun noxon ŋa. 42 I na i fitta Jahannaba yinbinkuman noxon ŋa. Ken noqu ya ni, i gaa wuunu ma i ga giige. 43 Ken koota, seri teleŋonton wa ɲelunqene i faaba tunkaaxun noxon ŋa xoyi kiye. Ken kuŋa, taro gaa sere be yi, a nan terinke de ! »

[Masayilanun sikki konŋe Allantunkaaxun kanma]

44 « Allantunkaaxun gaa xoyi ke be : a na xoyi naaburu bulunten ya yi, a gaa soxanten ŋa. Sere yogo daga ware a yi, a yilla a saagana i batten ŋa. A ɲaxalinta xooren ga ri ; fo wo fo gaa a maxa, a da a su gaaga na soxante ke xobo.

45 « Allantunkaaxun gaa xoyi ke be : a na xoyi jula be ga ɲi xaɲaxobeene ya, 46 a ga da xaɲi kallanken wari, a daga, fo wo fo ga ɲi a maxa, a da a su gaaga nan ri a jonkon ro xaɲa kallanke ke yi.

47 « Allantunkaaxun gaa xoyi ke be xadi : a na xoyi tangaana be ga da i jalan fitta geeji noxon ŋa ya, a ga fogu ɲexen xabiila ke su yi. 48 A fogu falle, i na a segendi na a wara doŋan ŋa, ken falle i na taaxu na fo sirun sagara roono kanden ŋa, na fo burun fitta. 49 Duna lagaren xa ɲaana ken moxo ya yi : maliikanun wa riini fo sirun do fo burun fata bakka me yi ; 50 i na fo burun fitta Jahannaba yinbinkuman noxon ŋa. Ken noqu ya ni, i gaa wuunu ma i ga giige. »

[Fo kurunban do fo xasen masayila]

51 Isa ti i faarun da : « Axa da ke su faamu ba ? » I ti : « Yabo, o da a su faamu ! » 52 Ken kuŋa, a ti i da : « Ke moxo baane ya ni, su, an ga katu ɲaana Allantunkaaxun xaranlenman ŋa, an na xoyi kaagume be gaa wutundini i naaburu xasen do i naaburu kurunban ya yi. »

[Nasaaranko danqanaaxuyinbalaaxu]

(Maarika 6.1-6 ; Luka 4.16-30)

53 Isa ga duguta masayilakonŋen ŋa bire be, a giri no. 54 A ga kiɲe i kaara, a saage seron xaranŋundini i yinmenu noxon ŋa. Ken da i kaarankon kaawafi, i ti : « Ke da ke tuwaaxu xoore do ke kaawafi kita minna yi ? 55 Sakkanlenme ke ya fe gani ? Mariyaamu renme ke ya fe ? Aken ya waaxinu feti do Yuusufu yi ba, a do Simoona do  ? 56 A waaxi yaxarun su nta o maxa yere ya yi gani ? Ku fiinu su giri a da ti minna yi kuŋa ? » 57 Ke ya n da i kaba toŋondini ti Isa yi. A ti i da kuŋa : «  ma roxe noqu su yi abada, ma a yinme saaredeben do a kan noxon baane. » 58 Isa ma kaawafi gabe dabari non ŋa i danqanaaxuyinbalaaxun saabu da.