[Annabi Yahaya faatiyen xibaare]
14
Ken waxati ya ni,
tunka Heroodi ga da Isa Alimasiiwu toxon mugu,
2 a ti i komon da :
« Ke yugo ni annabi Yahaya ya yi de !
A wundi bakka furun naxan ŋa.
Ken ya n sigi a ra gaa ku kaawafi xooro dabarini. »
3-5 Ke Yahaya kundu,
annabinyinmen ya ni.
Heroodi da i waaxi Filipu yaqen ya yaxi.
Yaxare ke toxon ni Heroodiya.
Yahaya ti :
« An waaxin yaqen yaxiyen ma daga an danŋa.
» Heroodi ɲi a mulla na Yahaya faatindi,
xa a kanu,
baawo jaman ken maxa,
Yahaya ni annabinyinmen ya yi.
Heroodi da a raga,
na surunmun ro a yi,
na a ro kason ŋa.
6 Heroodi saareyen siinan yilleyen sange ga kiɲe,
Heroodiya ren yaxaren rege jaman da,
ken liŋo Heroodi da moxosiri
7 ma a gaa kunana ti :
« An ga ti fo wo fo,
n wa a ɲaana an da. »
8 Saaxen da a ɲonqi ti a nan ti :
« Ayiwa,
Yahaya yinkollan kini in ŋa lafan kanma yere yi. »
9 Ke sefe da tunkanyugon sunondi,
xa a ga kuna jama ke be jon ŋa,
a ti i na a kini a yi.
10 I xosi daga Yahaya yinmen kutu kason ŋa.
11 I do a ri lafan kanma na a kini yaxanne ke yi,
a daga a kini i ma yi.
12 Yahaya xaranlenmon ri a furen wutu na a firindi,
ken falle i daga a ko Isa da.
[Wujunun karagi yugon yigandinde]
13 Isa ga da ke xibaare mugu,
a ro fuuren ŋa nan daga noqu xiidinte yi,
a baane.
Jaman ga da Isa dagayen mugu,
i giri do kaaran su yi,
nan daga i tan ŋa do a batte.
14 A gaa bakka fuuren ŋa,
a yaaxen wa jama xooren ŋa ;
a hinne i ya na be su watten jaara.
15 Futuron ga kiɲe,
xaranlenmon tinko a yi nan ti a da :
« Yere ni gunjuran ya yi,
wuron xa faayi ga ro.
An nta jaman walla i n daga yigandimuuri do debun ŋa. »
16 Xa Isa jaabi nan ti i da :
« A ma kiɲe i nan daga :
axa yinme na yigande kini i ya ke ! »
17 I ti a da kuŋa :
« Fo wo fo nta oku maxa yere noqu,
a ga ma ɲa ku buuruyinmu karagi do ku ɲexenlenmu filli ya yi. »
18 Isa jaabi nan ti :
« Xa da i riiti katta in ŋa. »
19 A ti jaman nan taaxu sokken kanma.
A da buuruyinmu ku karagi do ɲexenlenmu ku filli wutu na i dellen wutu kanmun ŋa na Alla tiiga,
ken falle na buurunu ku xoso na i kini xaranlenmon ŋa,
i da i taxandi jaman ŋa.
20 A su yige nan fogu.
Kutte be ga toxo,
faarun ga da i kafu me yi,
i gemu kanda fakko tanmi do fillo.*
21 Wujunu karagi yugo me xa ya n yige de,
yaxaren do leminen taqen nta ken ŋa.
[Isa tereye jin kanma]
22 Ken noqu su,
Isa da i xaranlenmon rondi fuuren ŋa ti i nan ware i kaane katta waxen ŋa,
saado a gaa yanpana jaman maxa.
23 A ga yanpa jaman maxa,
a baane sege giden kanma na Alla batu.
Wuron da a baane ya ɲi no.
24 Ken da a ɲi fuuren ken do bologaaɲen naxan laato,
a do fanka xoore wa genme ;
telleqi xoore wa a kanma na a lipa.
25 Katta lafajiri,
Isa tere katta i ya jin kanma.
26 I yaaxen gaa a yi terene jin kanma,
i haqilun bono.
Kannen maxa,
i xaaru,
i ti :
« Jinnan ya ni ! »
27 Xa Isa jawo sefene i da nan ti :
« Xa da axa haqilun taaxundi,
axa maxa kanu ;
nke ya ni ! »
28 Piyeeri teleŋo a yi nan ti a da :
« O yinmanke,
an ya ga ni,
ɲaamariyen kini in ŋa,
n nan ri katta an ŋa jin kanma. »
29 Isa jaabi nan ti a da :
« Li ke !
» Piyeeri yanqa bakka fuuren ŋa,
nan tere katta Isa yi jin kanma.
30 Xa,
a ga da fanken kasafoyen tu,
a kanu ;
a toxo yanqana jin ŋa,
a xaaru :
« N Kama,
n kisi ! »
31 Ken sigira su,
Isa da i sooxen fuutu katta a yi na a raga nan ti a da :
« An danqanaaxu nan roxa.
An sikka manne yi ? »
32 I ga ro fuuren ŋa bire be,
fanken sigi.
33 Ku be gaa fuuren ŋa,
i da du maxayanqa a da nan ti :
« Tonŋun-tonŋu,
Allanlenmen ya ni an ŋa. »
[Watunton sahande Kinereeti maran ŋa]