[Isa Alimasiiwu digaamuye laada xason kanma]
15
Koota yogo yi,
Farisigankon do sariyanxaranmoxonun giri Yerusalaamu nan ri katta Isa Alimasiiwu yi na a tirindi ti :
2 « Manne saabu da an xaranlenmon gaa ganninkon laadanun bonondini ?
I ga na ɲi yigene,
i ga nta i kittun senondini xoyi o laadan ga da a ko moxo be. »
3 Isa jaabi nan ti i da :
« Axakun xa,
manne ni axa gaa Alla ɲaamarindixannun sedde axa laadanun da ?
4 Alla ken xa ti ya :
“ An ma do an faaba daro.
”*
« A yille tini :
“ Sere be nda i ma walla ma i faaba langa, a kanman nan kara. ”*
5 « Xa,
axakun ti :
“ Sere be ga na ti i ma walla i faaba danŋa :
‘N ra gaa an deemana ti fo be yi,
n da a kini Alla yi’ ”,
6 axa ti ken kaman saaraanon haqen ntaxa a yi.
Ken ŋa,
axa da Alla Digaamen wara axa laadanun ya da.
7 Ku munaafaxinu ku !
Tonŋun ya ni annabi Yesayaahu maxa mene,
a ga sefe axa fin kanma nan ti Alla ti :
8 “ Ke jama na in darono ti i raqun ya yi,
xa i sondomun nan laatu in ŋa buru.
9 I na in batta xafu ya yi,
baawo i gaa fo wo fo xaranŋundini,
a su ni seron ya fi dabarinto yi.
” »*
[Seren mexende]
10 Ken falle,
Isa da jaman xiri nan ti i da :
« Xa da in terinka,
axa na faami.
11 Ke be gaa roono raqen ŋa,
ken nta sere sobindini de !
Ke be gaa bakka raqen ŋa,
ken ya na seren sobindini. »
12 Isa ga da ke sefe ko,
a xaranlenmon tinko a yi,
nan ti a da :
« An ma a tu ti anke sefe digi Farisigankon ŋa gani ? »
13 Isa jaabi nan ti :
« N Faaba kallanken yinme ya ga ma yitte su lori,
ken lagarini doofene ya.
14 Xa da i wara,
finkinta duurun ya ni i gaa me geesunu.
Finkinton kun xa me geesunde,
i su lagarini wareene gunban ŋa ya. »
15 Piyeeri ti Isa da :
« Anke masayila wure ko o da. »
16 Isa jaabi nan ti :
« Hari sa keti haqile nta axa yi gani ?
17 Fo wo fo gaa roono seren raqen ŋa,
a kiɲene a noxon ŋa ya ;
ken falle,
a na ɲa mexe yi nan fitte.
Axa ma ken tu ya ?
18 Xa fo be gaa bakka raqen ŋa,
ken gilli sondomen ya yi,
ken ya na seren sobindini.
19 Fo be gaa bakka sondomen ŋa,
ken ga ni xoyi :
sinmayi buren do serikalle,
sunkande,
jeeniye,
a do fayiye,
ken do seedanjuuraaxu,
do laxaranburaaxu,
20 ku ya na seren sobindini.
Xa,
nan yige an ma an kittun wanqi,
ken nta sere sobindini. »
[Kanaananka yaxaren toŋondiye]
21 Isa ga giri no,
a daga Sooro do Sidooni maran ŋa.*
22 Ken da Kanaananka¤ yaxare yogo ɲi no,
a ga da Isa wari,
a toxo xaarunu,
a gaa tini :
« Kamanyugo,
Tunka Daawuda renme,*
hinne in ŋa !
Jinnan diginten wa in ren yaxaren ŋa. »
23 Xa,
Isa ma sefe a da.
Ken falle a xaranlenmon tinko a yi nan ti a da :
« A xata yillene,
baawo a do xaaruyen wa do o batten ŋa. »
24 Isa da i jaabi nan ti :
« Alla ma in xayi katta sere tana su yi,
a ga ma ɲa Banisirayilaganko jaxanlen sankunton ya yi. »*
25 Xa yaxaren ri tusi Isa wure nan ti a da :
« Kamanyugo,
n deema ! »
26 Isa jaabi nan ti a da :
« Na seranlenmun yiganden fitta wullunlenmun wure,
ken ma siro de. »
27 Xa yaxaren ti :
« An da tonŋu ko kamanyugo,
ken yinme ya ni mene,
wullunlenmen kaman ga na ɲi yigene ya ni,
a xa gaa fo yerenton sagarana. »
28 A ga da kundu ko,
Isa jaabi nan ti a da :
« Yaxare ke,
an danqanaaxun xooren ni koyi !
An muurifon nan ɲaŋi an da.
» Ken sigira su,
a ren yaxaren saha.
[Jangiranton sahandiye]
29 Isa ga giri no,
a daga Galiile jin xannen ŋa.
A sege giden kanma nan taaxu.
30 Jama xoora gabe toxo riini katta a yi ;
i do jangiranten moxonman su ri katta Isa yi :
jogooninto,
finkinto,
muruxunto,
muumunto,
a da a su jaara.
31 Ken da jaman kaawafi.
I yaaxen wa muumunton ŋa i gaa sefene,
ken do jangiranten su ga saha.
Jaman ti :
« Tiigeyen wa Banisirayila Alla danŋa. »
[Wujunun naxati seren yigandinde]
32 Isa da i xaranlenmon xiri nan ti i da :
« Ke jama hinneyen wa in ŋa buru !
I bita sikkan ya faayi lenki i gaa do in ŋa,
i ma hari baane yiga.
N nta a mulla i n daga i ga ma yige ke,
dullen nan maxa i xoso,
i gaa kutiini killen ŋa. »
33 Xaranlenmon ti a da :
« Ke gunjura,
o na buuru bakka minna yi na ke me jama xoore yigandi ? »
34 Isa da i tirindi nan ti :
« Buuruyinmu manime na axa maxa ?
» I ti :
« Ɲeru,
a do ɲexenlen lamaanu. »
35 Isa da jaman ɲaamari ti a su nan taaxu ɲiiɲen ŋa.
36 A da buuruyinmu ku ɲeri do ɲexenlenmu ku wutu.
A ga duguta Alla tiigeyen ŋa,
a da i xoso-xoso na i kini xaranlenmon ŋa,
i da i kini jaman ŋa.
37 A su yige nan fogu.
Faarun do buru dunŋe ke kutten saage katta Isa yi.
Kun dunŋu xa gemu kanda fakko ɲeri.
38 Wujunu naxati sere ya n yige xa de,
yaxaren do leminen taqe nta ken ŋa.
39 Ken falle,
Isa yanpa jaman maxa.
A yinme ro fuuren ŋa nan daga Magadaana¤ ɲiiɲen ŋa.