[Wujunun naxati seren yigandinde]
8
Kun bito yi,
jama xoore yille me ɲiini.
Yigefo ma ɲi i maxa.
Isa Alimasiiwu da i xaranlenmon xiri nan ti i da :
2 « Ke jama hinneyen wa in ŋa buru !
I bita sikkan ya faayi lenki i gaa do in ŋa,
i ma hari baane yiga.
3 N ga na i dullunto ku wara dagana saasa,
i kutiini killen ŋa ya,
i yogonu kun xa girinoqun nan laatu. »
4 Xaranlenmo ku ti a da :
« Ke gunjura,
o katta buuru bakka minna yi na ke jama yigandi ? »
5 Isa ti i da kuŋa :
« Buuruyinmu manime na axa maxa ?
» I ti :
« Ɲeru. »
6 Isa da jaman ɲaamari ti a su nan taaxu ɲiiɲen ŋa.
A da buuruyinmu ku ɲeri wutu.
A ga duguta allatiigeyen ŋa,
a da i xoso-xoso na i kini i xaranlenmon ŋa i na i kini jaman ŋa.
I da i kini jaman ŋa.
7 Ɲexenlenmu yogo xa ɲi i maxa.
Allatiigeyen falle,
a da i kini xaranlenmon ŋa,
i na i taxandi.
8 A su yige nan fogu.
I do kanda fakko ɲeri ri buuru ke dunŋen ŋa.
9 Jama ke wa taŋene wujunu naxati sere me yi.
Ken falle,
Isa da i wara telle.
10 Ken falle,
a do i xaranlenmon ro fuuren ŋa nan daga Dalamanuuta jamaanen ŋa.
[Farisigankon taagumansi muuriye]
11 Farisigankon ri katta Isa yi do a nan toxo me kutana.
Kuudo na a xenpe,
i ti a na taagumanse dabari na a koyi nan ti a giri Alla ya yi.
12 Isa da i yonkin xiri xirindi xote,
a ti :
« Axakun seran danbu,
axa finna manne taagumanse muurunu ?
Tonŋu,
n na a ko axa da,
taagumanse ntaxa kinini axa yi. »
13 Ken falle a giri i ya.
A saage roono fuuren ŋa nan kare katta waxen ŋa.
[Farisigankon do Heroodi lewiiri]
14 Xaranlenmon mungu i ma silifanda wutu.
Buuruyin baane xa ya na i maxa fuuren noxon ŋa.
15 Isa da a xotondi i xaranlenmon maxa nan ti :
« Xa da du koroosi Farisigankon lewiirin ŋa de !
Axa na du koroosi Heroodi lewiirin ŋa. »
16 Xaranlenmon ti me da :
« O do buuru ga ma ri ya ni. »
17 Isa da i sinmayen tu.
A ti i da :
« Axa da a raga axa do buuru ga ma ri ya ?
Axa nta fo walla harisa,
axa nta faamini ?
Axa sondomu ku finkinton ya ni ba ?
18 Yaaxon wa axa yi,
axa nta fo walla gani ?
Taron wa axa yi,
keti axa nta fo mukku ?
Keti axakun nta sinmene
19 koota be in ga da buuruyinmun karagi xoso na wujunu karagi sere yigandi,
kanda fakko manimen toxo buurudunŋen ŋa axa do i ga ri katta in ŋa ?
» I ti :
« Tanmu do fillo. »
20 A ti :
« Ayiwa,
n ga da buuruyinmun ɲeri xa xoso na wujunun naxati seren yigandi koota be,
axa do kanda fakko manime buurudunŋen ri katta in ŋa ?
» I ti :
« Ɲeru. »
21 A saage tini i da :
« Axa ma faami harisa ? »
[Finkinten sahandiye Beeti-saayida yi]
22 I kiɲe Beeti-saayida yi.
I do finkinte yogo ri katta Isa yi na a ɲaaga ti a nan hari kati a yi baane tan.
23 A da finkinten raga ti i kitten ŋa do a nan bogu deben ŋa.
A da raxanjin ro a yaaxon ŋa na i kitten saxu a kanma nan ti a da :
« An yaaxen wa fo yi ba ? »
24 A faayindi nan ti :
« N yaaxen wa seron ŋa,
xa i na xoyi yittu ya,
i gaa terene. »
25 Isa saage i kittun roono a yaaxon ŋa,
a yaaxon wuɲi feretette.
A saha,
a wa fo wo fo walla na a laaba.
26 Isa da a wara katta i kaara yi kuŋa nan ti a da :
« Maxa hari ro deben ŋa. »
[Piyeeri seedeye]
27 Isa do i xaranlenmon daga Kesaariye-filipo fonkaaradundebun ŋa.
I gaa killen ŋa,
Isa da i tirindi nan ti :
« Seron maxa,
nke ni manne de ? »
28 I ti a da :
« Yogonu maxa,
annabi Yahaya ya ni an ŋa ;
yogonu xa maxa,
annabi Hiliyaasu ya ni an ŋa ;
yogonu maxa,
annabinyinme tana xa ya ni an ŋa. »
29 Ken falle,
a ti i yinmenu da :
« Axakun yinme maxa,
nke ni manne de ?
» Piyeeri ti :
« Kisindaana ke ya ni an ŋa. »
30 Isa da i gongo nan ti i n maxa ke ko sere su da.
[Isa yanganxatayen do a kallen konŋe]
31 Isa xenu a xurandini i xaranlenmon da nan ti :
« Waajibin ya ni,
nke be ga ni Seren Renmen ŋa,
n yonkin nan toore siri,
xirisun do sadaxakiɲandaananyinmanko,
kafiini sariyanxaranmoxonu,
i na bara in ŋa,
na in kari,
n kallen bita sikka,
n na wundi. »
32 A da ke sefexanne ko i da na a xurandi.
Ken sigira,
Piyeeri da a senbe na a kuralli.
33 Xa Isa tiirinbe katta xaranlenmo ku yi na i faayi.
A doxo Piyeeri yi nan ti :
« Laato bakka in ŋa,
ke Ibiliisa ke !
Anken yaaxen nta Alla liŋun ŋa,
an yaaxen na seron ya liŋun ŋa. »
34 Ken falle,
a da jaman do i xaranlenmon su xiri nan ti :
« Sere be gaa a mulla nan sukke do in ŋa,
an nan kaari an yinme yi,
na an sallibinsollen wutu¤ do du yi,
an na sukke do in ŋa.
35 Baawo,
sere wo sere gaa a mulla na i yonkin ya kisi,
a wa bonno.
Xa sere wo sere ga bono i yonkin ŋa do inke ya yi,
nan bono a yi do Xibaari Liŋen ya yi,
a yonkin wa kisini.
36 Sere be ga na duna muuman su kita tono,
an yonkin ga bono,
ken da manne siro an ŋa ?
37 Seren katta manne xa kinni,
ken ra gaa a yonkin maxawasana ?
38 Ayiwa,
sere wo sere ya ga yaagu ti inke yi,
ma an ga yaagu ti in sefon ŋa ku allankutesero do ku junuubuɲaŋaano ya jon ŋa,
nke be ga ni Seren Renmen ŋa,
n xa wa yaagunu ti a kaman ŋa,
koota be in do maliika sennun ga na ɲi riini in faaba nooron noxon ŋa. »