[Saara xason killun batiye]
7
Farisigankon do Yerusalaamu sariyanxaranmoxonu yogo da me ɲi Isa Alimasiiwu noqun ŋa.
2 I da a koroosi nan ti xaranlenmo ku yogonu kittun sobinton ya n yigene.
A wure ga ni,
i ma i kittun wanqi.
3 Ayiwa,
Farisiganko,
kafiini Yehuudiyanun su,
baane su nta yigene na a ɲi,
a ma i kittun wanqi na i laabandi,
ken ni i sere xason ya laada yi.
4 I ga na giri saxan ŋa,
i nta yigene abada,
i ga ma i kittun senondi.
Laada gabu tananu wa i maxa,
i ga nta mulla na i wara,
kun ga ni xo :
jiranxollon do lallun wanqindi moxo sire,
kafiini yigeyokkijaxawallinmaanun ŋa¤.¤
5 Farisigankon do sariyanxaranmoxonun ti Isa da kuŋa :
« Manne saabu da an xaranlenmon ga nta ganninkon laadanun batta,
i gaa yigene,
i kittun mexento ? »
6 Isa ti i da :
« Ku munaafaxinu ku !
Tonŋun ya na annabi Yesayaahu maxa mene,
a ga sefe axa fin kanma nan ti Alla ti :
“ Ke jama na in darono ti i raqun ya yi,
xa i sondomun nan laatu in ŋa buru.
7 I na in batta xafu ya yi,
baawo,
i gaa fo wo fo xaranŋundini,
a su ni seron ya fi dabarinto yi. ”*
8 « Axa da Alla ɲaamarindun wara nan tigiti seron laadanun ya yi. »
9 A saage nan ti i da :
« Alla ɲaamarindixannun ba,
axa da kun sedi ya mene,
nan tigiti axa yinmenu laadanun ŋa.
10 Annabi Muusa ti ya :
“ An ma do an faaba daro.
”*
« A ti xadi :
“ Sere be nda i ma walla ma i faaba langa, a kanman nan kara. ”*
11 « Xa axakun ti :
“ Sere be ga na ti i ma walla i faaba da :
‘ N ra gaa an deemana ti fo be yi,
n da a kini Alla yi.
’ ”
12 Axa ti ken kaman saaraanon haqen ntaxa a yi.
13 Axa na Alla digaamen ya walla nan sukke do axa gaa laadanu be xaranŋundini.
Axa wa ken me gabe dabarini. »
14 Ken falle,
a da jaman xiri xadi,
nan ti i da :
« Xa da in terinka,
axa su na faami.
15 Fo wo fo su gaa seren sellan ya,
a gaa roono a noxon ŋa,
ken ra nta seren sobindini.
Ganta,
ke be gaa bakka seren ŋa,
ken ya na a sobindini.
16 {Taro gaa sere be yi,
a nan terinke.}¤ »
17 A laato bakka jaman ŋa nan ro kan ŋa.
Xaranlenmon da a tirindi masayila ke wure yi.
18 A ti i da :
« Keti haqile nta axa yi gani ?
Fo wo fo gaa gilli seren sellan ŋa nan ro a noxon ŋa,
ken ra nta a sobindini,
19 baawo ken roono a noxon ya yi,
a nta kiɲene a sondomen ŋa,
ken falle a na ɲa sobe.
Axa ma ken tu ya ?
» A da a xurandi i da ken diganta ya yi nan ti yigefon su sennen ya ni.
20 A saage a yi nan ti :
« Ke be gaa bakka seren sondomen ŋa,
ken ya na a sobindini.
21 Seren noxon na a sondomen ya yi,
baawo seren sinmayi burun gilli a sondomen ya yi,
kun gaa xo :
jeeniye,
fayiye,
serikalle,
22 kafiini sunkande,
naaburunxannaaxu,
bureye,
nanbarantaaxu,
fuyanŋaaxu,
haasidaaxu,
laxaranburaaxu,
dufasanŋuntaaxu,
a do tuwanbalaaxu.
23 Ke fo bure su gilli sondomen ya yi,
a gaa seren sobindini. »
[Mukku yaxaren toŋondiye ti Isa yi]
24 Isa giri non ŋa,
nan daga Sooro maran ŋa.
A ro ka yogo yi,
a ma a xanu sere na i tu.
Xa a ma katu toqo muqen ŋa.
25 Yaxare yogo,
jinnan gaa a ren yaxaren ŋa,
a demu na Isa xibaaren mugu,
a ri du sedi a taanun ŋa.
26 Yaxare ke ni gerekin ya yi,
a giri Finiike maran ya yi,
Siiri jamaanen ŋa.
A da Isa xanjo,
a na jinnan xata bakka i renmen ŋa.
27 Isa ti a da :
« Dugu leminun nan fogu fina,
baawo na seranlenmun yiganden fitta wullunlenmun wure,
ken ma siro de. »¤
28 Yaxaren da a jaabi nan ti :
« An da tonŋu ko kamanyugo,
xa wullunlenme be gaa seranlenmun yigeyokken kaaran ŋa,
a wa yigandi yerenton kun sagarana. »
29 Isa ti a da :
« An ku digaamu saabu da,
jinnan bogu an renmen ŋa,
daga ».
30 Yaxaren ga saage katta i kan ŋa,
a da i renmen ɲi saqa saxan kanma,
jinnan bogu a yi.
[Lungunten sahande]
31 Isa giri Sooro ɲiiɲen ŋa nan saage katta Sidooni yi ti Galiile xaaren banŋe,
na Debutanmi maran kutu.
32 I do lungunte yogo ri katta a yi,
sefen ga n xoto a maxa.
I da a muuru Isa maxa,
a na i kitten saxu a kanma.
33 Isa da yugon raga do a nan laato bakka jaman ŋa.
A da i kittindoronmun ro a tarun ŋa,
na i raxanjin katundi a neenen ŋa.
34 Ken falle,
Isa da i dellen wutu kanmun ŋa,
na i yonkin xiri nan ti :
« Efaata »,
ken wure ga ni :
« Wuɲi. »
35 Ken sigira su yi,
yugon tarun wuɲi,
a neenen xa wase,
a sefe,
sefe moxo sire.
36 Isa da a muuru i maxa nan ti i nan maxa a laxami.
A da a muuru i maxa moxo su,
xa ken do i fi su,
i na talla a laxamini ya.
37 Ken da jaman kaawafi ma a gaa dangini haqen ŋa,
i ti :
« A gollen su siren ya ni.
A wa hari lungunton xa tarun wuɲini,
na muumunton sefendi ! »