[Waxatinun taagumanse]
16
Ken falle,
Farisigankon do Saduukagankon wa a mulla na Isa Alimasiiwu xenpe.
I tinko a yi na a tirindi ti :
« Taagumanse dabari o jon ŋa,
fi be gaa a koyini o yi nan ti Alla ya n da an xayi. »*
2 Isa jaabi nan ti i da :
« {Kiyen ga na ɲi deerin-deerini,
axa na ti lenki wuron wa liŋoono,
baawo kanmun dunben ya ni.
3 Kiyen finna bogunte suxuban xa yi,
kanmun ga na dunbu xoyi fore,
axa na ti lenki kiye nta liŋoono.
Axa ga na kanmun faayi,
axa wa waxatin moxon tuunu.
Fiinu beenu gaa a kanma nan ɲa,
axa nta a tu i yillen gaa karene ti ke be yi.
Ken ni kan moxo ?}¤
4 Axakun seran danbu,
axa bononton ni de !
Ku laayidu bonondaano ku.
Axakun ya na inke tirindini taagumanse yi ?
Annabi Yuunusu xalle ke ma wase taagumanse yi gani ?
»* Isa ga da kundu ko,
a bogu i noxon ŋa nan daga.
[Diinanyinmankon lewiiri]
5 Xaranlenmon ga da fanŋen kutu,
jaxa i mungu na silifanda wutu.
6 I ga kare,
Isa ti i da :
« Xa da du koroosi Farisigankon do Saduukagankon lewiirin ŋa de ! »
7 A ga da ke ko,
xaranlenmon ti me da :
« O do buuru ga ma ri ya ni. »
8 Isa da i sinmayen tu.
A ti i da :
« Axa danqanaaxun roxen ni koyi !
Manne ni axa gaa a sinmana nan ti axa do buuru ga ma ri ya n sigi inke ga da ke sefe ko ?
9 Axa ma faami harisa ?
Axa sinme de,
buuruyinmu karagi ga da wujunu karagi sere baga moxo be.
Ken koota,
kanda fakko manime n toxo ?*
10 Axa sinme do koota be buuruyinmu ɲeri ga da wujunu naxati sere baga.
Ken koota xa yi,
kanda fakko manime n toxo ?*
11 N ga ti axa na du koroosi Farisigankon do Saduukagankon lewiirin ŋa,
axa ma a faamu nan ti in nta do buuru be gaa yigeene gani ? »
12 Ken bire ya ni,
faarun ga da a faamu nan ti Isa nta do lewiiri be gaa roono buurun ŋa.
A ti i na du koroosi Farisigankon do saduukagankon xaranŋundun ya yi.
[Isa Alimasiiwunnaaxu]
13 Ken falle,
Isa kiɲe Kesaariye-filipo ɲiiɲen ŋa.
A da i xaranlenmon tirindi ti :
« Nke be ga ni Seren Renmen ŋa,
seron maxa,
nke ni manne yi de ? »
14 I da a jaabi nan ti :
« Yogonu maxa,
annabi Yahaya ya ni an ŋa.
Yogonu xa maxa,
annabi Hiliyaasu ya ni an ŋa.
Yogonu maxa xadi,
annabi Yirimaahu ya ni an ŋa,
walla annabinyinme tana xa. »
15 Isa jaabi nan ti i da :
« Axakun yinme maxa,
nke ni manne yi de ? »
16 Simoona Piyeeri ti :
« Kisindaana ke ya ni an ŋa,
Alla ŋalinten duran Renme. »
17 Ken sigira Isa jaabi nan ti a da :
« Simoona,
Yohanna renme,
wulluliŋonten ya ni an ŋa,
baawo haadamarenme ma ke tuyindi an ŋa ;
n Faaba kallanken ya n da ke tuyindi an ŋa.
18 Nke wa tini an da Piyeeri,
ken wure ga ni “ Gidindunga ”,
n gaa riini in jaman taaxundi gidindunga ke be kanma.*
Kallen do i kame senbentaaxu,
a ra nta hari baane bakka a maxa.
19 N na Allantunkaaxun xarinlenmun ro an kitten ŋa :
an ga na ke be kaba duna yi,
ken kabanten ya ni Alla noqun ŋa ;
an ga na ke be denindi duna yi,
ken daganten ya ni Alla noqun ŋa. »*
20 Isa da i xaranlenmon kaba a tuyindini seron ŋa ti ike ya ni Kisindaana ke yi.
[Isa faatiyen do a wundiye]
21 Gelli ken waxati,
Isa xenu a xurandini i xaranlenmon da nan ti :
« Waajibin ya ni,
n nan daga Yerusalaamu yi,
xirisun do sadaxakiɲandaananyinmankon do sariyanxaranmoxonun na in yonkin tooro siri na in kari.
N kallen bita sikka,
n na wundi. »
22 Isa ga da ke ko,
Piyeeri do a senbe na a kuralli nan ti a da :
« N Kama,
Alla gan na an kisi ken ŋa,
ken nta ɲaana an ŋa abada ! »
23 Isa tiirinbe katta Piyeeri yi nan ti a da :
« Laato bakka in ŋa,
ke Ibiliisa ke !
An na in da besenxonne ya yi.
Anken yaaxe nta Alla liŋun ŋa ;
an yaaxen na seron ya liŋun ŋa. »
24 Ken falle,
Isa jaabi nan ti i xaranlenmon da :
« Sere be gaa a mulla nan sukke do in ŋa,
an nan kaari an yinme yi,
na an sallibinsollen wutu do du yi,
an na sukke do in ŋa.
25 Baawo sere wo sere gaa a mulla na i yonkin ya kisi,
a wa bonno.
Sere wo sere xa yonkin ga bono do inke ya batten ŋa,
an wa a kitana.
26 Sere be ga na duna muuman su kita tono,
an yonkin ga bono,
ken tono da manne siro an ŋa ?
Sere ra nta fo wo fo ɲaana ke duna,
ken ra gaa a yonkin maxawasana.
27 Ken ya ni,
Seren Renmen do i maliikanun wa riini i Faaba nooron noxon ŋa koota yogo yi,
a gaa be su tugana ti i ɲangollen ŋa ken koota yi.*
28 Tonŋu,
n na a ko axa da :
Ke jama be gaa yere,
axa su nta kalla ma yogonu kun ga da Seren Renmen riyinten wari xoyi Tunkanyugo. »