[Isa Alimasiiwu moxonun yillaye]
17
Bito tunmi dangi falle,
Isa Alimasiiwu da Piyeeri do Yaaxuba do i waaxi Yohanna xiri,
do i baane nan daga gidi gille yogo kanma.
2 I siginto ken noqu yi,
a moxonun yille :
a giyan toxo ɲelunqene xoyi kiye ;
a yiraamun xa xura ma i nan toxo ɲelunqene.*
3 Ma a faayi ke !
Annabi Muusa do annabi Hiliyaasu ga xosi bange i da,
a do i gaa sefene.
4 Piyeeri ti a da :
« Xaranmoxo,
o gaa yere a siro de !
An ga na duŋe,
n na gupu sikki sigindi :
anke baane,
annabi Muusa baane,
annabi Hiliyaasu baane. »
5 Na a toxo sefen ŋa,
xaba nooronte yogo xosi xufi i kanma.
Ma a faayi ke xadi,
sefexanne xa ga giri xaba ke noxon ŋa nan ti :
« Ke ya ni in Ren xana ke yi.
N da a ya xanu ;
n sewonten da a ya sugandi.
Xa da a terinka de ! »*
6 Xaranlenmo ku ga da ke xanne mugu,
kanumaxanburaaxu saabu da,
i da du fitta bipi ɲiiɲen ŋa.
7 Isa tinko i ya na i sooxen saxu i kanma nan ti i da :
« Axa maxa kanu,
axa giri ! »
8 I ga da i yinmun wutu,
i maxa sere tana su wari Isa baane ya ga fe.
9 I yanqanto bakka giden ŋa,
Isa da a xotondi i maxa nan ti :
« Axa ga da ke be wari,
axa maxa a ko sere danŋa de,
ma inke be ga ni Seren Renmen ŋa,
in ga n giri bakka furun naxan ŋa bire be. »
10 Xaranlenmon da a tirindi kuŋa ti :
« Manne saabu da Sariyanxaranmoxonun ga ti annabi Hiliyaasu fina ya n xawa riini ? »*
11 Isa da i jaabi nan ti :
« Tonŋun ya ni,
annabi Hiliyaasu fina ya n xawa riini na fiinun su kurunbaaxu.
12 Xa in na tonŋun ko axa da ti,
annabi Hiliyaasu dalla a ri,
xa i ma a tu.
Fo wo fo ga n liŋa i da,
i da a su ɲaŋi a yi.
Seren Renmen xa na tooran su ya walla i maxa. »
13 Ken bire ya ni xaranlenmon ga da a faamu ti annabi Yahaya be ga ri annabi Hiliyaasu gollen dabari,
a faayi a ya fin koono i da.
[Xenuwatten jaareye]
14 Isa do i faarun ga kiɲe jaman ŋa,
yugo yogo ri tusi a wure nan ti :
15 « Kamanyugo,
hinne in renmen ŋa !
Xenuwatten* gaa a yi,
a ga na a raga,
a wa a toorono moxoburu.
Waxatinu,
a wa xenne hari yinben ŋa ma jin xa.
16 N da a koyi an xaranlenmon ŋa,
xa ikun ma katu a sahandini. »
17 Isa da sefen wutu,
a ti :
« Ku finbonondaano ku,
danqanaaxuntanbalinu ku !
N toqo do axa batten ŋa ma kan bire ?
Axa toqo banbini in ŋa ma kan bire ?
Xa da a riiti katta in ŋa yere. »
18 Isa xiribe jinna ke yi,
a bogu leminen ŋa.
Ken sigira su,
leminen saha.
19 Xaranlenmon do Isa ga fese,
i tinko a yi na a tirindi ti :
« Manne ni oku ga kori jinnan xatana bakka ke lemine yi ? »
20 Isa da i jaabi nan ti i da :
« Axa danqanaaxun ya roxen ni.
Tonŋu,
n na a ko axa da,
axa danqanaaxun ga na kiɲe jaajifunse* lanɲara yi koota su,
axa wa tini ke gide da :
“ Giri an batten ŋa ”,
a gilli ya.
Ayiwa,
fo wo fo ntaxa axa kaaɲana keeta. »
21 ¤[Isa xibaarindinde i faatiyen do i wundiyen ŋa xadi]
(Maarika 9.30-32 ; Luka 9.43b-45)
22 Isa xaranlenmon ga da me ɲi Galiile maran ŋa,
a jaabi i da :
« Inke be ga ni Seren Renmen ŋa,
biren kiɲe i gaa in janbantanloono kittu yi,
23 i wa in karini ;
n kalle bita sikka,
n wa wundini.
» A ga da ke ko,
xaranlenmon suno moxoburu.
[Allanbatikaxooren sagallen tugaye]
24 Isa do i xaranlenmon ga kiɲe Kafarinoomu yi,
sagalliragaanon tinko Piyeeri yi nan ti a da :
« Axa xaranmoxo wa Allanbatikaxooren sagallen* tugana ba ? »
25 Piyeeri ti :
« Yabo,
a wa a tugana ke !
»
A ga ro konpen ŋa,
Isa fina da sefen wutu,
a jaabi nan ti :
« Simoona,
anken sinmaye,
ko do ko n xawa sagallen tugana duna tunkanyugun ŋa ?
I yinme renmu, ma seri kuttu ? »
26 Piyeeri ti a da :
« Seron kuttun ya n xawa a tugana.
» Isa jaabi nan ti :
« Ken kuŋa,
i yinme renmun kun taqen nta a yi de.
27 Ken do i fi su,
kuudo o nan maxa i lasamandi,
goren wutu ;
an na daga xaaren ŋa,
an na a fitta.
Ɲexe fana be ga na an goren wutu,
a raga an na a raqen wuɲi ;
an wa godoxullen ɲiini a yi.
An na a wutu nan daga inke do anken sagallen tuga. »