[Soxaanan masayila]
4
Isa Alimasiiwu da xaranŋundinden kurunbaaxu Galiile xaaranxannen ŋa.
Jama xoore da me ɲi do a kaaron ŋa ma a gaa roono fuure yogo ya noxon ŋa nan taaxu.
Fuuren wa jin kanma ;
jaman wa jinxannen ŋa,
nan taŋe Isa yi.
2 A da fo gabe xaranŋundi i ya ti masayilan ya yi.
A xaranŋundinden noxon ŋa,
a ti i da :
3 « Xa terinke de !
Soxaana yogo daga i ten sanqi.
4 Jaxa a gaa sanqindini,
soxoodin yogo yere killinxannen ŋa.
Yeliŋun ga ri,
i da i sagara na i toni.
5 Fo yere gidinnoqun ŋa.
Kun funtiyen jawo,
baawo doori gabe nta no.
6 Xa,
kiyen tewoyen da i xurumindi,
baawo i ɲiimun ma katu laatono.
7 Soxoodinu ku yogo yere saasinbadagun noxon ŋa.
Xa,
badagun ga xooro i da i bitta ma i nan kori saarene.
8 Fo tananu yere soxoɲiiɲa siren ŋa,
i bogu nan xooro,
nan funsu siri.
Noqu yogo da i me tanjikke bagandi ;
noqu,
tandunme ;
noqu,
kame. »
9 A ti i da kuŋa :
« Taro gaa sere be yi,
a nan terinke de ! »
[Isa masayilanun koni maana]
10 A do i faarun tanmi do fillo,
kafiini sero beenu gaa do a yi ga baanaaxu,
i da a tirindi masayilanu ku wure yi.
11 A ti i da :
« Allantunkaaxun gundon kini axakun ya yi.
Xa,
sere ke kutten na fo wo fo mukku ti masayilan ya yi,
12 kuudo :
yaaxon wa i ya,
i gaa faayindini,
xa i nta warini ;
tarun wa i ya,
i gaa terinkene,
xa i nta mugini.
Ken ga n maxa fe,
i na du rasaaga katta Alla yi,
a na yanpa i maxa. »*
[Isa masayilan wure konŋe]
13 Isa ti i da :
« Axa ma katu ke masayila faamunu,
axa katta masayila kuttun faamunu kan moxo ?
14 “ Soxaana ” :
ken ni sere be gaa Alla Digaamen ya sanqini.
15 “ Killinxanne ke soxoodinu ” :
ken ni sero ku beenu gaa Alla Digaamen mukku ya,
xa,
ken sigira su yi,
Ibiliisa na ri a xiili bakka i sondomun ŋa.
16 “ Gidinnoqu ke soxoodinu ” :
ken ni sero ku be ga n jawo Alla Digaamen mukku ya nan duŋe a yi ti ɲaxaliye yi,
17 xa,
i xa ra nta sabatini,
baawo ɲiime nta i ya.
Xotoye ma toora ga na i kita do Alla Digaamen ŋa,
danqanaaxun na xosi duguta i ya.
18 “ Saasinbadagu ku soxoodinu ” :
ken xa ni sero ku be gaa Alla Digaamen mukku ya,
19 xa dunadunhanminun saabu da,
kun ga ni naaburunjaarabe,
do fo wo fo kitayen natan ŋa,
Alla Digaamen na lanpu i maxa,
a ntaxa fo wo fo sirono i ya.
20 Sero ku be gaa Alla Digaamen mukku na a faamu nan golli ti a yi,
ken ni soxoɲiiɲa sire ke soxoodinun ya,
a ga siro.
Noqu yogo da i me tanjikke bagandi,
noqu tandunme,
noqu kame. »
[Lanpan masayila]
21 A da ke xa ko i da ti :
« Xoyi sere wa lanpa kumunte roono xolle wure yi ba ?
Ma na a ro xaraxa wure ?
A nan xawa taaxunu lanpanjongaaden ya kanma de.
22 Fo muxunten su na wari xurayen ŋa.
Fo wo fo gaa gundon ya yi,
ma a ga ri bange kiiranxullen ŋa.
23 Taro gaa sere be yi,
a nan terinke de !
24 « Xa maxa mungu de !
Axa ga xensendi ti muude ke be yi,
Alla na axa xensene ti ken muude ya yi,
nan yille axa kuunu fo gabe yi.
25 Fo gaa sere be maxa,
ma fo ga kafi ken kaman maxa.
Xa,
fo ga nta sere be maxa,
hari fonne ke be gaa a maxa,
ma ken ga ri boosi a yi. »
[Soxoodin masayila]
26 A da ke xa ko nan ti :
« Allantunkaaxun na xoyi yugo yogo ya a ga da i ten sanqi :
27 a gaa wuro su xenqene nan yillakare,
soxofon xa wa funtini nan tallan xooro,
a yinme nta hari a tu ken gaa ɲaana moxo be yi.
28 Soxofon na funti ti du yi,
nan xooro nan gunda ma a ga kare.
29 A ga na moyi tan,
teegumen na fete,
baawo sanjaanen kiɲe. »
[Dindifunsen masayila]
30 A sukke do sefen nan ti :
« O katta Allantunkaaxun do manne baanondini ?
O na a koono ti kan masayila yi ?
31 Allantunkaaxun na xoyi dindifunsen ya yi,
a ga n roxa diinanta duna soxofo ke su soxoodin ŋa.
32 Xa,
a tifi falle,
a na funti nan xooro diinanta naaxonsoxofon su yi.
A kingun na xooro hari yeliŋun ra gaa i sonkon dabarini i ya. »
33 Isa ɲi masayilanun gabun ya koono seron da na a gemundi i faamuyen ŋa.
34 A ɲi masayilan baane ya koono i da,
xa,
a do i xaranlenmon ga na fese,
a na a su wure koni i da.
[Dundon siginde]
35 Ken koota baane futuro,
Isa ti i xaranlenmon da :
« Xa ri o n kare. »
36 I girinto jaman ŋa,
Isa gaa fuure be yi,
a xaranlenmon da a karandi ti ken fuure ya yi.
Fuuru tana wa do a batte.
37 Fanka xoore xosi giri,
banbuusen wa fuuren lipana.
Jin toxo roono fuuren ŋa ma a gaa ɲaana xoyi a gaa a fakka.
38 Ken bire Isa wa xenqene fuuren falle,
a yinmen wa yinjogaaden kanma.
A xaranlenmon da a wundu nan ti a da :
« Xaranmoxo,
an saqa ya o gaa kalla ? »
39 Isa giri nan doxo fanken ŋa,
nan ti jin da :
« Kuuru !
An nan mulo !
» Fanken xosi sigi,
noqun su mulo lewu.
40 Ken falle,
Isa ti i xaranlenmo ku da :
« Axa kanna manne yi de ?
Manne ni danqanaaxu ga nta axa yi harisa ? »
41 I tallan kanu,
i ti me da :
« Manne seran danbe ni ke yugo yi ?
Hari fanken do jin xa gaa a ɲaamariyen batta ! »