[Tuumayinkootan jaareye]
3
Isa Alimasiiwu ro allanxarankan noxon ŋa xadi na yugu kittikaawante yogo ɲi no.
2 Seron wa a kanma na Isa koroosi selli a gaa yugo ke sahandini Tuumayinkootan ŋa,
ma i na jalagindimaana kita a yi.
3 Isa ti yugu kittikaawante ke da :
« Giri,
an nan sigi seron naxa ! »
4 Ken falle,
a da jaman tirindi ti :
« Tuumayinkootan ŋa,
fisiriɲanŋen ya daganten ni ba,
ma fiburiɲanŋen ya daganten ni ?
Na yonkin kisi,
ken ya daganten ni ba,
ma na a wara bonno ya daganten ni ?
» Xa,
sere ma ti hari « n ti ».
5 Isa toxo a su butuntanfaayini baane-baane,
a butten bononte na a sababun ɲa i sondonkaawantaaxun ŋa.
A ti yugon da :
« An kitten fuutu !
» A ga da a fuutu,
a xosi saha.
6 Ken sigira su,
Farisigankon bogu allanxarankan ŋa.
I do Heroodi seron da me wari i ra gaa Isa karini moxo be.
[Isa do jama]
7 Isa do i xaranlenmon bogu nan daga Galiile xaaranxannen ŋa,
jama xoore sukke do i ya nan giri Galiile do Yehuuda,
8 ken do Yerusalaamu do Yiidume.
Yogonu xa giri jamaane be gaa Yarade kaara baanen ŋa,
ken do Sooro do Sidooni fonkaaradundebu.
Ke jama xoore da Isa sagata,
na a sababun ɲa i ga da a ɲangollu be ya mugu.
9 Isa ti i xaranlenmon da,
i na fuure yogo moxo sirondi i da,
kuudo jaman na waase i tooɲini.
10 Xoyi a ga da seri gabe sahandi nan xaso,
jangiranten su da a soobe katta a yi kuudo i na kati a yi.
11 Jinnan gaa sero be yi,
i ga na Isa wari,
i na tusi a jon ŋa nan xaaru ti :
« Allanlenmen ya ni an ŋa ! »
12 Xa,
a ɲi a xotondini i maxa siri nan ti sere su n maxa a ko i ga ni ke be yi.
[Faarun tanmi do fillo sugandiye]
13 Ken falle,
Isa sege giden kanma,
a ga ɲi sero be mundunu,
a da i xiri.
I daga katta a yi.
14 A da sero tanmi do fillo sugandi na kun ɲa¤ faaru yi,
na i ɲa teranlenmo,
a gaa i xayini i nan daga waajundi.
15 A da jinnan xatanden senben¤ xa kini i ya.
16 Isa ga da sero tanmi do fillo be sugandi,
i toxonun faayi :
Simoona,
Isa da a xiri « Piyeeri »,
17 Sebede renmun filli Yaaxuba do i waaxi Yohanna,
Isa da kun xiri « Bonarigeesi »,
ken wure ga ni « Sero beenu moxon gaa xoyi kanmen direye »,
18 kafiini Handere,
Filipu,
Baritoloome,
Mace,
Tooma,
Haalife renme Yaaxuba,
Taade,
Simoona,
i gaa aken xilli « Faabankan maxawasandaana »,
19 a do Yehuuda Hisikarooti,
ken ya n da Isa janba.
[Allanfi ma jinnanfi]
20 Isa ga daga kan ŋa,
jaman da me ɲi xadi ma a do i xaranlenmon nan konto yigemoxo kitana.
21 Isa kaadunkon ga da ken mugu,
i giri ti i wa dagana a raga,
baawo ikun maxa,
a haqilen ya n bono.¤
22 Sariyanxaranmoxonu be ga giri Yerusalaamu,
i ti :
« Ibiliisa¤ ya na a yi,
baawo a na jinnan xatana ti jinnanxirisen toxon ya yi. »
23 Isa da i xiri na golle ke moxon ko i da ti masayilan ŋa nan ti :
« Ibiliisa katta Ibiliisa xatana kan moxo ?
24 Tunkaaxu wo tunkaaxu ga taxandi,
ken tunkaaxu nta sabatini.
25 Ka wo ka ga taxandi,
ken ka nta sabatini.
26 Ibiliisa ga na du gaja na du booxo,
a ra nta sabatini !
A tunkaaxu wa ɲamene xa mene.
27 Ken moxo ya ni,
sere su ra nta roono Ibiliisa me senbente kan ŋa na a kittidufoonun xaaxa,
an ga ma a siiti ya fina.
Ken bire,
an na katu a kan karana pewu. »
28 Isa ti i da :
« Tonŋu,
n na a ko axa da,
seren ga da junuubu do toxonbononde su ɲa Alla yi,
ken wa xafarini.
29 Xa,
sere wo sere ga na Alla Fanka Sennen ya toxon bonondi,
xafariyen nta ɲaana ken kama da abada ;
ken ɲaana abada-abadan junuubun ya yi. »
30 Isa sefe i da kundu yi,
na a sababun ɲa i ga ti :
« Jinnan ya na a yi. »
[Isa maaren soobo]
31 Isa ma do a waaxinun ri,
i sigi ganlaqen ŋa,
na sere wara dagana a xiri.
32 Ken da a ɲi Isa taaxunten wa jama xoore noxon ŋa.
Yogo ti a da :
« Ayiwa,
an ma do an waaxinun faayi ke sellan ŋa,
i gaa an muurunu. »
33 A ti i da :
« N ma do in waaxinun ni koonu yi ? »
34 Ayiwa,
a da jama ke faayi do i kaaron ŋa baane baane nan ti :
« N ma do in waaxinun faayi ku ya yi,
35 na a sababun ɲa sere wo sere gaa Alla sagon ɲaana,
ken ya ni in ma,
ken ya ni in maaren yugo,
ken ya ni in maaren yaxare. »