11
Isa Alimasiiwu ga duguta i xaranlenmon tanmi do fillon xaranŋunden ŋa bire be,
a giri no nan daga xaranŋundindi do fonkaaradundebun ŋa nan waajundi.
[Annabi Yahaya xaranlenmon xayiye Isa Alimasiiwu yi]
2 Ayiwa,
na annabi Yahaya toxo kason ŋa,
a da Kisindaanan golliɲaŋunton mugu.
A da i xaranlenmon yogonu xayi a yi
3 na a tirindi ti :
« Sere ke be gaa riini,
an ya ni ken ŋa ba,
ma o nan xawa sere tana ya dukku ? »
4 Isa ti i da :
« Axa ga da ke be mugu na a wari,
xa daga ken ko Yahaya da :
5 finkinton yaaxon wa wuɲiini,
muruxunton wa terene,
fatanwattiburugumun wa senoono,
lungunton wa mugini,
furun wa wundiini,
Xibaari Liŋen xa wa koniini misikiinun da.*
6 Seren ya n wulluliŋontaaxu,
ke be danqanaaxu ga ma bono ti inke yi ! »
7 Yahaya xaranlenmon daga falle,
Isa xenu sefen ŋa keeta,
a gaa a maxankutunu jaman da nan ti :
« Axa daga manne faayi gunnen ŋa ?
Fanken gaa sokkitiŋe yonkono ba ?
8 Aayi !
Axa daga yugo yogo ya faayi dakkabanan yiraamun gaa a yi ba ?
Dakkabananyiraanrondaanon kun xa na tunkankaanun ya yi de.
9 Axa daga manne xa faayi kuŋa ?
Annabinyinme ba ?
Yabo,
annabinyinmen ya ni.
Xa,
n na a ko axa da ti,
Yahaya n xoora annabinyinme yi.
10 A ya xibaaren nan sefe Safandi Sennun ŋa nan ti :
“ Terinke !
N faayi in faaren denne an kaane,
a na an killen sirondi an kaane.* ”
11 « Tonŋu,
n na a ko axa da :
yaxare su ma Yahaya me saara.
Ken do i fi su,
Allantunkaaxun ŋa,
ku beenu ga ni seron su seri maxayanqanton ŋa,
kun ya n wuruginta Yahaya yi.
12 Na a wutu Yahaya kiye nan ri a wara saasa,
Allantunkaaxun na i kaane ya maxa,
duruxotonton ya na a kitta.¤
13 Annabi Muusa Sariyan do annabinyinmun su,
nan ri a wara Yahaya yi,
i sefe Allantunkaaxun fin kanma.
14 Selli axa ga na a faamu,
i ga da annabi Hiliyaasu ke be riyen fin ko,
Yahaya ya ni.
15 Taro gaa sere be yi,
a nan terinke de !
16 « N na ku seran danbu do ko katta me yi ?
I na xoyi leminun ya yi i gaa taaxunu sangaberan ŋa,
i yogonu gaa tini kuttun da :
17 “ O da danŋun tinmi axa yi,
axa ma rege !
O da saŋa buren kara axa yi ti suugen ŋa,
axa ma wu. ”
18 Ken ya ni,
Yahaya ga ri,
a ɲi suumini,
a ma ɲi fo minni ji ga fe,
i ti :
“ Jinnan ya na a yi ! ”
19 Nke be ga ni Seren Renmen ŋa,
n ga ri,
n gaa yigeene,
n gaa minni,
axa ti :
“ Ke yugo menjanŋun ga ni sagalliragaanon do junuubuɲaŋaanon ya yi,
yiganfaren do minnanfaren ya ni.
”* Xa Alla fontuwaaxu gaa riini saare ti gollu be,
a teleŋontaaxun bangeene ti ken ya yi. »
[Debu yogonu balle tuubiyen ŋa]
20 Isa ga da kaawafi xooron dabari debu be yi,
a saage i jalagini na a sababun ɲa i ga bara tuubini.
21 A ti :
« Bone wa an da Xoraaji !¤
Bone wa an da Beeti-saayida !
Baawo kaawafiinu be ga ɲaŋi axa yi,
i gan ɲaŋi Sooro do Sidooni ya yi,
ganpi i da i jikkunun faraaxu,
na booto xason ɲa yiraamu yi,
na xamanxullen joxi i faton ŋa,
ken gaa i jikkunun faraaxiyen koyini.*
22 Tonŋu,
n na a ko axa da ti :
kiiten koota,
Sooro do Sidooni,
kun debu kiiten wa newono diinanta axa yi.
23 Anken Kafarinoomu xa,
an da a sinma an wa wurugini ma kanxotten ŋa ya ba ?
Aayi !
An yanqana ya ma Jahannaba tinŋe !
Baawo kaawafiinu beenu ga ɲaŋi an noxon ŋa,
kun gan ɲa Sodoomu ya,
a ɲi toqo bireene ma lenki.*
24 Ken ya ni,
n na a ko axa da ti :
kiiten koota,
Luutigankon debun kiiten wa newono diinanta an ŋa. »
[Isa Faaba tiigande]
25 Ken bire Isa da sefen wutu nan ti :
« N wa an tiigana,
n Faaba,
kanmun do ɲiiɲen Kama,
an ga da ku fiinu muxundi haqilaxoorogumun do tuwaana xooron ŋa,
na i tuyindi leminan lamaanun ŋa.*
26 Yabo,
n Faaba,
ke moxo ya n liŋa an da.
27 N Faaba da fo wo fo su ya kini in ŋa :
sere su nta Renmen tu Faaben ga fe ;
sere su xa nta Faaben tu Renmen ga fe,
a do Renmen ga na a tuyindi sere be yi.
[Laxafiya]