Luka 20

[Isa Alimasiiwu ɲaamariyen tirindiye]

(Mace 21.23-27 ; Maarika 11.27-33)

Koota yogo yi, na Isa Alimasiiwu toxo seron xaranŋundini Allanbatikaxooren tagayen noxon ŋa, a gaa gangunu, , , kafiini jaman xirisun ŋa, i ri katta a yi, 2 nan ti a da : « O wa an tirindini : an gaa ku gollu be dabarini, an na i dabarini ti kan ɲaamariye yi ? Ko n da ken ɲaamariye kini an ŋa ? » 3 Isa ti i da : « Nke xa wa axa tirindini : 4 Yahaya wanqinde ke giri ko yi, Alla ya ni, ma seron ya ni ? » 5 I yinmenu duurun da me tirindi, a falle i ti : « O ga na ti a giri Alla ya yi, a tini ya : “ Manne saabu da axa ga ma toŋondi ti a yi ? ” 6 Xa, o ga na ti a giri seron xa ya yi, seron su wa gullan sedde o yi na o kari, baawo i saxunten wa a yi ti Yahaya ni ya yi. » 7 Ken kuŋa, i ti Isa da : « O nta a tu. » 8 Isa xa ti i da : « Ayiwa in xa gaa ku gollu dabarini ti ɲaamariye be, n nta a koono axa da. »

[Reese soxaana burun masayila]

(Mace 21.33-46 ; Maarika 12.1-12)

9 Ken falle, Isa da ke ko seron da, a ti : « Yugo yogo da lori i ten ŋa na golliɲaŋaanon yogo kafu du yi na te ke toxo i maxa nan daga terendi laate yi. 10 Reesen ga moyi, a da i komen xayi ti i na i taqi reesen kini a yi. Golliɲaŋaanon da kome ke raga na a katu, na a kitti duurun wara telle. 11 Yugo ke yille i kome tana xayini. Xa, golliɲaŋaanon da a xa raga na a katu, na a ka, na a kitti duurun wara telle. 12 A da seri sikkandi xa xayi ; i da a xa katu, na a leebu, na a sedi ten falle. 13 Teegume ke ti : “ N na manne ɲa keeta ? N wa in ren xanan xayini katta i ya. A me wa a du i na danka toxo in renmen ken ken ŋa. ” 14 Xa golliɲaŋaanon ga da ken xa wari, i ti me da : “ Ayiwa, Ke ya n riini a xayen wutu. O na a kari, ten na ɲa o xalle yi. ” 15 I da a bagandi reesenten falle na a kari. » Isa ti : « Ayiwa, teegume ke nan xawa manne ɲaana ku golliɲaŋaano yi ? 16 A riini i kari ya, na reesente ke kini sere tananu yi. » Seron ga da ken sefe mugu, i ti : « Ken gan nta ɲa ! » 17 Isa da i yaaxon tonto jaman ŋa, a ti : « Ke masayila gaa Jabuuri noxon ŋa, a wure ni manne ? Ken ga ni :

“ Tagandaanon ga bara tuufa ke be yi,

ken ya n xosi ɲa gonbontuufan ŋa. ”

18 « Sere wo sere ga na xenu ke tuufa kanma, a kaman xottun su wa xoseene ; ke tuufa xa ga na xenu sere wo sere kanma, a kaman wa lopiini. » 19 Sariyanxaranmoxonu ku do sadaxakiɲandaananyinmanko ku ɲi a mulla Isa nan rage ken sigira yi, baawo i ɲi a tu ti a da masayila ke ko na i ya xeetu. Xa i kanu seron ya yi.

[Kesaari sagallitugaye]

(Mace 22.15-22 ; Maarika 12.13-17)

20 Ken ya ni, i da a ɲa Isa koroosinden ŋa keeta. I da janbanto yogonu xayi katta a yi, i ga da du ɲa sere soobo yi, na a tirindi ma sefe wa bakka a raqen ŋa, fo be ga ma gemu i ya ; ken na ɲa sababu yi, i na a ro Roomu maran yinmanken kitten ŋa. 21 Sero ku da a tirindi nan ti : « Xaranmoxo, an gaa fo be koono, a do an gaa fo be xaranŋundini seron ŋa, o wa a tu nan ti tonŋun ya ni : an nta sere yaaxe faayini, an wa Alla killen tonŋun xaranŋundini. 22 O wa an tirindini : yaala a daganten ya ni, o na sagallen tuga Roomu tunkanyugo Kesaari yi ba, ma o nta xawa a tugana ? » 23 Xa, Isa da i gotontaaxun faamu, a ti i da : 24 « Xa da godoxullu baane koyi in ŋa. » I ga da gode ke koyi a yi, a ti i da : « Ko toxo do ko sawura na ke gode kanma ? » I ti a da : « Kesaari ya ni. » 25 Isa ti i da : « Ken kuŋa, Kesaari xallen ga ni ke be yi, xa da ken kini Kesaari yi ; Alla xallen ga ni ke be yi, xa na ken kini Alla yi. » 26 A ga da fo wo fo ko jaman yaaxon ŋa, i ma jalagindira kita a yi a digaamun noxon ŋa. I du kaawa a sefon ŋa ya nan kuuru.

[Saduukagankon jalatukke Isa kaane]

(Mace 22.23-33 ; Maarika 12.18-27)

27 , ku be gaa kallen falle wundiyen nakkarini, i dantanto ri katta Isa yi na a tirindi ti : 28 « Xaranmoxo, a safanten wa annabi ŋa nan ti :

“ Yugo be ga na kara, a ga ma renme kita, a kaman waaxin na a yaqen saagandi kuudo kallaanan na bonsonŋe kita. ”

29 « Ayiwa, waaxinu ɲeri ya ni : fanan yaxi nan kara, a ma renme kita. 30 Fillanden da i waaxi ke yaqen saagandi. 31 A xa ga kara, sikkanden da yaxare ke saagandi ; kundun kundun ya ni, ma waaxi ɲerundin xa gaa kalla, a ma renme kita. 32 Waaxinu ku su kara falle, yaxare ke xa ri kara. 33 Ayiwa, wundiyen koota wo, yaxare ke ɲaana ko baane xalle yi ? Baawo i ɲeri su da a yaxi ya. » 34 Isa ti i da : « Duna yere ya ni, yugun gaa yaxarun yaxini, yaxarun gaa yaxiini yugun ŋa. 35 Sero beenu do wundiyen ga n xawa Laahara, i toqo yaxanbalinu ya yi. 36 I ntaxa kalla xadi, baawo i ɲaana xoyi maliikanun moxon ya. I ɲaana allanlenmun ya yi, baawo xunbane renmun ya ni. 37 Muusa da wundiyen ko na a xurandi noqu be a ga da badagi kumunten fin ko : a ga da xiri nan ti :

“ Ibirahiima do Isiyaaxa do Yaaxuba Alla. ”

38 « Ken kuŋa, Alla feti furun Alla yi, ŋalinton ya Alla ni. Ke wa a koyini ti i ŋalinton ya ni Alla maxa. » 39 Sariyanxaranmoxonu yogonu jaabi, i ti : « Xaranmoxo, an digaamun siro. » 40 I maxa saako na a tirindi xadi.

[Kisindaanan do Tunka Daawuda]

(Mace 22.41-46 ; Maarika 12.35-37a)

41 Isa ti i da : « Seron katta tini kan moxo nan ti ni tunka Daawuda renmen ya yi ? 42 Baawo Daawuda yinme da a ko noxon ŋa nan ti :

“ Tunka Duumanten ti in Kamanyugon da :

‘ Taaxu in tayen ŋa, taaxura sugandinte,

43 ma in ga n da an xonnon ro an taanun wure. ’ ”

44 « Ken kuŋa, Daawuda gaa Kisindaanan xilli : “ Kamanyugo ” : ken ɲaana Daawuda renmen ŋa kan moxo xa yi ? »

[Dutangaye sariyanxaranmoxonun ŋa]

(Mace 23.1-36 ; Maarika 12.37b-40)

45 A su gaa Isa terinkanden noxon ŋa, a ti i xaranlenmon da : 46 « Xa da sariyanxaranmoxonun wari de ! Ikun na dorokoxooraronden ya mulla, do a nan yaala ; i wa a mulla seron na i darontankuuɲi do beddun ŋa. I ga na ɲi noxon ŋa, i taaxunu sapa kaanankon ya yi. I ga na i xiri yigeyen ŋa noqu be, i dagana taaxu serixoorantaaxuranun ya yi. 47 Ikun ya na kiinakariidonun naaburen su yigana, i na yille allanbatiyi dallanten dabarini. Ken du ya ni i yanganxatan tallan xoorondini. »