Luka 19

[Isa Alimasiiwu yanqaye Sakke kan ŋa]

Isa Alimasiiwu ri deben ŋa, nan bogu ti a noxon ŋa. 2 Yugo yogo ɲi ken debe yi, a toxon ya ni Sakke. Ayiwa, Sakke ni ya yi, bannan xa ya ni. 3 A ɲi a mulla na Isa wari, na a tu a ga ni sere be yi. Xa a defoyen saabu da, a ra ma ɲi Isa walla jaman maxa. 4 Ken saabu da, a wuru dagana jaman kaane nan sege yitte yogo yi, a gaa xo turo, kuudo Isa danginten ŋa, i na a wari.

5 Isa ga joofe Sakke jonkonmen ŋa, a da i yinmen wutu kanmun ŋa nan ti Sakke da : « Sakke, yanqa kuruma baawo lenki in dagana yanqa an kan ya yi. » 6 Sakke da a jawondi yanqana a ɲaxalinta xoore na a bisimilla siri. 7 Sero beenu ga da ken wari, i toxo a bexebeqe nan ti : « Ke yugo xa ga daga yanqa junuubuɲaŋaanan ya banŋe ! »

8 Sakke giri nan sigi nan ti Kamanyugo da : « Ayiwa Kamanyugo, n wa in naaburen taxanden kinni misikiinun ŋa ; selli a ga na ɲi in ga da sere be xaalisin raga a yi nanbara kanma, n na xaalisi ke me naxato saaga a kaman ŋa. » 9 Isa ti a da : « Kisiyen ro ke ka yi lenki, baawo Ibirahiima bonsonŋen yinme ya ni an ŋa. 10 Nke be ga ni ŋa, n xa ri seri sankunton ya muuru na i kisi. »

[Xaalisin masayila]

(Mace 25.14-30)

11 I ga tinko yi, seron gaa Isa terinkanden noxon ŋa, a da yogo ko i da xadi baawo seron su da a sinma nan ti ke xosini bangeene i da ya. 12 Ayiwa, a ti : « Tunkanlenme yogo daga jaman laate yogo yi, kuudo tunkanyugu xooren na i toorindi i na saage katta i jamaanen ŋa. 13 Saado a gaa telle, a da i komon tanmi xiri na wujune deniye kini baane su yi nan ti i da : “ Xa da julaaxun dabari ti ke xaalisi yi katta in gaa riini. ” 14 Xa, xonnaaxun ɲi a kaarankon maxa katta a yi ; i da seron xayi a daga falle, ti i nan daga a ko tunkanyugu xooren da ti i nta a mulla a nan toori i yinmen ŋa. 15 Xa ken do i moxo su, a ɲaŋi tunkanyugon ŋa nan saage katta i jamaanen ŋa.

« A ga ri, a ga ɲi ga da naaburen kini i komo ku beenu yi, a ti i na i xiri katta i ya, xaalisinun ga da fo be rondi, i na ken ko i da. 16 Komo fanan ri sigi nan ti : “ Kamanyugo, an ga da haqe be kini in ŋa, n da a me tanmu kita a kanma. ” 17 Tunkanyugon ti a da : “ Ken siro, komo sire ya ni an ŋa : an ɲa duntenŋen ŋa fi roxen ŋa, ken kuŋa, n da an ɲa debu tanmi yinmanken ŋa. ” 18 Fillanden xa ri sigi nan ti : “ Kamanyugo, an ga da haqe be kini in ŋa, n da a me karago kita a kanma. ” 19 Tunkanyugon ti a da : “ N da an xa ɲa debu karagi yinmanken ŋa. ” 20 Sikkanden xa ri sigi nan ti : “ Kamanyugo, an naaburen faayi ke : n ɲi ga da a fanama yiraamen ya noxon ŋa na a mara. 21 N wa kanna an ŋa, baawo sere be ga ni an ŋa, an xibaaren xoten ya ni. An na fo ya wuttu fo be ga feti an xalle yi ; an na te ya fatana an ga ma te be tifi. ” 22 Tunkanyugon ti a da : “ Ke komo lenbure ke ! N wa an kiitini ti an yinme diganxannun ŋa. An ga ɲi a tu ti in xibaare xoten ya ni, nan ti in na fo ya wuttu fo be ga feti in xalle yi, n na te ya fatana in ga ma te be tifi. 23 Ayiwa, manne xa n sigi an ga ma daga in naaburen wara xaalisingolliɲaŋaanon banŋe, n na a ɲi a ga da tonon saxu du kanma ? ” 24 Ken falle, a ti sero ku beenu ga ɲi non ŋa da : “ Xa da a naabure ke raga a yi, na a kini tanmugume ke yi. ” 25 {I ti a da : “ Kamanyugo, ke naabure me tanmu wa a maxa nan xaso ! ”} 26 A ti : “ N wa a koono axa da : fo gaa sere be maxa, fo tana wa kafiina a kaman maxa ; fo ga nta sere be xa maxa, hari fonne be gaa a kaman maxa, ken wa boosini a yi. 27 Ayiwa, n xonno ku beenu ga ma a xanu in nan ɲa i da tunkanyugo yi, xa da i raga na i riiti yere, axa na i kari in yaaxon ŋa. ” »

[Isa koyi lagare : a rageye, a kiitiyen do a gengende do sallibinsollen ŋa]

(19.28-23.56)

[Isa kiɲeye Yerusalaamu yi]

(Mace 21.1-9 ; Maarika 11.1-10)

28 Isa ga da ku sefo ko nan duguta, a ware jaman kaane nan sege katta Yerusalaamu yi. 29 Ayiwa, i ga tinko do yi, kun gaa gide yogo kaaran ŋa, i gaa ke be xilli «  », a da i xaranlenmo filli xayi 30 nan ti i da : « Debe ke be gaa taŋeene o yi, xa daga non ŋa. Axa ga na joofe, axa wa farinlenme yogo walla a gaa siitiini ; sere ma setu a yi abada. Axa na a wasa, axa do a na ri. 31 Selli sere be ga na axa tirindi ti : “ Manne saabu da axa gaa a wasana ? ” Axa na ti a kaman da : “ Kamanen ya haajun nan kiɲe a yi. ” »

32 Xaranlenmo ku filli daga na fiinun ɲi xo Isa ga da a ko i da moxo be. 33 I gaa farinlenme ke wasana, farigumun ti i da : « Manne saabu da axa gaa ke farinlenme wasana ? » 34 Xaranlenmo ku ti i da : « Kamanen ya haajun nan kiɲe a yi. » 35 I do farinlenme ke daga katta Isa yi. I da i yiraamun ɲa japu yi na Isa setundi a kanma.

36 I gaa killen ŋa telle, seron xa wa i yiraamun boyini Isa kaane do killen ŋa. 37 I ga tinko Yerusalaamu yi, i ga joofe Jayituunangiden yanqandan ŋa, a xaranlenmon jaman ɲaxalinta xooron da a ɲa Alla tiigeyen ŋa, i xanxoore, na a sababun ɲa Isa ga da kaawafiinu beenu ɲa waritiyaaxen ŋa. 38 I ti :

« Tunka Duumanten gan na bareke ro tunka ke be gaa riini ti a toxon ŋa.

Hari na horoma ɲa kanxotten ŋa.

Wurugintaaxun wa Alla da kanmun di ! »

39  dantanto ɲi jama ke noxon ŋa, i ti Isa da : « Xaranmoxo, a ko an xaranlenmon da ti i nan kuuru. » 40 Isa da i jaabi nan ti : « N wa a koono axa da, nan ti ikun ga na kuuru su, gidun ya n wurugene. »

[Isa wuye do Yerusalaamu yi]

41 I ga tinko Yerusalaamu yi, Isa ga da deben wari, a wu nan ti : 42 « Ee Yerusalaamunko, yaala axa gan na a tu lenki koota ke, fo be gaa xeerin kinni axa yi ! Xa ken toxo axa da biten ŋa keeta ! 43 Baawo koota wa riini axa yi, axa xonnon gaa axa raqen ragana, na axa yoori ti tagayi xooron ŋa, kuudo i gaa axa niyini moxo be, na axa liixi kaara wo kaara yi. 44 I wa axa deben karana na axa seron su halaki ; i nta hari gidi baane toqo gidi baane kanma, baawo Alla ga da a xanu na axa deema waxati be yi, axa ma a jaate. »

[Isa roye Allanbatikaxooren noxon ŋa]

(Mace 21.12-13 ; Maarika 11.15-17 ; Yohanna 2.13-17)

45 Isa ro Allanbatikaxooren tagayen noxon ŋa na gaagaanon xata bakka sellan ŋa, 46 nan ti i da : « A safanten wa Safandi Sennun ŋa nan ti :

“ N kan ɲaana allanbatikan ya yi. ”

« Xa, axakun da a ɲa fayaanon da muxura yi. »

47 Koota su, a wa seron xaranŋundini Allanbatikaxooren noxon ŋa. do do jamaanen yinmankon da feera muuru i gaa a faatindini moxo be. 48 Xa, i ma katu na fo wo fo ɲaŋi a yi, baawo a digaamun wa roono sere ke su yonkin ŋa.