[Yaxannun tanmi masayila]
25
Ken falle,
Isa Alimasiiwu da masayila tana ko nan ti :
« Allantunkaaxun gaa xoyi ke be yi,
ken ni yaxannu tanmi yogo ya yi,
i ga da i lanpanun wutu ti i wa telle gemu maaɲuyugon ŋa.
2 Karago wa i ya,
kun gotonton ya ni,
xa karago baane ke ma goto.
3 I su ga da i lanpanun wutu,
ku be gotonto ga fe,
kun ma te wutu do du yi,
4 xa gotonton kun da ten wutu do du yi gubunlenmun ŋa.
5 Maaɲuyugon ga leele riini,
xenqon da yaxannu ku su wutu.
6 « Wuron ga xaso,
xaaruye yogo xosi bange nan ti :
“ Maaɲuyugon faayi !
Xa bogu !
Xa na a gemundi ! ”
7 I su giri na i lanpanun moxosirondi.
8 Yaxannu ku be ga ma goto,
i ti gotonton da :
“ Axa ga ma o ku te,
o lanpanun faayi kalla de ! ”
9 Yaxannan gotonto ku xa ti i da :
“ O te ke ra nta o do axa bakka koyi,
axa daga julaanun ya banŋe,
axa na fo xobo. ”
10 I ga daga teexobe,
maaɲuyugon sooxi i falle.
Ku be moxosironton ga ni,
i do maaɲuyugon ro ɲaxannoqun ŋa na fonlaqen texe.
11 « Ken falle,
ku be ga daga teexobe,
i xa ri sigi fonlaqen ŋa,
i do a wa me yi :
“ Kamanyugo,
he kamanyugo !
Fonlaqen wuɲi o n ro. ”
12 Xa maaɲuyugon ti i da :
“ Tonŋu,
n na a ko axa da,
n nta axa tu de !
” »
13 Isa ti i xaranlenmon da kuŋa :
« Ken saabu da,
xa da du koroosi,
baawo axa nta koota ke tu,
sakkati sanne ke. »
[Golliɲaŋaanon sikki masayila]
14-15 Isa ti :
« Allantunkaaxun gaa xoyi ke be xadi :
yugo yogo ya ni,
a gaa telle tere,
a da i komo yugun sikki xiri,
baane su do naabure be ga n xawa,
a da ken xaliifa an ŋa.
A da muudu karagi kanŋe kini baanen ŋa,
na fillo kini baanen ŋa,
na baane kini i seri sikkandin ŋa.
Ken falle a daga i terenden ŋa.
16 A ga da muudu karagi kanŋe kini ke be yi,
ken xosi jaagunden jopa ti i xallen ŋa,
na a me fillo kita.
17 A ga da muudu filli kini ke be xa yi,
a xa da ken me jaagu ya ɲa ;
a da a dunfillon kita.
18 Xa,
a ga da muudi baane kini ke be yi,
ken daga kunmen soxo na i muude ke bulu a yi.
19 « Wucu laate dangi falle,
i kamanyugon ri.
A do i golliɲaŋaanon da jaatun bagandi.
20 A ga da muudu karagi kanŋe kini ke be yi,
ken fina ya n ri nan ti :
“ N kamanyugo,
an ga da muudu karagi kanŋe be kini in ŋa,
a faayi.
N saage na ken me muudu karagi kita a kanma,
ken xa faayi. ”
21 Kamanyugo ke ti a da :
“ A siro,
an ga katu duruxotono ti ke me fonlamaane,
an ɲa golliɲaŋaana sire yi.
Ken kuŋa,
n wa fi gabe xaliifana an ŋa keeta.
Li,
o n ɲaxa doome. ”
22 « A ga da muudu filli kanŋe kini ke be xa yi,
a xa ri sigi nan ti :
“ N kamanyugo,
an ga da muudu filli kanŋe be kini in ŋa,
a faayi.
N saage na a me muudu filli kita a kanma,
a xa faayi. ”
23 Kamanyugo ke ti a da :
“ A siro,
an xa ga katu duruxotono ti ke me fonlamaane yi,
an ɲa golliɲaŋaana sire yi.
Ken kuŋa,
n wa fi gabe xaliifana an xa yi keeta.
Li,
o n ɲaxa doome. ”
24 « A ga da muudu baane kanŋe xaliifa ke be yi,
a xa ri sigi nan ti :
“ Kamanyugo,
nke wa a tu ti sere moxo xoten ya ni an ŋa,
baawo an wa fatene na a ɲi an ma tifi ;
an wa korosindini na a ɲi an ma soxo.
25 Ken xaaxantaaxun saabu da,
n daga an kanŋen bulu,
an xallen faayi ke. ”
26 Kamanyugo ke ti a da kuŋa :
“ Ke golliɲaŋaana lenbure ke,
fuurinte ke !
An gaa a tu ti in wa fatene na a ɲi in ma tifi,
n wa korosindini na a ɲi in ma soxo,
27 manne ni an ga ma daga in naaburen wara xaalisingolliɲaŋaanon banŋe ?
N ga na a bagandi koota be,
n na a do i tonon kita.
28 Ken kuŋa,
a kanŋe nan rage a yi,
na a kafu muudutanmigume ke maxa.
29 Baawo,
fo gaa sere be maxa,
fo ga na kafi a yi,
a jiidini ya,
a na gabo.
Xa fo ga nta sere be maxa,
hari fonne ke be gaa a kaman maxa,
a boosini a yi ya.
30 Ken kuŋa,
ke golliɲaŋaana bure sediini bitanbinnen noxon ya yi ;
a na wu ma a ga giige.
” »
[Kiiten xibaare]
31 Isa ti :
« Seren Renmen do i darontaaxun ga na ri koota be,
a do i maliikanun gaa doome,
a na taaxu i laareesin kanma.
32 Duna seranxabiila ke su na ri sigi a jon ŋa.
A na i booxo bakka me yi xoyi nagaanan gaa jaxon do sugun booxono bakka me yi moxo be.
33 A na jaxon ri i tayen ŋa,
a na sugun ri i noogen ŋa.
34 Ken falle,
ku be gaa aken tunka tayen ŋa,
a na ti i da :
“ Xa ri yere in Faaba neemanta renmu,
axa nan ri ro a ga da taqe be wutu in danŋa i maranden noxon ŋa gelli duna jopaadu.
35 Na a sababun ɲa,
dullen ga ɲi in ŋa,
axa da in yigandi ;
daqun ga da in raga,
axa da in minindi ;
n ga ɲi mukkaaxun ŋa,
axa da in bisimilla axa kaanun ŋa ;
36 feeton ga ɲi in ŋa,
axa da in feetufata ;
n ga jangire,
axa daga in kuuɲi ;
n gaa hari kason ŋa,
axa daga bogu in ŋa. ”
37 Tayedunkon na ti a da kuŋa :
“ Kamane,
an dullu kan koota,
o ga da an yigandi ?
An daqu kan koota,
o ga da an minindi ?
38 O da an wari mukkaaxun ŋa kan koota,
o ga da an bisimilla ?
An feetu kan koota,
o ga da an feetufata ?
39 Kan koota ni,
an ga jangire,
o ga daga an kuuɲi,
ma na a mugu ti an wa kason ŋa,
o ga daga bogu an ŋa ? ”
40 Aken tunka wa i jaabini nan ti :
“ Tonŋu,
n na a ko axa da,
axa ga demu fo wo fo ɲaana in maaren lamaanu ku du baananbe da,
axa da a ɲa inke ya da mene ! ”
41 « Ken bire,
ku be gaa a noogen ŋa,
a na ti i xa da :
“ Xa laato bakka in ŋa,
ku seri langanto ku,
yinbi duumante be ga kumi Ibiliisa do i seyitanjaman xanne maxa,
axa daga kafu i ya.
42 Na a sababun ɲa,
dullen ga da in raga,
axa ma in yigandi ;
n ga daqu,
axa ma in minindi,
43 n gaa mukkaaxun ŋa,
axa ma in bisimilla ;
feeton ga ɲi in ŋa,
axa ma in feetufata ;
n ga jangire,
axa ma daga in kuuɲi ;
n ro kason ŋa,
axa ma daga bogu in ŋa. ”
44 Noogedunkon xa na ti a da :
“ Kamane,
kan koota ni an ga dullu,
ma an ga daqu,
ma an gaa mukkaaxun ŋa,
ma an ga feetu,
ma an ga jangire,
walla an ga ro kason ŋa,
o ga ma an deema ? ”
45 Ken bire,
a na ti i da :
“ Tonŋu,
n na a ko axa da,
axa ga ma fo wo fo ɲa seri lamaanu ku da,
axa ma a ɲaŋi inke ya da.
” »
46 Ken kuŋa,
Isa jaabi nan ti :
« Ikun na xosi daga yanganxatayi duumanten ŋa,
tayedunkon na daga bireyi duumanten ŋa. »*