[Allanbatikaxooren gurujeye]
24
Isa Alimasiiwu bogu falle Allanbatikaxooren ŋa,
a dagante,
a xaranlenmon tinko a yi nan ti a da :
« Allanbatikaxoore ke sigimoxon faayi de. »
2 Isa jaabi nan ti i da :
« Tonŋu,
n na a ko axa da,
axa yaaxen gaa ke ka be yi kundu,
a su riini guruje ya ;
hari gidi baane nta toqo gidi baane kanma. »
[Duna gillen taagumansu]
3 Isa daga taaxu Jayituunangide kanma.
A xaranlenmon do a senbe na a tirindi ti :
« Xaranmoxo,
ken ɲaana kan bire ?
Kan taagumanse na a koyini o yi ti an ri biren do duna gillen tinko ? »
4 Isa jaabi nan ti i da :
« Xa da du koroosi sere su nan maxa axa sankundi.
5 Seri gabe wa du xayini ti in toxon ŋa nan ti :
“ Nke ya ni Kisindaanan ŋa.
” I na seri gabe ya sankundini.
6 Axa wa riini fitinanun xibaaren mugu tinkoyen do laatoyen ŋa,
xa da axa moxo tu,
axa haqilun nan maxa bono !
Waajibin ya ni kun gaa ɲaana,
xa duna gille fe fina.
7 Baawo,
xabiilanun wa gilli me xanne maxa ;
jamaanun na giri me xanne maxa ;
ɲiiɲen na saralle noqun su yi ;
dullu xooron na kutundi ;
8 ken su ni nuxunten jalan jopaadun ya yi.
9 « Ken bire,
i na axa raga na tooran danben su saxu axa kanma,
na axa kari.
Xabiilan su na axa xoni do in batten ŋa.
10 Ken bire,
seri gabe wa bakka Alla killen ŋa,
nan saage me janbana,
na me xoni.
11 Fo gabe wa du ɲaana xayifaare na a ɲi xayifaare fe.
I na seren gaben ya sankundini.
12 Fi buren wa riini gabo ma seri gabe xanuyen ga roxo.
13 Xa sere be ga na muɲi ma fin lagaru,
ken kaman ya n kisiini.
14 Allantunkaaxun Xibaari Liŋe wa laxamiini duna tattu ku naxati su yi,
kuudo xabiilan su na a mugu.
Ken falle ya ni,
duna na giri. »
[Bono xoore]
15 Isa saage nan ti :
« Annabi Danɲeeli ga da bono haraamunte be fin ko,*
axa wa a walla sikki Allanbatikaxooren noxon ŋa.
» Xaranŋaanan na yere faamu de !
16 « Ken bire ga na sere be ɲi Yehuuda maran ŋa,
an nan wuru dagana gidi gillun ŋa.
17 A ga na sere be ɲi xuben kanma,
an nan maxa yanqa nan ti an wa fo wuttu an xuben noxon ŋa.
18 A ga na sere be ɲi teenun ŋa,
an nan maxa yille nan ti an wa an doroken wuttu.
19 Koni bone da nuxunton do sugundindaanon ya xooro ken koota yi sa !
20 Xa da Alla ɲaaga axa wuruyen nan maxa gemu waxati xote yi,
a nan maxa gemu Tuumayinkoota xa yi,
21 baawo ken koota gaa xotoono moxo be yi,
a me ma demu nan ɲaŋi gelli duna nan sigi.
A me tana ntaxa ɲaŋiini xa mene.*
22 Kun koota xoto ga n ntaxa defoono,
sere su nta kisiini,
xa i wa defoono ti seri sugandinton ŋa.
23 Ken waxati,
sere be ga na ti axa da :
“ Kisindaana ke faayi yere !
” ma :
“ A faayi dooke !
” xa maxa saxu a yi.
24 Du-alimasiiwunun do duxayifaarun wa bangeene,
i gaa taagumansi xooron do kaawafiinun dabarini kuudo na seron sankundi.
I ga ma kori,
i na hari Alla seri sugandinton yinme sankundi.
25 Xa terinke :
saado ken koota gaa kiɲene,
n da axa sobindi de !
26 « Ken kuŋa,
i be ga na ti axa da :
“ Kisindaanan faayi gunjuran ŋa,
” axa maxa daga.
I ga na ti :
“ A muxunten faayi dooke,
” axa maxa saxu a yi.
27 Baawo,
nke be ga ni Seren Renmen ŋa,
n ga na ɲi saagene riini,
a ɲaana xoyi kanmen ɲelunqeyen ya yi,
nan juwintan bange gelli kinbakka ma kinxenna.
28 Fo furen gaa noqu be,
janbanun na me ɲiini non ya yi*.
[Seren Renmen saagaye]
29 « Kun koota xoto dangi falle keeta,
kiyen na bita,
xason ntaxa ɲelunqene,
saanun na yere gilli kanmun ŋa ;
kanmun senbun su na saralle.*
30 « Ken koota,
Seren Renmen taagumansen na bange kanmun ŋa.
Ken bire jamaanun su wa wuunu,
i na Seren Renmen wari riini xaban noxon ŋa,
a do senben do nooro xoore.*
31 A na i maliikanun do buutuxan xooren xayi,
i na seri sugandinton kafu me yi do duna tattu ku naxati su yi,
gelli ke yinme ma ken yinbaane.*
[Turon masayila]
32 « Turon nan ɲaŋi axa da misaale yi :
turon ga na funti bire be,
derun ga bogu,
axa wa a tuunu ti kandaaran kiɲe.
33 Ken moxo baane ya ni,
axa ga na ku fiinu su wari,
axa na a tu ti waxatin tinko,
a kiɲe fonlaqen ŋa.
34 Tonŋu,
n na a ko axa da,
ku sero nta kalla,
ku fiinu ga ma ɲaŋi.
35 Kanmun do ɲiiɲen wa buruxeene,
xa inke sefen nta buruxeene abada ! »
[Alla baane ya na duna giri biren tu]
36 Isa saage nan ti :
« Ke koota do ke sanne,
sere su nta a tu,
kanmun maliikanun nta a tu,
{Renmen yinme nta a tu,
}¤ ma a ga nta Baaba Alla baane.
37 Fiinu beenu ga ɲaŋi Nuuha kiyen ŋa,
kun meenun ya n ɲaana Seren Renmen riyen xa yi.
38 Nuuha kiyen ŋa,
saado ŋaamen gaa riini,
seron ɲi yigene nan mini nan yaxi me yi baane ya,
ma Nuuha gaa roono fuuren ŋa koota be.*
39 Seron ma katu fo wo fo faamunu ma ŋaamen gaa riini do a su nan daga.*
Seren Renmen xa rimoxon ɲaana kundun ya yi :
40 ken wa sero filli ɲiini teenun ŋa,
i wa baanen sugandini na baanen wara sediini ;
41 a wa yaxaru filli xa ɲiini gollo,
i wa baanen sugandini na baanen wara sediini.
42 « Ken kuŋa,
xa maxa xenqe de !
Baawo axa nta a tu Kamanen gaa riini koota be yi.
43 Xa da a faamu nan ti kaagumen gan n ɲi fayaanan ri waxatin tu,
a wuyini i yaaxon ya yi,
kuudo fayaanan na waase roono i kan ŋa.
44 Kundun ya ni,
axa xa na axa moxon sirondi,
baawo axa nta du do Seren Renmen ri biren taaxunu.
[Golliɲaŋaana wulluliŋonte]
45 « Golliɲaŋaana fontuwaana duntenŋen ni ko baane yi ?
Ken ni yinmanken ga da ke be ro golliɲaŋaanon yinmen ŋa ya,
a gaa i yiganden kinni i ya a biren ŋa.
46 Ken golliɲaŋaana ni wulluliŋonten ya yi,
selli a kamanyugon ga ri na a ɲi ken golle kanma.
47 Tonŋu,
n na a ko axa da :
a kamanyugon wa riini i kittidufoonun su xaliifa a yi.
48 Xa,
selli golliɲaŋaana bure ke ga na du toxo nan ti :
“ N kamanyugon leele riini ”,
49 nan xenu komon kuttun ŋa na i katu,
nan sukke do minnaanon ŋa nan yige nan mini ma a ga mande,
50 Kamanyugo ke xosi ri koota be a ga ma du do a taaxu,
a do waxati be a ga nta a tu,
51 A wa a yanganxatana,
yanganxateye be munaafaxinun do a ga n xawa.
A na wu ken koota,
ma a ga giige. »