Luka 17

[Yanpayi muuriye me maxa]

Isa Alimasiiwu ti i xaranlenmon da : « Sababu nta korini abada fo be gaa sikki seron gaa sankunu. Xa bonen wa seren da, sere be ga na jaarabindi ! 2 Hari i na gidindunga xoore siiti an xannen ŋa na an sedi geeji yi, ken ya nan fasu an da diinanta an gaa ɲaana sababu yi na kun fo maxayanqanto sankundi.

3 « Xa da du koroosi ! An waaxin ga na junuubungollen ɲa, a xiri an na sefe a da. A ga na nimisi, an xa na yanpa a maxa. 4 A ga na fo bure ɲa an ŋa ta ɲeru koota baane ke noxon ŋa, a ga na ri katta an ŋa ta ɲeru nan ti an da : “ N wa tuubini an da ”, an na a tuubun raga. »

5 Isa ti a da: « Kamanyugo, fo kafu i danqanaaxun ŋa. » 6 Kamanyugo ti : « Selli jaajifunse haqe danqanaaxun me gaa axa maxa, axa ga na ti ke yittitinŋe da : “ Doofe an nan daga lori geeji noxon ŋa ”, a doofene ya nan daga lori geeji noxon ŋa. »

[Komen sigira]

7 Isa ti : « Ko ni axa yi, a kaman komen ga na giri soxo gunnen ŋa, walla xa, a ga na giri nagaaniran ŋa, a gaa tini a da : “ Li taaxu kuruma an nan yige ” ? 8 Aayi, a kaman nta ken koono, xa a tini ya : “ N yiganden soro, an na an naxaanen siiti na in yiganden taaxundi, n nan yige, ken falle, an xa na yige. ” 9 Yaala a nan xawa fo duran ɲaana i kome ke da ti a da i gollen dabari ya ba ? Aayi ! 10 Axa xa na kundun ya yi : axa ga n xawa fo be dabarini, axa ga na a ɲa nan duguta, axa na ti : “ Oku ni komo ya yi tannu ; o da o gollen ya dabari. ” »

[Yugun tanmi fatanwattiburen sahande]

11 Isa daganten yi, a bogu ti maran do maran naxan ya yi. 12 A royinte debe yogo yi, sero tanmi ri katta a yi, fatanwattibure gaa i ya. I da du toxo laatoyen ŋa nan ferenpenti nan ti : 13 « Isa, xaranmoxo, hinne o yi ! » 14 Isa ga da i wari, a ti i da : « Xa daga katta ŋa, i na axa wari. » I gaa do killen ŋa telle, i saha.

15 I du baananbe ga bogu a xala nan ti i saha, a xosi saage do i taabattun ŋa, a gaa Alla tiigana, a xannen xoore. 16 A da du wara Isa taanun ŋa, na i taŋen ro ɲiiɲen ŋa, na a tiiga. Yugo ke ni Somooronken ya yi. 17 Isa ti : « Ayiwa, sero ku tanmi su ma saha ya ba ? Sero ku kabi na minna yi ? 18 I baananbe su ma yille riini, na Alla tiiga ma ke mukke baane ? » 19 Ken falle Isa ti yugo ke da : « Giri an nan daga ; an danqanaaxun da an sahandi. »

[Allantunkaaxun riye]

(Mace 24.23-28, 37-41)

20  ga da Isa tirindi riyen waxatin ŋa, a ti i da : « Allantunkaaxun nta riini xo fo, an gaa a walla. 21 A nta koniini ti : “ Xa da a faayi, a wa yere ! ” ma, “ A wa dooke ! ” Ken kuŋa, xa da a tu ti Allantunkaaxun wa axa naxa. »

22 Ken falle a ti i xaranlenmon da : « Waxati wa riini, nke be ga ni ŋa, a wa liŋoono axa da axa na in kiyen wari, hari a ga na ɲa koota baane ya yi, xa, axa nta a walla. 23 I wa a koono axa da : “ A faayi yere ! ”, ma “ A faayi dooke ! ” Xa, xa maxa daga do i ya, xa maxa wuru do i ya. 24 Kanmen ɲelunqeyen gaa xurayen wuttu gelli ke yinme ma ken yin baane yi moxo be, Seren Renmen riyen xa ɲaana kundun ya yi. 25 Xa fina, a nan xawa toorene ya moxosiri, lenki seron na bara a yi xa.

26 « Fiinu beenu ga ɲaŋi Nuuha kiyen ŋa, kun meenun ya n ɲaana Seren Renmen kiyen xa yi : 27 seron ɲi yigene, nan mini, nan yaxi me yi baane ya, ma koota be Nuuha gaa roono jiidunfuura xooren ŋa, ŋaami xooren gaa riini na i ju, na i su buruxa.

28 « A wa ɲaana xo xa kiyen moxo : seron ɲi yigene, i gaa minni. Seron ɲi yokkun xobono, i gaa yokkun gaagana ; seron ɲi teenun soxono, i ɲi kaanun tagana. 29 Xa Luuti ga bogu deben noxon ŋa koota be, Alla da yinben do tinbiritin ya texendi deben kanma xo kanmen moxo, na i ju, na seren su buruxa. 30 Seren Renmen riyen xa na seron juunu ken moxo ya yi. 31 Ken koota ga na sere be ɲi sellan ŋa, a kaman nan maxa ro konpe noxon ŋa nan ti i wa i yokkun wuttu. A ga na sere be xa ɲi gunnen ŋa, a kaman nan maxa ti i wa saagene katta kaanun ŋa. 32 Xa sinme fon ŋa, fo be ga da Luuti xojidunken kita.

33 « Sere wo sere ga na i yonkin kisiyen muuru, a kaman wa bonno a yi ; xa sere wo sere ga na bono i yonkin ŋa, a kaman wa a kitana. 34 N wa a koono axa da nan ti, ken koota ga na ri, na sero filli ɲi saqa texe baane yi wuron ŋa, n na baanen wutu na baanen toxo sediini. 35 Yaxaru filli ga na ɲi gollo doome, n na baanen wutu na baanen toxo sediini. 36 {Yugu filli ga na ɲi ten noxon ŋa, i do baane wa dagana na baanen toxo sediini.} » 37 Isa xaranlenmon ti a da : « Xaranmoxo, ken ɲaŋiini minna xa yi ? » A ti i da : « Fo furen gaa noqu be yi, janbanun na me ɲiini non ya yi. »