Luka 18

[Duumaye allanɲaageyen ŋa]

Isa Alimasiiwu da ke ko i xaranlenmon da, na a koyi i ya ti i nan xawa Alla ɲaagana waxati su, i nan maxa lanpu allanɲaageyen ŋa. 2 A ti : « Kiitikutaana yogo ɲi debe yogo yi, a nta kanna Alla yi, a nta sere daroono. 3 Yaxare yogo xa ɲi non ŋa, a kiina ga kara. Yaxare ke wa telle kiitikutaana ke banŋe waxati gabe yi, nan ti a da : “ Kiiti in do in gajanlenman naxa, an na tonŋun ko ! ” 4 Kiitikutaana ke da wucu laate ɲa a ma duŋe. Ken falle, a ti du da : “ Tonŋun ya ni, n nta kanna Alla yi, n nta sere xa daroono. 5 Xa, ke yaxare da in tanpindi. Dugu in na a tonŋun kini a yi, ken ga fe, n nta horoma kitana a maxa. ” » 6 Kamanyugo yille tini : « Xa da ke kiitikutaana bure sefen terinka ya de ! 7 Alla be teleŋonten ga ni, a ga da sero beenu sugandi, i gaa laxaraxaasana katta a yi wuron do kiye, yaala a nta kiitini kun ya da ba ? Yaala a wa dugundindini i deemanden ŋa ba ? 8 N wa a koono axa da : Alla wa kiitini i da jawoye yi. Xa, ga na yille riini, a wa danqanaaxu ɲiini seron ŋa ɲiiɲen kanma yi ba ? »

[Farisiganken do sagalliragaanan masayila]

9 Isa da ke masayila xa ko seron da, ku beenu gaa du ragana seri teleŋonton ŋa Alla yaaxon kaane, i gaa sere kuttun beqe. 10 A ti : « Yugu filli daga ro Allanbatikaxooren noxon ŋa na Alla batu : baane ni ya yi, baanen ni ya yi. 11 Farisiganke ke sigi i duran ŋa na Alla batu ti : “ Ee Alla, n wa an tiigana in ga ma ɲa xo sere kuttun moxo, kun ga ni nanbaranto, golliburiɲaŋaano, do jeenaanon ŋa. N wa an tiigana in ga nta xo ke sagalliragaana moxo. 12 Koye su, n wa bito filli suumini ; n gaa fo wo fo kitana, n wa a taxandi tanmundin sadaxini an da. ” 13 Sagalliragaana ke ken wa sikki laatoyen ŋa, a saxamo hari i yaaxon wuttu katta kanmun ŋa, xa a ɲi i gijinmen ya katta na a koyi ti i nimisi, nan ti : “ Ee Alla, hinne inke junuubuɲaŋaana yi ! ” » 14 Isa ti : « N wa a koono axa da nan ti : ke yugo gaa saagene katta i kan ŋa, a do Alla naxan liŋo. Xa Farisiganke ke ken fe. Baawo, sere wo sere ga na du wurugi, Alla wa an maxayanqana. Sere wo sere xa ga na du maxayanqa, Alla wa an wurugini. »

[Isa duwanŋe leminun da]

(Mace 19.13-15 ; Maarika 10.13-16)

15 Seron do hari leminun ɲi dagana katta Isa yi kuudo a na i sooxen saxu i yinmun ŋa. A xaranlenmon ga da ken wari, i doxo i ya. 16 Xa Isa da leminun tinkondi du yi nan ti i xaranlenmon da : « Xa da leminun wara i nan ri katta in ŋa ! Xa maxa i kaba a yi, baawo sero beenu gaa xo leminun moxo, na i ya da. 17 Tonŋu, n na a ko axa da, sere wo sere ga ma Allantunkaaxun raga xo leminun moxo, a nta roono. »

[Bannan masayila]

(Mace 19.16-30 ; Maarika 10.17-31)

18 Yehuudiyanun xirise yogo da Isa tirindi nan ti : « Xaranmoxo sire, n nan xawa manne ɲaana kuudo in na bireyi duumanten kita ? » 19 Isa ti a da : « Manne saabu da an gaa in xilli “ xaranmoxo sire ” ? Sere su sire fe, Alla baane ya siren ni. 20 Ayiwa, an wa Alla ɲaamarindixannun tu, kun ga ni : maxa jeeni, maxa sere kari, maxa fayi, maxa seedanjuuraaxu, an ma do an faaba daro. » 21 Yugo ke ti a da : « N da ku su tanga gelli in tugunnaaxun ŋa. » 22 Isa ga da ken mugu, a ti a da : « Fi baane da an kuma harisa : fo wo fo gaa an maxa, a su gaaga an na a taxandi misikiinun ŋa, ken ŋa, an na bannaaxun kita kanmun ŋa. Ken falle, an na sukke do in ŋa. » 23 Yugo ke ga da ku sefo mugu, a butten bono, baawo naaburen gaben wa a maxa.

24 Isa ga da a butten bononten wari, a ti : « Bannan royen xoten ya ni Allantunkaaxun noxon ŋa de ! 25 Ɲogomen nan bogu ti mesellen boten ŋa, ken nan newu bannan nan ro Allantunkaaxun noxon ŋa. » 26 A terinkaanon ti a da : « Ken kuŋa, ko xa n kisiini keeta ? » 27 Isa ti : « Ke be gaa seron kaaɲana ; ken nta Alla ken kaaɲana. » 28 Piyeeri ti Isa da : « Ayiwa, oku xooni da fo wo fo wara nan sukke do an ŋa. » 29 Isa ti i da : « N wa a koono axa da tonŋun ŋa : sere wo sere ga na buru i kan ŋa, nan buru i yaqen ŋa, nan buru i saaranon do i waaxinun ŋa, nan buru i renmun ŋa do Allantunkaaxun batten ŋa, 30 a kaman wa ku meenu su fo gaben kitta duna yi yere, nan yille bireyi duumanten xa kitta Laahara. »

[Isa faatiyen do a wundiye]

(Mace 20.17-19 ; Maarika 10.32-34)

31 Isa da i xaranlenmon tanmi do fillon duran xiri nan ti i da : « Ayiwa, o faayi segene telle yi. ga da fo wo fo safa inke be ga ni ŋa fin kanma, ken su wa ɲaana nan tinme. 32 N wa rageene nan kini fankama mukkunun ŋa, kun na soyi in ŋa, na in roxo, na raxanjin tufa in ŋa. 33 I na in katu ti gaɲan ŋa, i na yille in karini. N kalle bita sikka, n na wundi. » 34 Xa, i ma fo wo fo faamu ken ŋa. I ma yinme do xoqe kita digaamu ku yi, baawo i wure bita i da.

[Finkinten yaaxon wuɲiye]

(Mace 20.29-34 ; Maarika 10.46-52)

35 Isa saaganten ŋa katta Yerusalaamu yi, a ga tinko deben ŋa, finkinte yogo wa taaxunu killinxannen ŋa, a gaa salumene. 36 Finkinte ke ga da jaman mugu dangini, a tirindindi fo be ga sare. 37 I ti a da, Isa ya danginte ni. 38 A xosi ferenpenti nan ti : « Isa, Tunka Daawuda renme, hinne in ŋa ! » 39 Sero beenu gaa kaane, kun wa doxono a yi ti a n kuuru, xa, a wa tallan ferenpentini nan ti : « Daawuda renme, hinne in ŋa ! » 40 Isa sigi, a ti i na a riiti katta i ya. Finkinte ke ga tinko Isa yi, Isa da a tirindi nan ti : 41 « An na a mulla in na manne ɲa an da ? » A ti Isa da : « Kamanyugo, n na a mulla na fo wari ta ! » 42 Isa ti a da : « Ayiwa an yaaxon nan wuɲi ! An danqanaaxun da an sahandi. » 43 Ken sigira yi, a yaaxon wuɲi ; a daga do Isa yi, a gaa a kanma na Alla tiiga telle. Seron ga da ken wari, i su da a ɲa allatiigeyen ŋa.