Mace 20

[Reesengoorigumen do i golliɲaŋaanon xibaare]

« Ken kuŋa, gaa xoyi ke be : a na xoyi kaagume yogo ya yi, a ga bogu i kan ŋa suxuba fanan ŋa nan daga golliɲaŋaanamuuri katta i ŋa. 2 A do golliɲaŋaanon sefe nan gemu kiyen tugaaden ŋa, ken falle, na i wara dagana i reesengooren ŋa. 3 Beeteyen ŋa, a yille bakka na golliɲaŋaano tana wari saxan ŋa i ga ma golle kita. 4 A ti i da : “ Axa xa n daga in reesengooren ŋa, axa do ke be ga n xawa, n na ken tuga. ” 5 I xa daga a reesengooren ŋa. A ga bogu kinsigan xa yi, a da golliɲaŋaano tananu wari, a da i xa deni reesengooren ŋa. Sallifanan ŋa xadi, a da fo tananu deni. 6 Laxasaran ŋa, a ga bogu xadi, a da golliɲaŋaano tana ɲi taaxunu, a ti i da : “ Manne ni axakun ga da kiyen muuman su ɲa taaxunu ? ” 7 I ti a da : “ Sere ya ma o wutu. ” A ti kun xa da : “ Xa daga in reesengooren ŋa. ”

8 « Futuron ga kiɲe, reesengoorigumen ti golliɲanyinmanken na golliɲaŋaanon xiri a na i tuga. A na sere lagarun fina tuga, ken bire, a na fanon tuga. 9 Sere lagarun ga ri, a da baane su tuga kiyen tugaaden ŋa. 10 Sere fanon ga ri, i da a sinma ikun wa fuŋoono fo lagarun ŋa tugaade yi, xa a da i xa tuga kiyen tugaaden ya yi. 11 I ga da i tugaaden raga bire be, i toxo xuumu-xuumunu ti reesengoorigumen ŋa 12 nan ti : “ Ku lagari riini, i ma fo golli ma waxati lamaane, an da o do i ɲokkondi, oku xa ya n tanpi. O da tewoyen muɲi kiyen muuman su yi. ” 13 Reesengoorigumen ti i du baananbe da : “ N yugo, n ma an nanbara de ! O ga gemu kiye ke tugaaden be yi, n da an tuga ken ya yi. 14 Ke be ga ni an xallen ŋa, an do ken nan daga. A liŋo in danŋa ya na ken me kini lagarintanriyaano ku xa yi ! 15 N ya fo ni in naaburen ŋa. Ke be ga n liŋa in da, n ra nta ken ɲaana ya ba ? Ma in siroye ke ya haasidaaxu ni an ŋa ? ” » 16 Isa jaabi kuŋa nan ti : « Fallankon ɲaana kaananko yi ke moxo ya yi, kaanankon xa na ɲa fallanko. »

[Isa xibaarindi i faatiyen do i wundiyen ŋa xadi]

(Maarika 10.32-34 ; Luka 18.31-34)

17 Isa Alimasiiwu do i xaranlenmon tanmi do fillon daganton ŋa yi, i gaa killen ŋa, a da a mullin ko i da ti : 18 « Ayiwa o faayi segene telle Yerusalaamu yi, nke be ga ni ŋa, n wa roono do kittun ŋa, i wa in kiitini kallaana yi. 19 I wa in kinni fankama mukkunun ŋa, kun na soyi in ŋa, na in katu ti gaɲan ŋa, ken falle na in ŋa. Ken bita sikka, n na wundi. »

[Yaaxuba do Yohanna ma ɲaagande]

(Maarika 10.35-45)

20 Ken falle, Sebede yaqen tinko Isa yi, a renmun filli wa do a yi, a tusi a wure na a ɲaaga. 21 Isa jaabi nan ti a da : « An na manne mulla ? » Yaxaren ti : « An ga na taaxu an tunkantaaxaaden ŋa, an na ɲaamariyen kini in ku renmu nan ɲa an kaaran ŋa, baanen gaa an tayen ŋa, baanen gaa an noogen ŋa. » 22 Isa jaabi nan ti i da : « Axa gaa in ɲaagana fi be yi, xori axa wa a tu de ? Nke gaa xaraxan xaraxace ke be minni, axa ra wa a minni ba ? » I ti : « O ra wa a yi ke. » 23 Isa jaabi nan ti i da : « Tonŋun ya ni, axa na a me minni ya, xa, nan taaxu in tayen do in noogen ŋa, ken ɲaamariyen nta inke da, baawo in Faaba ga da laayidun wutu sere ke be da, a kiniini ken ya yi. » 24 Xaranlenmo ku tanmi ga da ken mugu, i butu waaxinu ku filli wure. 25 Xa, Isa da i su xiri nan ti i da : « Axa wa a tu nan ti jamon kuttun yinmankon na dunadunkamanaaxun ya yi i kanma, senbenton xa wa i sagon su dabarini kuttun ŋa. 26 Ken nta xawa ɲaana axakun duurun do me naxan ŋa. Axa du baananbe du ya gaa a mulla, i n ɲa axa su seri daren ŋa, ken nan xawa ɲaana axa da kome ya yi. 27 Sere be gaa a mulla nan ɲa axa su kaananken ŋa, a kaman nan xawa ɲaana axa da kome ya yi. 28 Ke yinme ya ni Seren Renmen riyinmen ŋa : a ma ri sere golliɲaŋundi, xa a ri golli seron ya da, na i yonkin kini maxawasaade yi seren su da. »

[Finkinton filli yaaxon wuɲiye]

(Maarika 10.46-52 ; Luka 18.35-43)

29 Isa do i faarun bogunto yi, jama xoore sukke do a batten ŋa. 30 Finkinto filli yogo xa wa taaxunu killinxannen ŋa, i da a mugu ti Isa ya n dangini, i toxo xaarunu nan ti : « Kamanyugo, Tunka Daawuda renme, hinne o yi ! » 31 Jaman doxo i ya kuudo i na kuuru. Ken do i fi su, i tallan xaarunu ya, i do a gaa me yi : « Kamanyugo, Daawuda renme, hinne o yi ! » 32 Isa sigi na i xiri nan ti i da : « Axa na a mulla in na manne ɲa axa da ? » 33 I da a jaabi nan ti : « Kamanyugo, o yaaxon nan wuɲi ! » 34 I hinneyen da Isa raga. A kati i yaaxon ŋa baane ya tan ; i da fo wari nan sukke do a batten ŋa.