Luka 16

[Naaburun golliɲaŋaana nanbaranten masayila]

Isa Alimasiiwu ti i xaranlenmon da : « Yugo yogo ya ni, a gaa gollini banna yogo maxa. Seron da a kiɲandi banna ke yi, ti a golliɲaŋaanan wa a naaburen bonondini. 2 A da i golliɲaŋaana ke xiri nan ti a da : “ Seron da a kiɲandi in ŋa, ti an na in naabure ke bonondini ya de ! Ayiwa, an ga da in naaburen golli moxo be, o na a jaaten koyi me yi, baawo in nta an toqo in naaburen yinmen ŋa, n na an walla ya. ” 3 Golliɲaŋaana ke ti i noxoodu : “ N kamanyugon ti i wa in walla. N nan xawa manne xa ɲaana saasa ? Soxe fanka nta in ŋa, salumeyen xa yaagun wa in ŋa. 4 N gaa fo be ɲaana, n da a tu. N ga na ken ɲa, selli in ga na hari xate bakka in golle ke yi, ma sere baane ken ga da in bisimilla ! ” 5 A kamanyugon tanbon gaa sero beenu yi, a da kun xiri baane baane. A ti fanan da : “ N kamanyugon manime na an ŋa ? ” 6 Ken ti : “ A kame tenbido xoore ya tanbon na in ŋa. ” Golliɲaŋaana ke ti a da : “ An tanbunkaayitin faayi ke : taaxu an na tankarage safa a noxon ŋa kuruma. ” 7 Ken falle, a ti fo tana xa da : “ Anken xa, a manime tanbon na an ŋa ? ” A ti : “ A kamo karagi yillinbooto ya tanbon na in ŋa. ” Golliɲaŋaana ke ti a xa da : “ An tanbunkaayitin faayi ke : kamo naxati safa a noxon ŋa. ” 8 Ke golliɲaŋaana nanbarante kamanyugon kaawa a gotontaaxun ŋa. Duna renmun na me xosono gotoyen ya yi diinanta sero beenu gaa hanmini do i xunbane siroyen ŋa. »

9 Isa ti : « Nke xa wa a koono axa da : naaburen be ga ni neenendifon ŋa, xa da seron deema ti a yi, kuudo a ga na duguta axa yi, axa na a muson kita Alla ka duumanten noxon ŋa. 10 Sere be ga ni duntenŋen ŋa fi roxon ŋa, a kaman ni duntenŋen ya yi fi xooron xa yi ; sere be ga ni janbanten ŋa fi roxon ŋa, a kaman ni janbanten ya yi fi xooron xa yi. 11 Ayiwa, naaburen be ga ni neenendifon ŋa, axa ga ma duntenŋaaxu a noxon ŋa, ko xa na naaburu soobe xaliifana axa yi ? 12 Axa ga ma duntenŋaaxu wandi naaburen ŋa, ko na axa yinme xallen kinni axa yi ? 13 Kome su ra nta kamanu filli batta : an na baane ya xonno na baanen xanu, ma ken ga fe, an na baanen daro, na baanen roxo. Axa ra nta Alla do naaburen batta doome. »

(Mace 11.12-13 ; 5.31-32 ; Maarika 10.11-12)

14  ga da ku digaamu mugu, i soyi Isa yi, baawo i wa xaalisin mulla buru. 15 Isa ti i da : « Axa wa du maxa seri teleŋonto yi seron yaaxon ŋa, na a ɲi xa Alla wa a tu, axa sondomun gaa moxo be. Baawo seron gaa kaawana fo be yi, ken ni fi xoninten ya yi Alla maxa.

16 «  do kitaabun ya n joŋa ma Yahaya waxatin gaa riini. Gelli Yahaya waxatin ŋa keeta, wa a kanma nan gangi, be su xa wa duruxotono nan ro. 17 Xa ganta, kanxotten do ɲiiɲanxotten nan sanku, ken nan newu diinanta Alla sariyan topa baane sankuyen ŋa.

18 « Sere wo sere ga na i yaqen wara na yaxare tana yaxi, an jeeni. Sere wo sere ga na yaxarin warante yaxi, an jeeni. »

[Yugu bannan do Lajaara masayila]

19 Isa ti : « Ke ɲa yugu banna yogo ya yi, yugo ke na yiran faranpara jonko xoton ya rondini, na yigandi liŋen yiga koota su, nan sewo. 20 Misikiina yugo yogo, a toxon ga ni Lajaara, a faten banŋe wo banŋe tugo, a daga saxu banna ke ganlaqen ŋa 21 kuudo i na banna ke yigandi kuttun kita nan yige. Wullun xa wa riini a xa tugu ku tara.

22 « Misikiine ke ga bono, maliikanun daga a wara annabi Ibirahiima kaaran ŋa. Ken falle banna ke xa ri bono, i da a firindi. 23 Banna ke wa toora xoore noxon ŋa Laahara ; a ga da i yinmen wutu kanmun ŋa, a yaaxen wa Ibirahiima yi laatoyen ŋa, Lajaara wa a kaaran ŋa. 24 A luuke nan ti : “ Ee baaba Ibirahiima, hinne in ŋa, an na Lajaara wara a nan daga i doronsoomen deebi jin ŋa, a nan ri a tolli in xoren ŋa, baawo in toore ke yinbe noxon ŋa buru. ” 25 Xa Ibirahiima ti a da : “ N renme, sinme ke, an da xeerin su kita an birantaaxun ke noxon ŋa ; Lajaara ken xa da toora ke danben su wari. Saasa, buttumurayen faayi aken da yere, an xa wa tooran noxon ŋa. 26 Ken xa baane fe de ! Kun xoore ya na o do axa naxa ke yi, kuudo ku beenu gaa a mulla nan giri yere nan daga katta axa yi, i na konto ; ku beenu xa gaa a mulla nan giri axa yi nan ri katta o yi, i xa na kori a yi. ” 27 Banna ke ti : “ Ken kuŋa, n faaba, n da a muuru an maxa, an na Lajaara xayi in faaban kan ŋa. 28 Waaxi yugu karagi wa in maxa non ŋa, a nan daga i gongo kuudo i na kisi inke ga toora ke be me yi. ” 29 Ibirahiima ti a da : “ Annabi Muusa Sariyan do kitaabun wa an waaxinun maxa, i na kun batu ke ! ” 30 Banna ke ti : “ Aayi, n faaba Ibirahiima. Sere ya ga na giri Laahara nan daga i ɲi, ken ya ni i gaa du rasaagana. ” 31 Ibirahiima ti a da : “ I ga ma duŋe na annabi Muusa Sariyan do annabinyinmun kitaabun batu, hari furen ya ga na wulli nan sefe i da, i nta du rasaagana. ” »