Luka 15

[Fo sankunton masayilanu]

(Mace 18.12-14)

do junuubuɲaŋaanon su tinko Isa Alimasiiwu yi na a digaamun terinka. 2  do toxo a bexebeqe nan ti : « Ke yugo da junuubuɲaŋaanon bisimilla ma a do i gaa yigene doome ! » 3 Isa xa da ke ko i da, a ti : 4 « Kame jaxe ga na ɲi axa du baananbe maxa saasa, jaxa baane ga na sanku, yaala a nta tankaben do jaxon kabi walla gunnen noxon ŋa nan daga jaxa sankunte ke muuru ma a ga nda a wari ba ? 5 A ga na a wari, a wa ɲaxalini na a jongi do a nan daga. 6 A do jaxe ke ga na joofe i kan ŋa, a na i menjanŋun do i taaxanlenmon xiri nan ti i da : “ Xa ɲaxali do in ŋa, baawo in jaxe be ga sanku in ŋa, n da a wari ! ” » 7 Isa ti : « N wa a koono axa da nan ti, ken moxo ya ni, junuubuɲaŋaana baane ga na du rasaaga, ken ya ɲaxaliyen nan xoora Alla banŋen ŋa diinanta tankabe do seri teleŋonto kabi ɲaxaliyen me yi. »

8 Isa yille tini xadi : « Yaxare be, futtan godoxullu tanmi gaa a maxa, yaala godo xullu baane ga na sanku a yi, a nta lanpan ya ragandini na konpen sella na gode ke muuru ma a ga n da a wari ba ? 9 A ga na godo xulle ke wari, a na i menjanŋun do i taaxanlenmon xiri nan ti i da : “ Xa ɲaxali do in ŋa, baawo godo xulle be ga sanku in ŋa, n da a wari ! ” 10 N wa a koono axa da : ken moxo ya ni, junuubuɲaŋaana baane ga na du rasaaga, Alla maliikanun wa ɲaxalini. »

11 Isa ti xadi : « Yugo yogo ya ni, ren yugu filli ɲi a maxa. 12 Fo tugunnen ti i faaba da : “ N faaba, taqe be gaa in maxa o xayen ŋa, n xallen kini in ŋa. ” Faabe ke da i naaburen taxandi i renmun filli do me naxa. 13 Bita lamaanu ga dangi, fo tugunne ke da i taqi naaburen su xooro nan daga jaman laate yogo yi, na i naaburen su sanqi battarankillun ŋa non ŋa.

14 « A ga da i naaburen su sanqi nan duguta keeta, dullu xoore kutundi jamaanen ŋa. Tanpiyen jopa a ragana. 15 A da gollen muuru yugo yogo maxa ken jamaane yi, ken yugo da a wara faringijisorogoyen ŋa. 16 Dulle saabu da, faringijun gaa yittirenme be yigana, a da a xanu na ken ya yiga, xa sere ma ken yinme kini a yi.

17 « Ken ya ni, a sinme i alihaalan kanma nan ti : “ Yiganden gaben wa in faaba golliɲaŋaanon maxa, i ra nta hari a ɲamana. Nke xa faayi yere, dullen wa xo a na in kari ! 18 N faayi yillene katta in faaba yi, n na ti a da : ‘ N faaba, n da Alla kuta, n da an xa kuta, 19 n ma xawa an na in raga xo an renme xadi. N raga xo an golliɲaŋaanon gaa an maxa moxo be ! ’ ”

20 « A da killen raga nan daga katta i faaba yi. Faaben ga da a hayina laatoyen ŋa riini, a hinneyen da faaben raga moxosiri. Faaben wuru katta a yi nan sapi a yi, na a xandunsunbu. 21 Renme ke ti i faaba da : “ N faaba, n da Alla kuta, n da an xa kuta ; n ma xawa an na in raga xoyi an renme xadi... ” 22 Xa faaben ti i komon da : “ Xa da dorokon su fo faranparen riiti kuruma axa na a ro a xannen ŋa ; xa da doronma yogo ro a kitten ŋa, na tepunun ro a tan ŋa. 23 Xa da gunbunlen kate ke riiti na a kari, o na baase dabari, 24 baawo in dan ke renme be faayi kundu, a ɲa xo a ga kara ya nan yille wullini ; a ɲi ga sanku ya, n da a wari. ” Ɲaxa xooren da a jopa.

25 « Ken da a ɲi, sooma yugon wa gunnen ŋa. A gaa gilli gunnen ŋa, a ga tinko kan ŋa, a taron wa manqanŋen ŋa : suugen do rege. 26 A da komo ku baananbe xiri na a tirindi fo be ga sare. 27 Kome ke ti a da : “ An xoxonen ya n saage riini, an faaba ga da gunbunlen kate ke kari, baawo a yonkin sahanten ri. ” 28 Sooma yugo ke xosi butu ; a bara roono kan noxon ŋa. Faaben bogu katta a yi na a xanjo ti a nan ro kan noxon ŋa. 29 A ti faaben da : “ An da a wari ba : nke da siina gabe ɲa in gaa komongollini an da, an ma ti in na fo dabari abada in ga ma a dabari. Xa ganta, an ma demu na hari sugunlenme kini in ŋa, n na a kari in do in menjanŋun na a yiga. 30 Xa, an dan ke renme ga ri, aken be ga da an naaburen su bonondi yaxarin sangaanon ŋa, an da gunbunlen katen kari aken da ! ” 31 Faaben ti a da : “ N renme, an do in ya na doome waxatin su yi ; fo wo fo gaa in maxa, an ya xalle ni. 32 O n xawa ɲaxa xoore ya dabarini, nan sewo, baawo an dan ke xoxone na xoyi a ga ɲi ga kara ya, a ga yille wullini ; a ɲi ga sanku ya, n da a wari ! ” »