[Isa Alimasiiwu tirindinde Tuumayinkootan fin kanma]
14
Farisigankon yinmanke yogo da Isa Alimasiiwu xiri yigeyen ŋa,
Tuumayinkoota yogo yi.
Sero beenu gaa non ŋa,
i wa terinkene Isa gaa fo be ɲaana.
2 Jaxa,
yugu jangirante yogo wa non ŋa,
a kittun do a taanun gaa fankana.
3 Isa da sariyanxaranmoxonun do Farisigankon tirindi nan ti :
« Yaala o sariyan duŋe ti a yi na seren jaara Tuumayinkootan ŋa ba ? »
4 Xa i ma duŋe a jaabini.
Isa da jangirante ke raga na a sahandi,
na a wara dagana.
5 Ken falle,
a ti i da :
« Axa du baananbe ren yugo,
walla xa a gunbon ga na ware geden ŋa,
yaala a kaman nta telle a bagandi ken sigira su yi ya ba,
ken ga na ɲa hari Tuumayinkootan ya yi ? »
6 I ma katu a jaabini ken xa yi.
[Duwaraye serexoorantaaxuran ŋa]
7 I ga na sero beenu xiri yigeyen ŋa i gaa taaxunu serexoorantaaxuranun ŋa,
Isa ga da a wari,
a da ke masayila ko i da.
8 A ti :
« Seren ga na an xiri ɲaxanyiganden ŋa,
maxa daga taaxu serexoorantaaxuran ŋa.
Ken ga fe,
sere be ga n fasa anken ŋa,
i ga na ken xiri,
a ga na ri,
9 sere ke be ga da axa sero filli su xiri,
a nan maxa ti anken da :
“ Ke taaxura kini kaati yi.
” Ken ŋa,
an do yaagun ya n telle taaxu battarantaaxuran ŋa.
10 Ken kuŋa,
seren ga na an xiri ɲaxanyiganden ŋa,
daga taaxu battarantaaxuran ya yi,
kuudo ke be ga da an xiri,
a ga na ri a gaa tini an da :
“ N yugo,
ri taaxu serexoorantaaxuran ŋa !
” Ken ya ni darontaaxun ŋa an da yiganlenmon kuttun naxa.
11 Baawo sere wo sere ga na du wurugi,
Alla wa an maxayanqana ;
sere wo sere xa ga na du maxayanqa,
Alla wa an wurugini. »
12 Ken falle,
Isa ti i xirindaana ke da :
« An ga na ɲi seron xilli na i yaraxatandi,
ma na i ɲaaxamandi,
maxa an menjanŋun xiri ;
maxa an waaxinun xiri ;
maxa an maarenmun xiri ;
maxa an taaxanlen bannanun xiri,
baawo i xa ra wa an xilli yigeyen ŋa.
Ken ŋa,
an ga da tanbo be ro i ya,
i da a tuga an ŋa.
13 Xa,
an ga na ɲaxanyigande dabari,
misikiinun do serekaaron do jogooninton do finkinton ya xiri yigeyen ŋa.
14 Ken ya ni wulluliŋontaaxun wa an da,
baawo ikun ra nta a me ɲaana an da.
Alla na an tuga a yi komo teleŋonton wundi koota. »
[Ɲaxanyigandi xooren masayila]
15 Ku sefo koni falle,
yigaano ku baananbe ti Isa da :
« Wulluliŋontaaxun wa seren da,
sere be gaa riini yige Allantunkaaxun noxon ŋa ! »
16 Isa da ke masayila ko a da,
nan ti :
« Ke ɲa yugo yogo ya yi,
a ga da yigandi xoore dabari na seri gabe xiri.
17 Yigeyen waxatin ga kiɲe,
a da i komen xayi ti a nan daga a ko seron da ti i nan ri,
yiganden moyi.
18 Xa baananbe su da bante lonjuuru ko.
Baane ti kome ke da :
“ N da soxante xobo,
n nan xawa dagana te ke faayi,
xa yanpa inke maxa. ”
19 Yogo tana ti :
“ N da soxogunbunu tanmi xobo,
n wa dagana i tan faayi,
xa yanpa inke xa maxa. ”
20 Yogo tana xa ti :
“ N faayi ga giri yaxi ya,
ken kuŋa inke ra nta dagana. ”¤
21 Kome ke ga yille katta i kamanyugon ŋa,
a da ku jaabunu kiɲandi a yi.
Kamanyugo ke mome ;
a ti kome ke da :
“ Daga bera xooron do beddun ŋa kuruma,
an na misikiinun do serekaaron do finkinton do jogooninton xiri. ”
22 « Wuce dangi falle,
kome ke ri a ko kamanyugo ke da nan ti :
“ Kamanyugo,
an ga da in ɲaamari fo be yi,
n da a dabari,
xa harisa taaxuran su ma ɲame. ”
23 Kamanyugo ke yille tini i kome ke da :
“ Bogu an nan daga do gundunkillun do tenkillun ŋa,
an na seron xiri,
moxo su kanma,
i nan ri kuudo in kan nan fogu.
24 N wa a koono axa da nan ti :
sero ku beenu ga ɲi ga xiri yigeyen ŋa,
hari sere baane ntaxa in yiganden yigana.
” »
[Isanxaranlenmaaxun xotoye]
25 Koota yi,
jama xoore ɲi do Isa batten ŋa.
A fallaxiri do i ya,
nan ti i da :
26 « Sere be ga na sukke do in ŋa,
a kaman ga ma in fasu i ma do i faaba yi,
na in fasu i yaqen do i renmun do i waaxinun ŋa,
na in fasu hari i yinme yi su,
ken kaman ra nta ɲaana in xaranlenma yi.
27 Sere wo sere ga ma i sallibinsollen wutu¤ nan sukke do in ŋa,
a kaman ra nta ɲaana in xaranlenma yi.
28 « Sere be gaa a mulla na sankanso gille taga,
a kaman taaxunu ya na jaatiragaye ɲa,
na a faayi selli xaalisi gabe gaa i maxa na golle ke dabari.
29 Ken ga fe,
a ga na sankanso ke taganden jopa nan ri konto a tinmandini,
seron ga na ken wari,
i wa soyini a yi,
30 nan ti :
“ Ke yugo da taganden jopa,
xa a konto a tinmandini. ”
31 « Kundun ya ni xadi,
tunkanyugo be gaa a mulla na i me tunkanyugo gaja,
a taaxunu ya fina na jaatiragaye dabari selli a do i wujunun tanmi kuranlenma ra gaa xenne tunkanyugu baane ke do i tanpillen wujunen kuranlenman ŋa.
32 Selli a ra ga nta a yi,
saado i naxan gaa tinkoono,
a na sero xayi tunkanyugu baane ke yi,
na genmen muuru a maxa. »
33 Isa ti :
« Ken ya ni,
sere su nta axa yi,
fo be ra gaa ɲaana in xaranlenma yi,
a kaman ga ma kaari i kittudufon su ya yi falle. »
[Sapi daxanloxe]