[Allanbatikaxooren gurujeyen do Seren Renmen riye]
13
Isa Alimasiiwu bogunte Allanbatikaxooren ŋa,
xaranlenmon du baananbe ti a da :
« Xaranmoxo,
ke faayi !
An da ku gidintuufo wari ?
An da a wari i ga da ke taga moxo be ? »
2 Isa ti a da :
« An yaaxen wa ku tagandi xooro yi de,
a su riini guruje ya,
hari gidi baane nta toqo gidi baane kanma. »
3 Ken falle,
Isa daga taaxu Jayituunangide kanma,
Allanbatikaxooren jonkonmen ŋa.
Piyeeri,
Yaaxuba,
Yohanna,
kafiini Handere,
i do a senbe na a tirindi ti :
4 « Ken ɲaana kan bire ?
Kan taagumanse na a koyini o yi ti ku fiinu su tinmeyen tinko ? »
5 Isa xenu sefen ŋa kuŋa,
a ti :
« Xa da du koroosi sere su nan maxa axa sankundi.
6 Seri gabe wa du xayini ti in toxon ŋa nan ti :
“ Nke ya ni Kisindaanan ŋa.
” I na seri gabe ya sankundini.
7 Axa ga na fitinanun xibaaren mugu laatoyen do tinkoyen ŋa,
axa haqilun nan maxa bono !
Waajibin ya ni kun gaa ɲaana,
xa duna gille fe.
8 Xabiilanun wa gilli me xanne maxa,
jamaanun na giri me xanne maxa,
ɲiiɲen na saralle noqun su yi,
dullu xooron na kutundi,
ken su ni nuxunten jalan jopaadun ya yi.
9 « Axakun be ga ni,
xa da du koroosi de !
I wa riini axa xiili katta kiitikutaanon do allanxarankaanun ŋa na axa katu.
I wa riini axa sigindi fankamanun do tunkanyugun jon ŋa do in batten ŋa,
axa na seede in da i jon ŋa ti axa gaa ke be tu.
10 Ayiwa,
waajibin ya ni Xibaari Liŋen gaa koniini xabiilan su da.
11 « I ga na axa ro fankan kittun ŋa,
xa maxa jooti axa gaa ke be koono.
Sefe be ga na yanqa axa sondomun ŋa ken sigira yi,
xa da a ko,
baawo axakun sefe feti ken ŋa ;
Fanka Sennen ya sefe ni.
12 Waaxin wa i waaxin roono kittu yi kuudo a n kara ;
faabe wa i renmen roono kittu yi ;
renmun wa riini giri i saaraanon xanne maxa na i ɲamallexu.
13 Seren su wa xonnaaxun wuttu katta axa yi inke saabu da.
Xa sere be ga na muɲi ma fin lagaru,
ken kaman ya n kisiini.
14 « Axa wa riini bonondindaana haraamunten wari duumene noqu yi a ga ma xawa noqu ke be yi.
» (Xaranŋaanan na yere faamu de !)
« Ken bire ga na sere be ɲi Yehuuda maran ŋa,
an nan wuru dagana gidi gillun ŋa.
15 A ga na sere be ɲi xuben kanma,
an nan maxa yanqa nan ro an xuben noxon ŋa nan ti an wa fo wuttu.
16 A ga na sere be ɲi teenun ŋa,
an nan maxa yille nan ti an wa an doroken wuttu.
17 Koni bone da nuxunton do sugundindaanon ya xooro ken koota yi sa !
18 Xa da Alla ɲaaga axa wuruyen nan maxa gemu waxati xote yi,
19 baawo ken koota,
xoteye be gaa ɲaŋiini,
gelli Alla na duna taga,
ken me ma demu nan ɲaŋi.
A me tana ntaxa ɲaŋiini xa mene.
20 Kamanen ga n maxa kun kooto defondi,
sere su ma ɲi kisiini.
Xa a da i defondi ti i seri sugandinton ŋa.
21 Ken waxati,
sere be ga na ti axa da :
“ Kisindaana ke faayi yere !
” ma “ A faayi dooke !
” xa maxa saxu a yi.
22 Du-alimasiiwunun do duxayifaarun wa bangeene,
i gaa taagumansun do kaawafiinun dabarini kuudo na seron sankundi,
i ga ma kori,
i na hari Alla seri sugandinton yinme sankundi.
23 Axakun kuŋa,
xa da du koroosi de !
N da axa sobindi fin su kaane.
24 « Kun koota xoto dangi falle ya ni keeta,
kiyen na bita,
xason ntaxa ɲelunqene,
25 saanun na yere gilli kanmun ŋa,
kanmun senbun su na saralle.*
26 « Ken bire,
nke be ga ni Seren Renmen ŋa,
i na in wari riini xaban noxon ŋa,
n do senben do nooro xoore.
27 Ken koota,
n na maliikanun xayi na seri sugandinton kafu me yi do duna tattu ku naxati su yi,
gelli ke yinme ma ken yinbaane.
[Turon masayila]
28 « Turon nan ɲaŋi axa da misaale yi :
turon ga na funti bire be,
derun ga bogu,
axa wa a tuunu nan ti kandaaran kiɲe.
29 Ken moxo baane ya ni,
axa ga na ku fiinu wari,
axa na a tu ti waxatin tinko,
a kiɲe fonlaqen ŋa.
30 Tonŋu,
n na a ko axa da,
ku sero nta kalla na a ɲi ku fiinu ma ɲaŋi.
31 Kanmun do ɲiiɲen wa buruxeene,
xa inke sefen nta buruxeene abada.
32 « Xa,
ke koota do ke sanne,
sere su nta a tu ;
kanmun maliikanun nta a tu ;
Renmen yinme nta a tu ;
ma a ganta Baaba Alla baane.
33 Xa da du koroosi !
Xa da axa moxo sirondi,
baawo axa nta bire ke tu.
34 A na xoyi yugo yogo ya yi,
a gaa dagana tere,
a ga da i kan xaliifa i komo yugun ŋa,
na baane su sigan toxo a maxa.
Ken falle,
a da a ko ganlaqitangandaanan da nan ti a nan maxa xenqe.
35 Ken kuŋa,
xa maxa xenqe de !
Kaagumen gaa riini bire be,
axa nta a tu.
A riini lellen ya yi,
ma a riini kaananan ya yi,
ma a riini selinsefon ya yi,
ma a riini suxuban ya yi ba,
axa nta a tu.
36 A riyen nan maxa axa ju a gaa axa ɲiini xenqene.
37 N ga da ke be ko yere,
n da ken ya ko a su danŋa :
xa maxa xenqe ! »