[Janbayen siitiye ti Isa Alimasiiwu yi]
14
Bito filli Pesaxansallen do Buurunxecansallen kaane,
sadaxakiɲandaananyinmankon do sariyanxaranmoxonun wa feera muurini kuudo i ra gaa Isa Alimasiiwu gotontanlagana na a faatindi moxo be.
2 I ti kuŋa :
« O n maxa a raga sallen noxon ŋa,
ken ga fe jaman wa murutini. »
[Ten joxiye Isa yinmen ŋa]
3 Ken da Isa ɲi Simoona kan ŋa,
ken ga ni fatanwattiburigume yogo yi,
a gaa Beyitaani deben ŋa.
Isa gaa yigeyokken kanma,
yaxare yogo do woridon faranpare ri,
misikinji jonko xote gaa a noxon ŋa,
i gaa a xilli « naari ».
Yaxare ke da woridome ke kara,
na misikinji ke joxi Isa dellen ŋa.
4 Ku beenu gaa non ŋa,
ken golle ma liŋo i yogonu da,
i ti :
« Ke misikinji bononden da manne siro an ŋa ?
5 A ra ɲi gaagene na kamo sikki godoxulle¤ kita,
ken ra ga ɲi kinini misikiinun ŋa.
» I da fo ko yaxare ke da siri.
6 Xa Isa ti :
« Xa da a wara.
Axa baqa a yi manne ?
A faayi ga da golli siren ya dabari in da kundu.
7 Misikiinu ku be ga ni,
axa do kun na me maxa ya kootan su ;
axa ra wa fo sirono i ya waxati su ga da axa saga.
Axa do inke ken xa nta toqo doome.
8 Yaxare ke ga n katta ke be da,
a da ken ya dabari.
A da in waxari katta in firindikootan ya yi.
9 Tonŋu,
n na a ko axa da :
Xibaari Liŋen ga na laxami duna noqu su,
ma ke yaxare xa ke golle ga laxami non ŋa,
seron gaa sinmene do a yi. »
[Yehuuda janbaye]
10 Isa faaru ku tanmi do fillon du baananbe be toxon ga ni Yehuuda Hisikarooti,
a daga sadaxakiɲandaananyinmankon sagata kuudo na Isa janbantanlo i kittun ŋa.
11 Ke xibaare mukken da sadaxakiɲandaananyinmankon sewondi moxosiri,
ma i gaa xaalisin laayidun wuttu Yehuuda da.
Yehuuda ken do feeramuuriyen ya na me keeta i ra gaa Isa janbantanloono kittu yi moxo be.
[Pesaxansallen yigandi dabariye]
12 Buurunxecansallen koota fana,
koota ke be Pesaxanjaxen xurusinden gaa ɲaana,
Isa faarun ti a da :
« An na a mulla o n daga Pesaxansallinɲaaxamen soro minna yi ? »
13 A da sero filli xayi bakka i faaru ku yi nan ti i da :
« Xa daga kaanun ŋa,
axa wa yugo yogo walla,
taafakkan gaa a maxa,
axa na sukke do a yi,
14 a ga na ro ka be yi,
axa na ti ken kaagume da :
“ O xaranmoxo ti i do i faarun na Pesaxanɲaaxamen yigana kan konpe yi ? ”
15 A wa konpe yogo koyini axa yi sankanson kanma,
konpo xoore a do i yokku,
a moxogemunte ;
axa na Pesaxansallen fo wo fo ɲaana non ya yi o da. »
16 I daga ma i gaa riini kaanun ŋa,
a ga da a ko i da moxo su,
i da a ɲi kundun ya yi.
I daga Pesaxansallen moxon gemundi.
17 Wuron ga ro,
Isa do i faarun tanmi do fillon kiɲe kaanun ŋa.
18 I gaa yigeyokken kanma,
a ti i da :
« Tonŋu,
n na a ko axa da,
n do axa be gaa yigeyokke ke kanma,
axa du baananbe wa in janbana. »
19 Ke sefe konŋen saabu da,
i su suno ;
baane su toxo tini :
« Xori inke fe ? »
20 Isa ti i da :
« Axa du baananbe ya ni,
n do a kaman kitten faayi yigandinyokken ŋa.
21 Tonŋu,
nke be ga ni Seren Renmen ŋa,
nke ken wa kalla xoyi Safandi Sennun ga da a ko moxo be.
Xa bonen wa seren da,
ke be ga ɲa sababu yi na Seren Renmen janba.
Hari ken kaman gan n maxa bange ya n ɲi ga n fasu a da. »
22 I gaa yigene,
a da buurun wutu,
na Alla tiiga ;
a da a kutu-kutu faarun naxa nan ti :
« Xa da ke raga :
n fatantiyen ya ni. »
23 A saage jiranxollen wuttu na Alla tiiga xadi,
na a kini i ya.
I su da fo mini.
24 A ti i da :
« Ke ni in foren ya yi,
laayidun ga tafi ti fore ke be yi,
a gaa joqo seren su junuubuxafariyen da.
25 Tonŋu,
n na a ko axa da,
nan ti inke ntaxa reesenji minni keeta,
ma koota be in ga na yille a mini Allantunkaaxun noxon ŋa. »
26 Isa do i faarun ga duguta xasiidan ŋa,
i giri nan daga Jayituunangide.
[Piyeeri kuteyen xibaare]
27 Isa ti i da :
« Axa su wa jikkirankutini nan wuru in ŋa,
xoyi a safanten gaa a yi nan ti :
“ N wa nagaanan sanpana,
jaxon na sanqi. ”*
28 « Xa,
n ga na wundi bakka kallen ŋa,
n wa telle axa kaane Galiile. »
29 Piyeeri ti a da :
« Hari a su ga na jikkirankuti,
nke ken nta wurunu an ŋa de ! »
30 Isa ti a da :
« Tonŋu,
n na a ko an da,
lenki wuro,
saado selinganman gaa sefene ta fillo,
an wa in nakkarini ta sikko. »
31 Xa Piyeeri da a ko na a xurandi nan ti :
« Hari in gan kalla do an ŋa ya,
n nta an nakkarini.
» I su xa da ken ya ko.
[Isa allanbatiye Getisemaani yi]
32 I kiɲe noqu yogo i wa non xilli :
« Getisemaani »¤,
a ti i faarun da :
« Axa toxo yere katta in gaa dugutana allanbatiyen ŋa. »
33 A do Piyeeri do Yaaxuba do Yohanna daga.
Ken noqu,
lasamayen do jooten da a raga.
34 A ti i da :
« Tooxen faayi in karini.
Xa toxo do in ŋa yere,
axa n wuyi axa yaaxon ŋa. »
35 A ga laato bakka i ya fonne,
a bifi ɲiiɲen ŋa a gaa Alla ɲaagana nan ti selli ke waxati ra gaa dangini i ya.
36 A ti :
« Baaba,
an ya n katta fo wo fo su da,
ke xaraxan xaraxace laatondi in ŋa !
N ma ti inke liŋun de !
Xa fi be ga n liŋi an da. »
37 A gaa riini,
a da a ɲi faarun wa xenqene.
A ti Piyeeri da :
« Simoona,
an xenqe ya ?
An ma katu hari wucu lamaane ɲaana an yaaxon ŋa ?
38 Xa toxo axa yaaxon ŋa na Alla ɲaaga,
kuudo Ibiliisa na waase axa jaarabini.
Fo siri ɲanŋen nan liŋi yonkin da,
xa faten nan lanpunta. »
39 A saage laatono bakka i ya xadi,
na Alla ɲaaga ti kun digan baanu yi.
40 A ga saage riini xadi,
a da i ɲi xenqene,
baawo xenqon diginten ɲi i ya.
I nta a tu i gaa ke be koono a da.
41 A saage riini ta sikkandin ŋa,
a ti i da :
« He,
axa finna xenqene ya ?
Axa finna tuumana ya ?
Waxatin faayi ga kiɲe,
Seren Renmen wa roono junuubuɲaŋaanon kittun ŋa.
42 Xa giri !
O n daga !
Ke be ga da in janba,
a riyinten faayi. »
[Isa rageye]
43 A ma hari duguta i sefen ŋa,
ma Yehuuda riyinten faayi,
ken ga ni faaru ku tanmi do fillon du baananbe yi,
a do jaman xoore,
i do jaraxonun do gumo,
sadaxakiɲandaananyinmankon do sariyanxaranmoxonun do xirisun ga da i wara riini.
44 Ken da a ɲi,
janbante ke da taagumanse yogo ko sero ku da nan ti :
« N ga na sere be xandunsunbu,
a ya ni ;
axa na a raga,
do a nan daga na a koroosi moxosiri xa mene. »
45 Ayiwa i ga joofe tan,
a tinko a yi nan ti a da :
« Xaranmoxo !
» Ken falle a da a xandunsunbu.
46 Ken sigira su yi,
kuttun da i kitten saxu a kanma na a raga.
47 A ga ɲaŋi sero be jon ŋa,
baane da i jaraxon bagandi,
na sadaxakiɲandaananyinmanken komen sanpa,
na a taron kutu.
48 Isa ti i da :
« Axa do jaraxonun do gumon ya n riini katta in ŋa kundu xoyi killimaxasaqaanan ya ga ni in ŋa !
49 N do axa su ɲi me kanma Allanbatikaxooren ŋa koota su,
n gaa xaranŋundindini,
axa ma in raga.
Xa ke su ɲa ya kuudo Safandi Sennun ga da ke be ko na tinme. »
50 A faarun su sanqi bakka a yi,
nan wuru.
51 Maxanbaane yogo ɲi sukkene do a yi,
xupiyiraamen baane ya n ɲi feneene a yi,
i da ken raga.
52 Xa a da i xupiyiraamen sedi,
a duurun binnen wuru.
[Isa kiitiye]
53 I do Isa daga sadaxakiɲandaananyinmanken kan ŋa.
Sadaxakiɲandaananyinmanko,
xirisu,
a do sariyanxaranmoxonu,
a su da me ɲi.
54 Piyeeri da du toxo falle laatoyen ŋa,
nan sukke do a yi ma sadaxakiɲandaananyinmanken kan ŋa.
A taaxu nan taxamu kapa tangandaanon ŋa.
55 Sadaxakiɲandaananyinmankon do Kiitikutaanon sapan su wa seeda muurini ti Isa yi,
kuudo kiiten na a kari,
xa i ma a kita.
56 Seri gabe seedaburuseede,
xa ken do i fi su,
i yinmenu duurun kori genme xanne.
57 Yogonu giri sigi nan seedaburuseede ti a yi nan ti :
58 « O da a mugu a gaa tini ke Allanbatikaxoore kundu,
seron kitten ya n da a dabari,
ike wa a karana,
xa bito sikki noxo,
i na fo tana sigindi, kitte ga ma fo be taga. »
59 Xa ken do i fi su,
i ma katu genme xanne yi seedaburuseedeyen ŋa.
60 Sadaxakiɲandaananyinmanken giri sigi jaman naxan ŋa na Isa tirindi ti :
« Ayiwa,
ku gaa seedene ti an ŋa ti ke su yi,
laqen nta anken ŋa ya ba ? »
61 Xa aken wa kuurunu de ;
a nta fo wo fo koono.
Sadaxakiɲandaananyinmanken saage a tirindini nan ti :
« An ya ni Kisindaanan ŋa ba ?
Tiigetunken Renme ? »
62 Isa ti :
« Yabo,
nke ya ni,
axa wa riini Seren Renmen taaxunten wari Raniyaanan tayen ŋa,
na a riyinten xa wari xaban noxon ŋa gilli kanmun ŋa. »
63 Isa ga da ke ko,
sadaxakiɲandaananyinmanken maxa,
a xenperandangi.
A butu ma a gaa i yiraamun booxono nan ti :
« O manne haaju na seeda yi keeta ?
64 Axa yinmenu da a xajafinden mugu.
Axakun ti kan moxo ?
» A su ti a n xawa kalla ya tan.
65 Yogonu xenu raxanjin tufanden ŋa a yi,
na a yaaxon siiti,
nan toxo a gonmorini i gaa tallan tini :
« Ko baane n da an katu,
selli annabinyinmen ya ga ni an ŋa,
a kaman ko ke !
» Tangandaanon xa da a raga na a fenta.
[Piyeeri nakkariye]
66 Piyeeri gaa wureedun ŋa kan noxon ŋa,
sadaxakiɲandaananyinmanken tunbaare yogo xosi ri.
67 A ga da Piyeeri wari taxamunu,
a da a tu.
A ti a da :
« An xa do Isa ɲi doome yi mene,
Nasaaranke ke ! »
68 Xa a nakkari nan ti :
« N nta a tu anken ga fo be koono kundu,
n ma a faamu yinme.
» Ken falle,
a bogu nan daga sigi bulunŋen ŋa.
Ken sigira,
selinganman sefe.
69 Tunbaare ke ga da a wari,
ku be gaa non ŋa,
a yille tini kun xa da :
« Ke yugo xa ni sero ku du baananbe ya yi ! »
70 Piyeeri nakkari xadi.
Wucinne falle,
ku be gaa non ŋa,
i xa ti Piyeeri da :
« Tonŋun ya ni,
i du baananbe ya ni an ŋa,
Galiilenken xa yi ni an ŋa mene. »
71 Piyeeri xosi toxo kunana na du langa nan ti :
« Nke nta ke yugo tu ! »
72 A gaa ken koono,
selinganman sefe ta fillandin ŋa.
Ken noqu,
Piyeeri xosi sinme do Isa sefe be a ga ti :
« Saado selinganman gaa sefene ta fillo,
an wa in nakkarini ta sikko.
» A wu wuyi xote.