Luka 22

[Yehuuda janbaye]

(Mace 26.1-5 ; Maarika 14.1-2 ; Yohanna 11.45-53)

, i gaa a xilli «  », a tinko. 2  do wa feera muurini, i ra gaa Isa Alimasiiwu faatindini moxo be, xa i wa kanna seron ŋa.

(Mace 26.14-16 ; Maarika 14.10-11)

3 Isa ga da i faaru tanmi do fillo sugandi, , i gaa a tini a da : « Hisikarooti » i du baananbe ya ni, da a kita. 4 A daga katta sadaxakiɲandaananyinmankon do Allanbatikaxooren koroosindaanon yinmankon ŋa. A do i sefe i ra gaa Isa janbantanloono i kittun ŋa moxo be. 5 Ken liŋo i da moxo siri. I da laayidun kini Yehuuda i yi nan ti a ga na ken dabari su, i wa xaalisin haqe yogo kinni a yi. 6 Yehuuda duŋe. A toxo feeramuuriyen ŋa keeta, i ra gaa Isa janbantanloono kittu yi moxo be, jaman ga nta bakka a seeda.

[Pesaxan yiganden dabariye]

(Mace 26.17-20 ; Maarika 14.12-17 ; Yohanna 13.21-30)

7 Buurunxecansallen kootan ga kiɲe, i nan xawa Pesaxanjaxen ya xurusini. 8 Isa da Piyeeri do Yohanna xayi nan ti i da : « Xa daga Pesaxansallinɲaaxamen dabari o da o na a yiga. » 9 I da a tirindi ti : « An na a mulla o nan daga a soro minne ? » 10 A ti i da : « Ayiwa, axa royinto deben noxon ŋa, axa wa yugo yogo walla, taafakkan gaa a maxa ; axa na sukke do a yi. A ga na ro ka be yi, 11 axa na ti ken kaagume da : “ O xaranmoxo ti i do i faarun na Pesaxanɲaaxamen yigana kan konpe yi ? ” 12 A wa konpe yogo koyini axa yi sankanson kanma, konpo xoore a do i yokku ; axa na Pesaxansallen fo wo fo ɲaana non ya yi. » 13 I daga, Isa ga da a ko i da moxo be, a su ɲa i da kundun ya yi. I daga Pesaxansallen moxon gemundi.

[Isa yigandi lagare]

(Mace 26.21-29 ; Maarika 14.18-25 ; 1 Korintinko 11.23-25)

14 Yige biren ga kiɲe, Isa do i taaxu nan yige. 15 A ti i da : « A liŋo in da moxo siri in do axa na Pesaxan yiganden yiga doome saado in gaa toorene. 16 Baawo, n wa a koono axa da, nan ti, n ntaxa ke yigande me yigana xadi ma waxati be, Pesaxan maanan ga ni fi be, ken ga n ɲaŋi noxon ŋa ti in faatiyen ŋa. » 17 A da jiranxollen wutu, na Alla tiiga, a ti : « Xa da ke raga axa su na fo mini, 18 baawo in wa a koono axa da, nan ti in ntaxa reesenji minni keeta o do Allantunkaaxun gaa riini. » 19 Ken falle a da buurun wutu, na Alla tiiga, a da a kutu-kutu i naxa nan ti i da : « Ke ni in fatantiyen ya yi, n gaa a kuyini axa da. Axa na toxo a dabarini na in sinma ti a yi in kallen falle. » 20 Yigeyen falle, a da jiranxollen kini i ya xadi, nan ti i da : « Ke ni in foren ya yi, laayidu kurunban ga tafi ti fore ke be yi, a gaa joqo axa junuubuxafariyen da. 21 Xa ganta, sere be gaa in janbana, n do a kaman su kitten faayi yigandinyokken ŋa. 22 Ayiwa, nke be ga ni ŋa, nke ken wa kalla xo Alla ga da a rakutu moxo be, xa sere ke be gaa in janbana, bone wa a kaman da. » 23 I xosi toxo me tirindini nan ti : « Ko na o yi, a gaa ken ɲaana ? »

[Wurugintaaxun do maxayanqantaaxu]

24 Faarun da me kuta do darontaaxun batten ŋa. 25 Isa ti i da : « Tunkanyugun na jamaanen renmun marana ti fankan ya yi. Senbenton xa na ti du da, “ fosiriɲaŋaano ”. 26 Xa, axakun xallen feti ken moxo yi de. Sere be ga ni axa su seri daren ŋa, ken kaman ya n xawa ɲaana axa su fo maxayanqanten ŋa. Fankan gaa sere be yi, ken kaman nan xawa ɲaana xoyi golliɲaŋaanan ya yi, kuttun da. 27 Ken kuŋa, yigaanan do yigandi taxandindaana, ko baane ni xirisen ŋa ? Sere be gaa yigandinyokken yinmen ŋa, ken ya feti xirisen ŋa ba, ma kan moxo ? Ayiwa, nke na axa naxa xo sere be gaa yiganden taaxundini seron wure yi ya. 28 Axa ya n katu muɲini do in batten ŋa, n ga yaaxandunben ŋa bire ke be. 29 Ken ya saabu da, n xa gaa tunkaaxun kinni axa yi, xoyi in Faaba ga da a kini in ŋa moxo be, 30 kuudo in do axa na yige nan mini doome in tunkaaxun noxon ŋa. Axa xa na taaxu tunkantaaxaadun kanma na xabiilanun tanmi do fillon kiiten kutu. »

[Piyeeri nakariye Isa yi]

(Mace 26.31-35 ; Maarika 14.27-31 ; Yohanna 13.36-38)

31 Isa ti Piyeeri da : « Simoona, Simoona ! Ibiliisa da a muuru i na an woyi xo yillen moxo. 32 Xa inke da Alla ɲaaga an da, kuudo danqanaaxun nan maxa duguta an ŋa. An ga na saage, an na an waaxinun butten xotondi. » 33 Xa, Piyeeri ti a da : « Kamanyugo, n moxo sironten ya ni nan daga do an ŋa kason ŋa, nan kara do an batten ŋa xa mene ! » 34 Isa ti a da : « N wa a koono an da Piyeeri nan ti, selinganman nta sefene lenki na a ɲi, an ma in nakkari ta sikko nan ti an nta in tu. »

[Isa Faarun moxosirondiye]

35 A ti i da : « Ta ke be in ga da axa xayi, n ga ti axa do xaalisiroofo do booto do tepu nan maxa daga, yaala fo konto axa yi ba ? » I ti a da : « Fo wo fo ma konto o yi. » 36 A ti i da : « Ayiwa saasa ke, xaalisiroofo gaa sere be maxa, a kaman na a wutu ; booto gaa sere be maxa, a kaman na a wutu ; jaraxo ga nta sere be maxa, a kaman na i doroko xooren gaaga na labo xobo. 37 Baawo, fo be gaa Safandi Sennun ŋa, n wa a koono axa da ken ni ya :

“ A jaate kafiini golliburiɲaŋaanon ŋa. ”

« Ken na in kitana ya. Ken kuŋa, n fiinun faayi joofene i ɲameran ŋa. » 38 Faarun ti : « Kamanyugo, jaraxonu filli faayi. » Isa ti : « A wase ke yi keeta. »

[Isa dagaye allanbati Jayituunangiden kanma]

(Mace 26.36-46 ; Maarika 14.32-42)

39 Isa bogu nan daga kanma, xoyi a ga demu a yi moxo be. A faarun daga do a batten ŋa. 40 I ga joofe, a ti i da : « Xa da Alla ɲaaga kuudo Ibiliisa na waase axa jaarabini. » 41 Ken falle, a laato bakka i ya fonne, nan tusi na Alla ɲaaga, 42 a ti : « N Faaba, selli a gaa genme an ŋa, ke xaraxan xaraxace laatondi bakka in ŋa, a nan maxa in kita. Xa inke liŋun nan maxa ɲaŋi de ; an liŋun ya nan ɲaŋi. » 43 {Maliika yogo xosi giri kanxotten ŋa nan ri a butten xotondi. 44 Hanmin da Isa raga, a da Alla tallan ɲaaga. A futi ma a futten gaa tollini ɲiiɲen ŋa xo foren gaa tollini moxo be.}

45 A ga duguta allanbatiyen ŋa, a giri nan saage katta faarun ŋa. A da a ɲi i suno ma i gaa xenqene. 46 A ti i da : « Manne saabu da axa gaa xenqene ? Xa giri axa na Alla ɲaaga kuudo Ibiliisa na waase axa jaarabini. »

[Isa rageye]

(Mace 26.47-56 ; Maarika 14.43-50 ; Yohanna 18.3-11)

47 Na Isa toxo sefen ŋa, jama yogo ri katta a yi. Yehuuda, aken ga ni faaru ku tanmi do fillon yogo yi, a wa jama ke kaane. A tinko Isa yi na a xandunsunbu. 48 Isa ti a da : « Xanantankuuɲinden noxon ya ni, an gaa Seren Renmen janbana ? » 49 Sero beenu gaa do Isa batten ŋa, i ga da a wari fo be gaa riini ɲaŋi, i ti Isa da : « Kamanyugo, o n gaja ti o jaraxonun ŋa ba ? » 50 Sero ku yogo xosi sadaxakiɲandaananyinmanken komen sanpa, na a taru tayen kutu. 51 Xa Isa ti : « Xa sabari ! » A ga kati yugo ke taron ŋa, a saha. 52 Ken falle sadaxakiɲandaananyinmankon do Allanbatikaxooren koroosindaanon yinmankon do xirisun beenu ga ri a xanne maxa, Isa ti i da : « Axa do jaraxonun do gumon ya n ri katta in ŋa xo killimaxasaqaanan ya ga ni in ŋa ! 53 N wa axa maxa Allanbatikaxooren noxon ŋa koota su ; axa ma in raga. Xa ke ni axa waxatin ya yi, Ibiliisa waxatin ya ni. »

[Piyeeri sankuye Isa yi]

(Mace 26.57-58, 69-75 ; Maarika 14.53-54, 66-72 ; Yohanna 18.12-18, 25-27)

54 I da Isa raga do a nan daga sadaxakiɲandaananyinmanken kan ŋa. Piyeeri da du toxo falle laatoyen ŋa. 55 Yinben kumunten wa dingiran naxaanen ŋa. Piyeeri taaxu kafiini sero beenu gaa yinbe ke xannen ŋa. 56 Tunbaare yogo ga da Piyeeri wari taaxunu yinbinxuran ŋa, a da i yaaxen tonto a yi nan ti : « Ke yugo xa ɲi do a batten ŋa ! » 57 Xa Piyeeri nakkari, a ti : « Yaxare, n nta ke yugo tu de ! » 58 Wucinne falle, yugo yogo xa da a wari, a ti : « An xa ni sero ku yogo ya yi mene. » Piyeeri ti : « N yugo, nke fe lewu ! » 59 Wucu laate falle xadi, yogo tana da a ko na a xotondi, ti : « Tonŋun ya ni, ke yugo xa ɲi do a ya batten ŋa, baawo Galiilenken ya ni. » 60 Piyeeri ti : « N yugo, n nta a tu anken gaa a mulla na ke be yinme ko. » Na a toxo sefen ŋa, selinganman sefe. 61 Kamanyugo tiirinbe na i yaaxen tonto Piyeeri yi. Piyeeri xosi sinme do Kamanyugo ga da sefe be ko i da, ken ga ni : « Saado selinganman gaa sefene lenki, an wa a koono ta sikko ti an nta in tu. » 62 Piyeeri bogu sellan ŋa nan wu moxo siri.

63 Sero beenu gaa Isa koroosini, i wa a ɲaxandini, na a katu. 64 I da a yaaxon siiti nan toxo tini i a da : « Ko baane n da an katu ? A kaman ko ke selli annabinyinmen ya ga ni an ŋa ! » 65 I wa sefe buru tananu koono a da.

[Isa sikke kiitikuti sapan jon ŋa]

(Mace 27.1-2 ; 11-14 ; Maarika 15.1-5 ; Yohanna 18.28-38)

66 Yillen ga kare, Yehuudiyan xirisun sapan do sadaxakiɲandaananyinmankon do sariyanxaranmoxonun meɲi, na Isa xiri katta i ŋa. 67 I da a tirindi nan ti : « A ko o da selli an ya ga ni ke yi. » Isa ti i da : « N ga na a ko axa da, axa nta saqa in ŋa ; 68 n ga na axa tirindi fo yogo xa yi, axa nta in jaabini ken xa yi. 69 Xa, Seren Renmen dagana taaxu Alla Raniyaanan tayen ya yi keeta. » 70 I su xosi ti : « Ken kuŋa ya ni an ŋa ba ? » A ti i da : « Axa ga da ke be ko, n ya ni ken ŋa. » 71 I ti : « O manne haaju na seeda yi keeta ? O da a mugu a yinme raqen ya yi. »