[Isa Alimasiiwu Pilaati jon ŋa]
27
Gelli suxuba fana,
sadaxakiɲandaananyinmankon do xirisun su gemu a yi nan ti Isa Alimasiiwu nan kara.
2 I da a yetu,
do a nan daga Roomunko maranyinmanken noqu,
ken ga ni Pilaati yi,
na a kini a yi.
[Yehuuda kalle]
3 Faare ke be ga da Isa ro kittu yi,
ken ga ni Yehuuda yi,
a ga da a tu ti i faayi Isa karini ya,
a nimisi i golli ɲaŋunten ŋa.
A da tanjikken godoxullen saaga sadaxakiɲandaananyinmankon do xirisun ŋa.
4 A ti i da :
« N da yangon kita,
n da fatemullen¤ kini kallen ŋa.
» I ti a da :
« O fin nta a yi !
Ken ni an ya xibaare. »
5 Yehuuda da xaalisin fitta Allanbatikaxooren ŋa,
a bogu nan daga.
A ga laato,
a da kacen ro i xannen ŋa,
nan jellenkure nan kara.
6 Sadaxakiɲandaananyinmankon da xaalisi ke wutu nan ti :
« O ma xawa ke xaalisi kapa allanbatikan naaburen ŋa,
baawo naaburu mexenten ya ni. »
7 I su gemu xanne yi nan ti i na lallitagaanan¤ yogo ɲiiɲen xobo.
I ga da ken ɲiiɲe xobo,
i da a ɲa mukkunun da furungooru.
8 Ken ya saabu da,
hari ke lenki,
non gaa xiriini :
« Foron te. »
9 Ken moxo,
annabi Yirimaahu ga da sefe be ko na tinme a ga ti Alla ti :
« I da tanjikke godoxulle raga.
Banisirayilaganko da ken ya raga yonkin diyan ŋa.
10 I da a kini lallitagaanan ŋa ɲiiɲen jonko,
Xoyi Tunka Duumanten ga da in ɲaamari moxo be. »*
[Isa dagaye Pilaati noqu]
11 I do Isa ga daga katta Pilaati yi,
aken be ga ni maranyinmanken ŋa,
a da a tirindi nan ti :
« Yehuudiyanun tunkanyugon ni an ya yi ba ?
» Isa jaabi nan ti a da :
« An ga da a ko. »
12 Sadaxakiɲandaananyinmankon do xirisun da Isa jalagi,
xa a ma ikun jaabi ti fo wo fo.
13 Pilaati ti a da kuŋa :
« I gaa ke su roono an kanma,
an taron nta a yi ya ba ? »
14 Isa ma a jaabi hari digan baane yi,
ma Pilaati ken yinme gaa kaawana ken ŋa moxoburu.
15 Ken bire,
Pesaxansallen ga na ɲi ɲaana siine su,
kasoranke be bakken ga n liŋa jaman da,
maranyinmanken na ken kasoranke bagandi.
16 Ken da a ɲi,
yugo yogo wa kason ŋa,
a su wa a tu nan ti golliburiɲaŋaana xoore ya ni,
a toxon ga ni {Yesuwa}¤ Baraaba.¤
17 Jaman ga da me ɲi,
Pilaati da i tirindi nan ti :
« Anhan,
{Yesuwa} Baraaba,
a do i gaa Isa ke be xilli “ Kisindaana ”,
n na kan baane wara ? »
18 Na a tugu ti Pilaati wa a tu nan ti haasidaaxun baane ya n sigi Yehuudiyanun xirisun do Isa ga ri katta ike yi.
19 Pilaati gaa i kiitikutitaaxaaden kanma,
a yaqen da faaren wara a yi nan ti :
« Laato bakka ke yugo yi de,
sere xullen ya ni,
baawo in da du wari kuyin ŋa wuri,
n gaa yanganxata xoore yi do ke yugo batten ŋa. »
20 Xa,
sadaxakiɲandaananyinmankon do xirisun wa jaman ɲonqini ti i nan ti maranyinmanken da,
a na Baraaba bagandi,
a na Isa kari.
21 Maranyinmanken ti i da :
« Ku sero filli,
axa na a mulla in na ko baane wara ?
» Xan baane jaman su ti :
« Baraaba ya wara ! »
22 Pilaati ti i da kuŋa :
« Isa ke be i gaa tini a da “ Kisindaana ”,
axakun ti in na manne ɲa ken ŋa ?
» Xan baane jaman su ti xadi :
« A genge do sallibinsollen ŋa ! »
23 Xa,
Pilaati da jaman tirindi ti :
« A da manne golli bure ken baane ɲa de ?
» I tallan xaaru,
nan ti :
« A genge ! »
24 Pilaati ga da a tu ti ike sefen nta fo sirono,
manqanŋen xa wa tallan xoorono,
a da jin wutu na i kittun wanqi jama ke su jon ŋa nan ti :
« Ke yugo karinde,
nke yinmen nta a wure.
Axa fin wa axa maxa. »
25 Jaman ti :
« A foron wa o do o bonsonŋun kanma ! »
26 Ken sigira su,
Pilaati da Baraaba wara i da,
xa a da katundaanon wara Isa yi.
Ken falle,
a bogu i do a naxan ŋa i na a genge.
[Soyiye Isa yi]
27 Ken bire,
i do Isa daga buuru ka xooren noxon ŋa.
Sorodaasin su da me ɲi non ŋa na a ro me naxa.
28 I ga da me ɲi,
i da Isa boora na tunkandoroke yogo rondi a yi.
29 I da saasinkufune yogo tulu na a ro a dellen ŋa.
I da guma yogo ro a sooxi tayen ŋa.
Ken falle,
i daga tusi a jon ŋa i gaa soyini a yi nan ti :
« Yehuudiyanun tunkanyugo !
An kuuɲinden faayi ! »
30 I toxo tufana a yi,
i da guma ke raga a yi,
nan toxo a katta i dellen ŋa ti a yi.
31 I ga soyi a yi nan tanpi,
i da tunkandoroke ke bagandi a yi,
na a yinme yiraamun ro a yi.
Ken falle,
i do a daga,
na a genge do sallibinsollen ŋa.
[Isa gengeye do sallibinsollen ŋa]
32 Sorodaasinun do Isa dagante,
i do Kireenenka yugo yogo xa gemu killen ŋa,
a toxon ga ni Simoona.
I da Isa sallibinsollen senbentan tiŋandi a yi.
33 I kiɲe noqu yogo yi,
i gaa non xilli « Gologoota ».
Ken wure ga ni :
« Yinkollanxotten dingira ».
34 I da fo xaraxace yogo kafu reesendolon* ŋa na a kini Isa yi ti a na a mini.
A ga da a temu,
a bara a yi.
35 I da Isa genge,
na sokkun wutu na a yiraamun taxandi me yi.*
36 I ga duguta,
i toxo taaxunu a kaaran ŋa na a tanga.
37 I da a karayinmen safa wallaha yogo yi na a genge do sallibinsolle ke yi a kanma nan ti :
« Ke ni Isa ya yi,
Yehuudiyanun tunkanyugo. »
38 Sorodaasinun da Isa do fayaano filli ya genge doome yi,
baanen wa a tayen ŋa,
baanen wa a noogen ŋa.*
39 Killidundangaanon xa wa i yinmun yonkono na Isa ka*
40 nan ti :
« Anken ya ma ti an ra wa Allanbatikaxoore ke gurujana nan yille a tagana bito sikki noxo ?*
Selli Allanlenmen ya ga ni an ŋa,
du kisi kuŋa !
Yanqa bakka sallibinsollen ŋa ke ! »
41 Ken moxo baane ya ni,
sadaxakiɲandaananyinmankon do sariyanxaranmoxonun do xirisun xa gaa soyini a yi nan ti :
42 « A da seron kun kisi mene,
xa a ma katu i yinme ken kisini de.
Banisirayila tunkanyugon ya ga ni,
a n yanqa bakka sallibinsollen ŋa kuŋa o na saxu a yi.
43 A da i tuugeyen su ro Alla ya kanma ti baawo Allanlenmen ya ni ike yi,
Allanlenmen ya ga ni,
Alla na a yanqandi kuŋa na a kisi,
selli Alla gaa a mulla. »*
44 I ga da hari a do fayaano ku be genge me kanma,
kun xa na a kaana ken moxo baane ya yi.
[Isa kalle]
45 Gelli kinsiga,
jamaanen su bita ma sallifanan do laxasaran naxa.
46 Ken waxati,
Isa ferenpenti nan ti :
« Eli,
Eli,
lema sebaxitani ?
» Ken wure ga ni :
« N Alla,
n Alla,
manne ni an ga da in sedi ? »*
47 Sero yogonu da ken mugu,
i ti :
« A na annabi Hiliyaasu ya xilli kundu de ! »
48 I du baananbe wurunten daga yiranxasen deebi binegaran ŋa,
na a ro sollen ŋa,
na a wutu katta a yi ti a nan mini.*
49 Kapanlenmon xa ti :
« Dugu,
o na a faayi ma annabi Hiliyaasu wa riini a kisi de ! »
50 Xa,
Isa ga ferenpenti ta fillandin ŋa,
a da i yonkin kini Alla yi.
51 Ken sigira,
yirankutaade be gaa Allanbatikaxooren ŋa,
a booxe kiru filli gelli kanmu ma wureedu.
Ɲiiɲen saralle ma gidun nan booxe bakka me yi.
52 Furunkunmun booxe,
Alla seri siren fo gabe wundi.
53 Isa wundi bakka kallen ŋa,
i xa ro Yerusalaamu yi,
debi senne,
na du koyi seri gabe yi.
54 Ayiwa,
sorodaasinxirise ke be gaa Isa tangana,
a do ku be ga ɲi do a batte,
i da a wari ɲiiɲen gaa saralleene.
Fo wo fo su ga ɲaŋi,
i da ken xa wari.
Ken sigira kannen da i raga,
i ti :
« Tonŋun-tonŋu,
ke yugo ni Allanlenme ke ya yi. »
55-56 Yaxarinjama yogo ɲi do Isa batten ŋa gelli Galiile,
i gaa a deemana.
Kun yogo ya ni :
Maariya Magadalanke,
ken do Yaaxuba do Yuusufu ma Maariya,
kafiini Sebede ren yugun filli ma.
I sigi laatoyen ŋa kuŋa,
i gaa Isa faayini.
[Isa firinde]
57 Laxasaran falle,
banna yogo ri,
Harimaatanken ya ni,
a toxon ga ni Yuusufu.
A xa ni Isa xaranlenman ya yi.
58 A daga ɲaamariyen muuru Pilaati maxa nan ti a na Isa furen kini i ya.
Pilaati ti i na a kini a yi.
59 Yuusufu da Isa furen wutu na a kasanka.
60 A ga da xabura be soxo i yinme da giden noxon ŋa nan xaso,
a da Isa ro ken ya yi,
na gidinlafan bilinbili,
nan ri xabura ke raqen texe ti a yi nan daga.
61 Ken bire,
Maariya Magadalanke do Maariya tana ɲi taaxunu xabura ke kaaran ŋa.
[Isa xaburan tangande]
62 Ken yillakaran gemu Tuumayinkootan ya yi.
Sadaxakiɲandaananyinmankon do Farisigankon da me ɲi Pilaati noqu.
63 I ti a da :
« O kamanyugo,
o sinme do fo baane yi de !
Gaarante ke demu tini ike kalle bita sikkan ŋa,
i wa wundini.*
64 An nta sorodaasinu yogo roono a xaburan kanma i na a tanga ma bito sikki ga n tinme.
Ken ga fe,
a xaranlenmon ra wa riini a fayi de !
Ken falle,
i na ti jaman da a giri.
Ken gaare xotono gaara fanan ŋa ya de ! »
65 Pilaati ti :
« Sorodaasinun faayi.
Xa daga !
Axa na a tanga moxo be ga n liŋi axa da. »
66 I yinmenu daga xabura ke laxataaxaaden moxo sirondi siri,
na taagumansen ro a kanma,
ke be gaa a wuɲiyen koyini.
Ken falle,
i da tangandaanon deni.