Luka 23

[Isa Alimasiiwu jalaginde Pilaati do Heroodi jon ŋa]

(Mace 27.1-2 ; 11-14 ; Maarika 15.1-5 ; Yohanna 18.28-38)

I su giri sigi doome, na Isa Alimasiiwu deni banŋe, aken be ga ni maranyinmanken ŋa. 2 I xenu a jalaginden ŋa Pilaati jon ŋa, nan ti : « O da ke yugo ɲi a gaa a kanma na seron ya murutindi : a wa seron kabana sagallen tugana Roomu tunkanyugu xoore Kesaari yi ; a wa du xilli xa yi, tunkanyugo. » 3 Pilaati da a tirindi nan ti : « An ya ni Yehuudiyanun tunkanyugon ŋa ba ? » Isa ti a da : « An ga da a ko. » 4 Pilaati ti do jaman kutten da : « Ayiwa, n ma jalagindimaana su kita ke yugo yi. » 5 Xa a jalagindaanon wa tallan tini : « A wa seron murutindini i xaranŋunden noxon ŋa. A joŋa xaranŋundindini fina ya yi, nan bogu ti maran su yi, ma a gaa joofene yere xa yi. » 6 Pilaati ga da ku sefo mugu, a tirindindi selli yugo ke ga ni Galiilenken ya yi. 7 A ga da a tu ti Isa gaa bakka noqu be yi non na ya mareyen noxon ŋa, a da a wara katta Heroodi yi ; ken bire Heroodi xa wa yi.

8 Heroodi ga da Isa wari, a ɲaxali ken ŋa siri, baawo a da a xanu na Isa wari lenki kaane na a sababun ɲa a ga da a fin mugu seron ŋa. A ɲi a mulla na a wari a gaa kaawafi dabarini. 9 Heroodi da Isa tirindi fo gabe yi, xa Isa ma a jaabi fo wo fo yi. 10 Sadaxakiɲandaananyinmankon do wa non ŋa, i gaa a jalagini, jalagindi xote ! 11 Heroodi do i sorodaasinun wa Isa ɲaxandini, nan soyi a yi. I da dakkabanan yiraame yogo ro a xannen ŋa, na a wara katta Pilaati yi. 12 Heroodi do Pilaati xosi ɲa menjanŋu yi a koota su. Xa nan xaso, xonnaaxun ya n ɲi i naxa.

[Isa xiimande katta kallen ŋa]

(Mace 27.15-26 ; Maarika 15.6-15 ; Yohanna 18.39-19.16)

13 Pilaati da sadaxakiɲandaananyinmankon do Yehuudiyanun xirisun do Yehuudiyanun kuttun kafu me yi, 14 nan ti i da : « Axa da ke yugo riiti katta in ŋa ti a wa seron murutindini. Ayiwa, n da a tirindi axa jon ŋa. Axa ga ti a da fi buru beenu ɲa, n ma jalagi su kita a yi de ! 15 Heroodi xa ma jalagi kita a yi mene, baawo a faayi ga da a wara katta o yi. Ken kuŋa, ke yugo ma fo wo fo ɲa, fo be gaa sikki a ga n xawa kalla. 16 Ayiwa, n wa tini i na a katu, ken falle in na a wara. » 17 {Pilaati demu ya Pesaxansalle su, a na kasoranke yogo wara Yehuudiyanun da.} 18 Xa i su ferenpenti na a ko doome ti : « Ke yugo ya kari ! An na Baraaba wara o da ! » 19 Nan xaso, murutiye yogo ya n ɲaŋi deben noxon ŋa, do serikalle yogo, Baraaba ro kason ŋa do ken ya yi. 20 Isa waranden ɲi ga n liŋa Pilaati da, ken saabu da a yille sefene jaman da xadi. 21 Xa, seron wa xaarunu a yi nan ti : « A ŋa ! » 22 Pilaati yille sefene i da ta sikkandin ŋa xadi nan ti : « A da manne golli bure ken baane ɲa de ? N ma jalagi su kita a yi, fo be gaa sikki a ga n xawa kalla. N wa tini i na a katu, ken falle in na a wara. » 23-24 Xa i wa xaarunu i gaa tallan tini Isa nan genge do sallibinsollen ŋa. Ken ya ni, Pilaati duŋe i da i liŋun ŋa ; i da i sagon kita na a sababun ɲa i manqanŋen ŋa. 25 Yugo ke be ga ɲi kason ŋa na a sababun ɲa seron murutinden do seri kallen ŋa, Pilaati da yugo ke bagandi kason ŋa ; a bogu i do Isa naxan ŋa, i na i sagon wurundi a kanma.

[Isa gengeye do sallibinsollen ŋa]

(Mace 27.32-44 ; Maarika 15.21-32 ; Yohanna 19.17-27)

26 I do Isa gaa dagana gengendiran ŋa, i do yugo yogo xa gemu, a gaa gilli gunnen ŋa, a toxon ga ni Simoona, ya ni. I da Simoona raga na taaxu a yi, na a sukkandi do Isa yi. 27 Jama xoore daga do Isa batten ŋa ; yaxarun wa jama ke yi, i gaa wuunu nan wuruge do a yi. 28 Isa tiirinbe katta i ya nan ti i da : « Yerusalaamu yaxaru, xa maxa wu do inke yi ! Xa wu do axa yinmenu do axa renmun ya yi ! 29 N saxunten ya na a yi nan ti koota ya n riini a gaa koniini nan ti : “ Sewoyen wa yaxarun da, ku beenu ra ga nta renme saarana, ken do ku beenu ga ma renme saara abada, i ga ma renme sugundi abada ! ” 30 Ken koota ya ni seron gaa tini gidi xooron da : “ Xa xenu o kanma, gidi lenmun na o bulu ! ” 31 Ken kuŋa, i ga da ke ɲaŋi inke yi, n ma fo bure ɲa, axakun beenu ga da fo buren ɲa, i na axakun ɲaana kan moxo ? »

32 I do yugu golliburiɲaŋaano filli xa daga, kuudo i do Isa na kara doome. 33 I gaa noqu ke be xilli « Yinkollanxotte », i ga joofe non ŋa, i da Isa genge do sallibinsollen ŋa ken sigira su yi. I da golliburiɲaŋaano ku filli xa genge ; baanen wa a tayen ŋa, baanen wa a noogen ŋa. 34 {Isa ti : « N Faaba, yanpa i maxa, baawo i gaa ke be ɲaana, i nta a tu ya. »}

I da sokkun wutu na Isa yiraamun taxandi me yi.

35 Seron wa sikki non ŋa, i gaa faayindini. Xirisun wa Isa soyini nan ti : « A da seron kun kisi mene ; a na i yinme kisi ke, selli Kisindaanan ya ga ni, Alla seri sugandinte ! » 36 Sorodaasinun xa da a ɲaxandi : i tinko a yi na binegaran kini a yi, 37 nan ti a da : « Selli Yehuudiyanun tunkanyugon ya ga ni an ŋa, du kisi ke ! » 38 I da ku sefo safa a yinmun ŋa kanmu, nan ti : « Ke ni Yehuudiyanun tunkanyugon ya yi. »

39 Golliburiɲaŋaano ku beenu ga genge, baanen wa Isa kaana nan ti : « Kisindaanan ya feti an ŋa ba ? Du kisi an na o xa kisi ke ! » 40 Xa baanen doxo a yi nan ti a da : « An nta kanna Alla yi ba, toora be ga saxu an ŋa, ken me ya n saxu a xa yi ? 41 Oku xooni do toora ke nan xawa, baawo o da o golliburun muson ya kita. Xa aken ma fo bure su ɲa. » 42 A ti Isa xa da : « Isa, an na sinme in ŋa, bire be an ga na ri xo tunkanyugo. » 43 Isa ti a da : « N wa a koono an da, tonŋun ŋa nan ti : n do an wa ɲaana doome Arijanna noxon ŋa lenki su. »

44-45 Katta kinsiga, jamaanen su bita ma sallifanan do laxasaran naxa. be gaa ŋa, a booxe naxaanen ŋa. 46 Isa ferenpenti nan ti : « N Faaba, n wa in yonkin saagana an ŋa. » A ga da ken ko nan duguta, a faati. 47 Sorodaasinxirisen ga da ken wari, a da Alla kuufa nan ti : « Tonŋun-tonŋu, ke yugo ni seri teleŋonten ya yi ! » 48 Sero ku beenu ga ri faayindi, i xa ga da ken wari, i saage katta i banŋen ŋa, i gaa a kanma na i gijinmun katu telle, na i sunoyen koyi. 49 Isa tuwanlenmon do yaxaru beenu ga ri do a batten ŋa nan giri Galiile, i sigi laatoyen ŋa i gaa faayindini.

[Isa firinde]

(Mace 27.57-61 ; Maarika 15.42-47 ; Yohanna 19.38-42)

50-51 Ayiwa yugo yogo xa ɲi non ŋa, a toxon ya ni Yuusufu, a gaa bakka Harimaata, ken ga ni Yehuuda debe yogo yi. Yuusufu ni seri sire ya yi, a teleŋonte. A ɲi ga da i jikken ro riyen kanma. A wa Kiitikutaanon sapan noxon ŋa. Xa sapan sere kuttun ga da ŋanniye be wutu, ken do i ga da golle be dabari, a ma duŋe ti a yi. 52 A daga Pilaati banŋe na a muuru a maxa a na Isa furen kini i ya. 53 Yuusufu da Isa furen yanqandi na a kasanka. A da a ro xabura soxonte yogo yi giden ŋa. Sere su ma demu buliini ken xabura yi. 54 Ken ɲa moxosironden kootan ŋa, wa jopeene. 55 Yaxaru beenu ga ri do Isa yi nan giri Galiile, i daga do Yuusufu batten ŋa xabura ke yi, na Isa saxumoxon faayi. 56 Ken falle, i saage katta kaanun ŋa, te timi liŋun do misikinjinu beenu gaa roono furen ŋa, i da a dabari. I tuuma Tuumayinkootan ŋa xo sariyan ga da a koyi moxo be.