[Isa wundiyen do a dukoyiye]
(24.1-53)
[Isa Alimasiiwu furen wulliyen xibaare]
24
Alahadin suxubafanan ŋa,
yaxaru ku ga da te timi liŋu beenu dabari,
i do i furute dagana xaburan ŋa.
2 Gidinlafa be gaa xaburan raqen ŋa,
i da a bilinbilinten ɲi bakka a yi.
3 I ro xaburan noxon ŋa,
xa i ma Kamanyugo Isa furen ɲi non ŋa.
4 Na i toxo ken lasamaye noxon ŋa,
yiran xullu ŋaalinta gumu filli da du koyi i ya.
5 Kannen da i raga ;
i da i yaaxon jimindi.
Yugu ku ti i da :
« Manne saabu da axa gaa ŋalinten muurunu furun naxa ?
6 A nta yere ;
a wundi.
A gaa Galiile yi bire be,
a ga da fo be ko axa da,
xa sinme do ken ŋa.
7 A ga ti :
“ Seren Renmen roono junuubunton kittun ŋa ya,
a na genge do sallibinsollen ŋa nan faati.
A faatiyen bita sikkandin ŋa,
a na wulli.
” »*
8 Yaxaru ku haqilen xosi yanqa Isa Alimasiiwu digaamu ku yi.
9 I giri xaburan ŋa nan daga ke su laxami xaranlenmon tanmi do baanen da,
kafiini seron kuttun ŋa.
10 Maariya Magadalanke ɲi kapa ken yaxarinjama yi,
a do Yanna,*
do Yaaxuba ma Maariya.
I ga da xibaare ke laxami Isa faarun da,
11 faaru ku da ken raga xo xafu ya yi ;
i ma saxu yaxaru ku yi.
12 Xa Piyeeri wuru dagana xabura ke yi.
A ga joofe,
a jimi na a faayi ;
a ma fo wo fo wari ma kasanke.
Ken falle,
a saage katta i banŋen ŋa.
Golle ke kaawafin wa a yi.
[Isa dukoyiyun xibaare]
13 Ken koota baananne yi,
xaranlenmo filli giri nan daga debe yogo yi,
a toxon ga ni Hemaayu,
a do Yerusalaamu naxan na kilonu tanmi do baane haqe ya yi.
14 Fo wo fo ga ɲaŋi,
i wa digaamunu a kanma.
15 Na i toxo digaamun noxon ŋa,
Isa yinme ri katta i ya,
do i na kille kafu.
16 I yaaxen wa Isa yi haali,
xa fo yogo da i kaba a tuunu.
17 Isa ti i da :
« Axa masalana manne xa kanma axa terente ke yi ?
» Xaranlenmo ku xosi sigi,
i sunonto.
18 Baane ke be toxon ga ni Kilewopa,
ken ti Isa da :
« Fiinu beenu ga ɲaŋi ku bito yi,
an baane ya na Yerusalaamu,
an ga nta i xala yi ! »
19 Isa ti i da :
« Kun ni kan fiinu yi ?
» I ti a da :
« Kun ni fiinu beenu ga da Isa Nasaaranke kita ya.
Aken Isa be ga ni annabinyin daren ŋa Alla do seron su maxa,
a ɲangollun do a digaamun noxon ŋa.
20 O sadaxakiɲandaananyinmankon do o xirisun da a raga na a ro fankamanun kittun ŋa,
i na a faatindi ;
i da a genge do sallibinsollen ŋa.
21 Oku xooni da a sinma nan ti Alla da a ya xayi riini kuudo a na Banisirayilaganko kisi.
Xa fiinu ku ɲanŋen bita sikkandin ya ni lenki yi keeta.
22 Sapan noxon ŋa xadi,
yaxaru yogonu furute dagana a xaburan ŋa.
I da o haqilun girindi tonŋun ŋa.
23 I ga ma Isa furen ɲi non ŋa,
i yille riini na a ko o da ti maliikanun da du koyi i ya,
na a ko i da ti Isa ŋalinten ya ni.
24 Yogonu giri o yi nan daga xabura ke yi ;
yaxaru ku ga da a ko moxo su,
i da a ɲi kundun ŋa,
xa i ma aken yinme wari. »
25 Ken falle,
Isa ti i da :
« Ku haqilanloxo ku !
Annabinyinmun ga da fo wo fo ko,
axa nta toŋondini ti a yi jawoye yi.
26 Yaala Kisindaanan ma ɲi ga n xawa toorene kundu yi ya ba na Alla darajan kita ? »
27 Ken falle,
fo wo fo gaa koniini a fin ŋa na a wutu annabi Muusa kitaabun ŋa na a wara annabinyinmun kuttun kitaabun ŋa,
a da a su fatanpansi i da.
28 I ga tinko xaranlenmo ku filli gaa dagana debe ke be yi,
Isa da du ɲa xoyi ike wa dangini nan daga noqu laate yi.
29 Xa i mali a yi nan ti a da :
« Toxo o maxa yere ;
lellen ri,
wuron faayi roono.
» Isa ro ken ya yi kan ŋa nan toxo do i ya.
30 Ayiwa,
Isa do i ga taaxu yiganden kanma,
a da buurun wutu na Alla kuufa ;
ken falle,
a da a kutu-kutu na a kini i ya.
31 A xosi bogu i da sankon ŋa,
i da a tu.
Xa ken sigira su yi,
a sanku i ya.
32 Baane su ti i funen da :
« O gaa kille ke yi bire be,
a gaa sefene o da na fatanpansiyen kini o yi Safandi Sennun kanma,
ken da o ɲaxalindi moxosiri de,
ma kan moxo ? »
33 Ken sigira yi,
i giri nan saage katta Yerusalaamu yi.
I da xaranlenmon tanmi do baanen do i kapanlenmon ɲi me kanma ;
34 i su ti sero ku filli da :
« Kamanyugo yille wullini ya ko !
Simoona xa da a wari ! »
35 Ikun xa,
fo be ga sare i maxa do killen ŋa,
do i ga da Isa tu moxo be a gaa buurun kutu-kutunu,
i xa da ken laxami i da.
36 Na xaranlenmo ku toxo ken digaame noxon ŋa,
Isa yinme ri sigi i naxan ŋa nan ti i da :
« Xa salaamalekumu ! »
37 I buttun xosi kuti nan kanu,
baawo a ɲa xo i yaaxen na yilla yogo ya yi.
38 Isa ti i da :
« Manne saabu da axa ga kanu kundu ?
Manne saabu da ku sikkan danbu gaa axa sondomun ŋa ?
39 Xa da in kittun do in taanun faayi ;
axa wa a tuunu ti inke yinme ya ni.
Xa kati in ŋa,
axa na a tu nan ti haadamarenme do yilla nta baana. »
40 A ga da ke ko,
a da i kittun do i taanun koyi i ya.
41 Ɲaxali moxo buren do kaawafi moxo buren saabu da,
i ma katu saqa a yi.
Isa ti i da :
« Yigande wa axa maxa yere ba ? »
42 I da ɲexe biyinta dunŋe yogo kini a yi.
43 A da a wutu na a yiga i yaaxon ŋa.
44 Ken falle,
a ti i da :
« N do axa ga ɲi doome,
n ɲi ga da a ko axa da,
ti fo wo fo ga safe annabi Muusa Sariyan noxon do annabinyinmun kitaabun do Jabuuri noxon ŋa in fin kanma,
ken ɲaŋiini ya. »
45 A xosi i haqilen wuɲi kuudo i na Safandi Sennun faamu.
46 A ti i da :
« Ayiwa,
a safanten wa ti,
Kisindaanan wa riini toore,
ken falle,
a na wulli bakka furun naxa a faatiyen bita sikkandin ŋa,
47 do xadi ti a nan gangi duna xabiilanun su da ti a toxon ŋa,
na a jopa Yerusalaamu yi,
nan ti seron na i jikkunun faraaxu na du rasaaga katta Alla yi,
i na junuubuxafariyen kita.
48 Axa ya ni ku fiinu seedaanon ŋa.
49 Ganta,
n Faaba ga da kuye be laayidun wutu axa da,
nke wa a walla katta axa yi.
Xa,
xa toxo deben noxon ŋa ya,
ma ken senbe ga n giri Alla yi bire be nan yanqa axa kanma. »
[Isa sege katta kanxotten ŋa]
50 Ken falle Isa do i xaranlenmon bogu Yerusalaamu deben ŋa nan daga ma katta Beyitaani yi.
A da i kittun koyi kanmun ŋa nan duwa i da.
51 Na a toxo duwanŋen noxon ŋa,
a wuti bakka i naxa,
nan daga kanxotten ŋa.
52 I xa sujudi a da,
ken falle,
i saage katta Yerusalaamu yi,
i sondomun ɲaxalinta xooro.
53 I ɲi Allanbatikaxooren noxon ŋa waxati su yi,
i gaa Alla kuufana.