[Isa wundiyen do a dukoyiye]
(28.1-20)
[Isa Alimasiiwu wundiye]
28
Tuumayinkootan ga dangi,
Alahadin suxubafana,
Maariya Magadalanken do i toxora* daga Isa Alimasiiwu xaburan faayi.
2 Ken sigira su,
ɲiiɲen xosi saralle saralleyi xote.
Tunka Duumanten maliikan yanqa gilli kanxotten ŋa,
na gidinlafa ke bilinbili bakka xaburan raqen ŋa,
nan taaxu a kanma.
3 A yinme wa ɲelunqene xoyi kiye,
a yiraamun wa xurana xoyi lepa.
4 Sorodaasinu beenu ga ɲi Isa xaburan tangana,
i kanu nan toxo sarallene ma i gaa xitini.
5 Xa,
maliikan ti yaxaru ku da :
« Xa maxa kanu.
N wa a tu nan ti axa na Isa ya muurunu,
i ga da ke be genge do sallibinsollen ŋa.
6 A nta yere,
baawo a wundi xoyi a ga demu a koono axa da moxo ke be.
Xa ri a soxunoqun faayi.
7 Xa wuru telle a ko a xaranlenmon da ti :
“ A wundi bakka furun naxa,
a faayi ga ware axa kaane katta Galiile.*
Axa wa a ɲiini non ŋa.
” N ri ke ya ko axa da. »
8 Yaxaru ku kanunton giri xaburan ŋa,
xa i sewonta xooron ya ni.
I wurunton daga xibaaren kiɲandi Isa xaranlenmon ŋa.
9 I gaa ken wuruye yi,
ma Isa faayi ke genme i ya killen ŋa nan ti i da :
« Axa nawaari !
» I tinko a yi,
nan tusi nan tigiti a seeron ŋa.
10 Isa jaabi nan ti i da :
« Xa maxa kanu,
xa daga a ko in waaxinun da ti i n daga Galiile,
i wa in ɲiini no. »
[Sorodaasi tangandaanon sefexanne]
11 Na yaxaru ku toxo killen ŋa,
sorodaasi tangandaano ku xa yogonu daga kaanun ŋa,
fo wo fo ga ɲa,
na a su ko sadaxakiɲandaananyinmankon da.
12 Sadaxakiɲandaananyinmankon do xirisun da me ɲi na xaalisi xoore kini sorodaasi tangandaano ku yi,
13 nan ti i da :
« Axa na ti axa gaa xenqene ya ni,
Isa xaranlenmon ga ri do wuron ŋa na a bagandi xaburan ŋa do a nan daga.*
14 A xibaaren ga na kiɲe maranyinmanken ŋa,
o wa a faamundini a yi,
a ntaxa fo ɲaana axa yi. »
15 Sorodaasi tangandaanon da xaalisin raga,
i ga da i ɲaamari ti fo wo fo,
i da a ɲa.
Ke ya n sanqi do Yehuudiyanun ŋa,
hari ke lenki a ga finna koniini.
[Isa sefe lagaru]
16 Isa ga da xaranlenmon tanmi do baanen ɲaamari ti i na me ɲi gide ke be yi Galiile,
i daga non ŋa.*
17 I ga da Isa wari,
i da du maxayanqa,
xa i yogonu sikka.
18 Isa tinko i ya nan jaabi nan ti i da :
« Alla da mareyen su ya kini in ŋa,
kanmun do ɲiiɲen ŋa.
19 Ken kuŋa,
xa daga do xabiilanun su yi,
kuudo seron nan ɲa in xaranlenmo yi,
i nan tuubi nan wanqi ti Faaben do Renmen do Alla Fanka Sennen toxon ŋa.
20 N ga da axa ɲaamari ti fo wo fo yi,
axa na a xaranŋundi i ya,
i nan golli ti a yi.
Nke yinme be ga ni,
n wa do axa yi kootan su ma duna ga n giri. »