[Isa wundiyen do a dukoyiye]
(16.1-20)
[Isa Alimasiiwu wundiye]
16
Tuumayinkootan ga dangi,
Maariya Magadalanke do Yaaxuba ma Maariya,
do Saalumu,
i da te timi liŋun xobo kuudo nan daga i ro Isa Alimasiiwu yi.
2 Alahadin koota,
gelli suxubafana,
kiyen bogu bire,
i daga xaburan ŋa.
3 I gaa killen ŋa i ti me da :
« Ko xa na ke gide bakka o danŋa xaburan raqen ŋa ? »
4 Xa i da a wari nan ti gidinlafa ke bilinbili bakka xaburan raqen ŋa,
gidi xoore xa ya ni mene.
5 I ro xaburan noxon ŋa ;
i yaaxen wa maxanbaane yogo do yiran xullun wa taaxunu ti tayen ŋa.
Yaxaru ku kanu.
6 Xa,
maxanbaane ke ti i da :
« Xa maxa kanu de !
I ga da Isa Nasaaranke ke be genge do sallibinsollen ŋa,
axa nta a ya muurunu ba ?
A wundi wo,
a nta yere.
A faayi,
i ɲi i ga da a ro yere ya yi.
7 Saasa,
xa daga a ko xaranlenmon da sakkati Piyeeri du,
ti Isa ware i kaane katta Galiile.
Axa wa a ɲiini non ŋa,
xoyi a ga demu a koono axa danŋa moxo be. »
8 Yaxaru ku wurunton bogu xaburan ŋa nan daga.
I kanunta xooro,
ma i nan toxo sarallene.
I ma fo wo fo ko sere da,
na a sababun ɲa i ga kanu moxo be.
[Isa dukoyiye xaranlenmon ŋa]
9 {Isa ga wundi alahadin suxuban ŋa,
a joŋa du koyini Maariya Magadalanke fina ya yi,
a ga da jinnanu ɲeri xata bakka aken be yi nan xaso.
10 Ku be ga ɲi do a batten ŋa,
i gaa sunon do wuyen ŋa,
Maariya Magadalanke ga da fi be wari,
a ri a ko i danŋa.
11 Xa,
i taron gaa a yi a gaa tini a biranten ya ni,
ike yinme ya n da a wari,
i ma saxu a yi.
12 Ken falle,
a da du koyi sero filli tana yi moxo tana i daganton dabbaayen ŋa.
13 Kun xa saage katta Yerusalaamu yi nan ri xibaaren kiɲandi kuttun ŋa,
xa i ma saxu kun xa sefen ŋa.
14 Ken falle ya ni,
a ga da du koyi xaranlenmon tanmi do baanen kuttun ŋa yigeyokken kanma na i kuralli,
na a sababun ɲa i saxiironbalaaxun do i faamiyinbalaaxun ŋa.
A do ku be ga da a wari,
i ga ma saxu i ya.
15 Ken falle Isa ti i da :
« Xa ro do duna su yi na Xibaari Liŋen kiɲandi tagefon su yi.
16 Sere be ga na saxu a yi nan wanqi,
a wa kisiini.
Sere be ga ma saxu a yi,
a wa yanganxateene.
17 Sero beenu ga danqanaaxu,
i taagumansen faayi :
i wa saagene jinnan xatana ti in toxon ŋa,
nan saage sefene ti xan kurunbo tana yi,
18 i wa saagene samaqen ragana ti i kittun ŋa,
i ga na hari karafon ya mini,
ken nta fo wo fo ɲaana i ya.
I wa saagene i kittun saqa watunton kanma i gaa sahana. »
[Isa segeye kanmun ŋa]