[Isa wundiyen do a dukoyiye]
(20.1-21.25)
[Isa Alimasiiwu xaburan duuro]
20
Alahadin suxubafana,
Maariya Magadalanke furute telle xaburan ŋa.
Ken da a ɲi biten wa finna.
A yaaxen wa a yi,
gidinlafa be ga ɲi xaburan raqen ŋa,
a ntaxa a yi.
2 A wurunten daga a ko Simoona Piyeeri do Isa Alimasiiwu xaranlenxana ke da ti :
« I da Kamanyugo wutu bakka xaburan ŋa ko,
o nta a tu i ga da a ro noqu su yi ! »
3 Piyeeri do xaranlen baane ke bogu ke ya yi nan daga xaburan ŋa.
4 Sero ku filli su wurunton bogu doome,
xa xaranlen baane ke da Piyeeri toxo,
a da a saama xaburan ŋa.
5 A jimi na xaburan faayi ;
a yaaxen wa kasanken ŋa saqa,
xa a ma ro.
6 Simoona Piyeeri wa do a batten ŋa,
a xa joofe nan ro xaburan noxon ŋa,
na kasanken ɲi saqa.
7 Yiraame be fananten ga ɲi Isa yinmen ŋa,
a yaaxen wa a gununten wa saqa i duran ŋa noqu tana yi.
8 Ken bire ya ni,
xaranlenma ke be fina ga joofe,
a xa ro xaburan noxon ŋa,
a ga da a wari,
a saxu a yi.
9 Xa harisa,
i ma ɲi i ga da a faamu nan ti Isa n xawa wundini bakka furun naxan ŋa ya,
xo Safandi Sennun ga da a ko moxo be.
10 Xaranlenmo ku filli saage katta i kan ŋa kuŋa.
[Isa dukoyiye Maariya Magadalanke yi]
11 Ken da a ɲi Maariya wa sikki xaburan raqen ŋa sella,
a wa wuunu.
Wuye ke noxon ŋa,
a jiminten wa katta xaburan ŋa.
12 A ken jinme noxo,
a da maliikanu filli wari taaxunu Isa saxu batte ke yi,
yiran xullun gaa i ya.
Baanen wa ti taanun banŋe,
baanen wa ti yinmen banŋe.
13 Maliikanu ku ti a da :
« Yaxare ke,
an na manne wuunu ?
» A da i jaabi nan ti :
« I da in Kamanyugon furen ya wutu,
n nta a tu i ga da a ro noqu su yi. »
14 A gaa ken konŋen ŋa,
a ga tiirinbe,
a xosi yugo yogo wari sikki non ŋa,
jaxa Isa ya ni,
xa a ma a tu.
15 Isa ti a da :
« Yaxare ke,
an na manne wuunu ?
An na ko muurunu ?
» Aken da a sinma naaxogume ke ya ni,
a ti a da :
« N maaren yugo,
selli an ya ga da a wutu,
an ga da a ro noqu be yi,
non koyi in ŋa,
nke yinme nan daga a wutu. »
16 Isa ti a da :
« Maariya !
» A tiirinbe katta Isa yi nan xaaru,
habaraaninxannen ŋa nan ti :
« Rabbuni !
» (Ken wure ga ni :
« Xaranmoxo ».)
17 Isa ti Maariya da :
« Maxa mali in ŋa,
baawo in ma sege katta in faaba yi fina.
Xa,
daga katta in waaxinun¤ ŋa,
an na ti i da :
“ N wa segene katta inke do axakun su faaba yi,
nke do axakun su Alla.
” »
18 Maariya Magadalanke daga xibaaren kiɲandi xaranlenmon ŋa nan ti :
« N da Kamanyugo wari !
» A ga da ke be ko Maariya da,
a da ken xa kiɲandi xaranlenmon ŋa.
[Isa dukoyiye i xaranlenmon ŋa]
19 Ken alahadi lellen yinme,
xaranlenmon da me ɲi konpe yogo noxon ŋa na fonlaqun soxo Yehuudiyanun xirisun xaaxantaaxun saabu da.
Isa xa ri du ɲi i naxan ŋa non ŋa,
a da i kuuɲi nan ti i da :
« Jamun wa axa da ! »
20 A ga da ke ko,
a da i kittun do i kaaran koyi i ya.
Xaranlenmon ga da Kamanyugo wari,
i ɲaxali moxosiri.
21 A ti xadi :
« Jamun wa axa da.
N faaba ga da in xayi moxo be,
n xa faayi axa xayini kundun ŋa. »
22 A ga da ken ko,
a da i raxanfankon fuute* katta i ya nan ti i da :
« Xa da Fanka Sennen raga.
23 Axa ga na yanpa sere be maxa i junuubunun ŋa,
Alla yanpa a kaman maxa i junuubunun ŋa.
Axa ga ma yanpa sere be maxa i junuubunun ŋa,
Alla xa nta yanpana a kaman maxa i junuubunun ŋa. »
[Isa dukoyiye Tooma yi]
24 Tooma,
ken ga ni xaranlenmo ku tanmi do fillon du baananbe yi,
i gaa a xilli « Fununlenme »,
Isa ma aken ɲi kapa xaranlen kuttu ku yi.
25 Xaranlen kuttu ku ti a da :
« O da Kamanyugo wari !
» Xa Tooma ti i da :
« N ga ma gengendibattun wari a kittun ŋa,
n ma in kittindoronmen ro gengendibatten ŋa,
n ma in kitten sooti a kaara ke boten ŋa,
n nta saqa a yi abada. »
26 Ken bita segundi,
xaranlenmon da me ɲi konpe ke yi xadi.
Tooma wa kapa i ya.
Fonlaqun soxonto,
Isa ri du ɲi i naxan ŋa xadi nan ti i da :
« Jamun wa axa da ! »
27 Ken falle,
a ti Tooma da :
« An kittindoronmen ro yere,
n kittun faayi,
an kitten ro in kaaran ŋa.
Sikkan wara,
an nan toŋondi. »
28 Tooma ti a da :
« N kama,
n Alla ! »
29 Isa ti a da :
« An ga da in wari ya ni an ga toŋondi.
Wulluliŋontaaxun wa seron da,
ku beenu ga toŋondi ti in ŋa na a ɲi i ma in wari. »
[Ke kitaabe safemaana]