Yohanna 21

[Isa Alimasiiwu dukoyiye i xaranlenmon ŋa]

Wuce falle, Isa Alimasiiwu yille du koyini i xaranlenmon ŋa Tibeeri xaaranxannen ŋa. A dukoyimoxon faayi : 2 Simoona Piyeeri, do Tooma, i gaa a xilli « Fununlenme », do Nataneeli, ken gaa bakka Kaana deben ŋa, mara, Sebede ren yugun filli, kafiini xaranlenmo filli tana, ku ya n ɲi doome. 3 Simoona Piyeeri ti i da : « N wa dagana tangi. » Kuttun xa ti : « O xa wa telle do an ŋa. » I daga kuŋa na fuure yogo wutu na wuron su ɲa tangini, xa i ma ɲexenlen baane raga.

4 Yillankaro, ma Isa siginten faayi ke yi jinxannen ŋa, xa xaranlenmon ma a tu ti a ya ni. 5 A da i gangu nan ti : « Eh, n menjanŋu, axa da ɲexe raga ba ? » I da a jaabi nan ti : « Hari baane ! » 6 Isa ti i da : « Xa da jalan sedi ti fuuren kaaratayen ŋa, axa wa ragandini. » I da jalan sedi kuŋa, i maxa katu a segendini ɲexen gaboyen saabu da. 7 Isa xaranlenxana ke ti Piyeeri da : « Ke ni Kamanyugo ya yi ! » Piyeeri booranten ya n ɲi, a ga da a mugu ti ke ni Kamanyugo ya yi, a da i doroken rondi na du sedi jin ŋa. 8 Xaranlen kuttun do fuuren daga bologaanen ŋa, na jalan fakkan ɲexen fuutu, ken da a ɲi i do bologaanen ma laato, kamo filli sogono me ya ni.

9 I ga sege bakka jin ŋa, ma i yaaxen ga nta ɲexen ŋa yinbinxoren kanma, a do buuru. 10 Isa ti i da : « Axa ga da ɲexe ke be raga, axa do fo nan ri. » 11 Simoona Piyeeri ro fuuren ŋa na jalan fuutu, a fakkan gaa ɲexe dinkan duuron ŋa : kame do tankarage do ɲexo sikki. Xa ɲexe ke do i gaboye su, jalan ma booxe. 12 Isa ti i da : « Xa ri yige. » I da a tu nan ti kamanen ya ni, xa sere baane ma katu a tirindini xaranlenmo ku yi nan ti : « Ko ni anken ŋa ? » 13 Isa tinko na buurun do ɲexen wutu na i taxandi i naxan ŋa. 14 Ke ni Isa ta sikkandin ya yi a gaa du koyini i xaranlenmon ŋa a giri falle furun naxa.

[Isa do Piyeeri]

15 Yigeyen falle, Isa ti Simoona Piyeeri da : « Yohanna renme Simoona, an wa in mulla nan xoto ku yi ba ? » Simoona da a jaabi nan ti : « Yabo, xaranmoxo, an yinme wa a tu nan ti in wa an mulla. » Isa ti a da : « Ayiwa, an kiilun toxo in jaxanlenmun ŋa. » 16 A da a tirindi ta fillan ŋa xadi nan ti : « Yohanna renme Simoona, an wa in mulla ba ? » A da a jaabi nan ti : « Yabo, xaranmoxo, an yinme wa a tu nan ti in wa an mulla. » Isa ti a da : « N jaxanlenmun yigandi. » 17 Isa da a tirindi ta sikkandin ŋa xadi nan ti : « Yohanna renme Simoona, an wa in mulla ba ? » Ken digi Piyeeri yi, baawo ke ni Isa ta sikkan ya yi a gaa tini : « An wa in mulla ba ? » A da a jaabi nan ti : « Kamanyugo, an wa a su tu, an wa a tu nan ti in wa an mulla. » Isa ti a da : « Ayiwa, an kiilun toxo in jaxanlenmun ŋa. 18 Tonŋun-tonŋu, n na a ko an da, an leminaaxun ŋa, an yinme ya n ɲi an du siitini, an na daga noqu be ga n liŋi an da. Xa xasoyen ga na ri, an na an kittun banbana ya, sere tana na an siiti, a do an na daga noqu be dagayen ga ma ɲi ga n liŋi an da. » 19 Piyeeri gaa kalla moxo be, a kallen gaa ɲaana Allatiigeye yi, Isa ke sefemoxo faayi gaa ken ya koyini kundu. Ken falle, a ti : « Sukke do in ŋa. »

[Yohanna seedaaxu]

20 Piyeeri tiirinbe, a yaaxen wa Isa xaranlenxanan ŋa. Ken xaranlenxana ya saxunanlexinten nan demu tini Isa da yigeyokken kanma : « Kamanyugo, ko baane ni an janbaana ? », 21 Piyeeri yaaxen gaa ken xaranlenxana yi, a da Isa tirindi nan ti : « Kamanyugo, ke xa xibaaren na kan moxo ? » 22 Isa ti a da : « N ga na lafi a nan toxo bireene ma in ga na saage riini, anken manne na ken ŋa ? Anken nan sukke do in ŋa tan. » 23 Ku sefo ga koni, i xosi toxo a laxamini isanwaaxinun ŋa ti xaranlenma ke nta kalla. Isa ken xa ma ti a nta kalla. A ti ya : « N ga na lafi a nan toxo bireene ma in ga na n saage riini, anken manne na ken ŋa ? »

24 A ken xaranlen baane ke ya n seede ti ku fiinu su yi na i safa. O wa a tu xa nan ti a seedaaxun ni tonŋun ya yi.

25 Isa da fi gabe tana dabari, xa o ga na ti o na a su safa baane baane, n wa a sinmana, a kitaabi safanten nta toŋono duna yi.