Ɲangollu 1

Isa Alimasiiwu faarun

Ɲangollu

[Faarannaaxun moxosironde]

(1.1-1.26)

[Isa Alimasiiwu ɲaamarindixanne katta i faarun ŋa]

1-2 Tuufulo, Isa Alimasiiwu ga da fo wo fo ɲa, a do a ga da fo wo fo xaranŋundi, gelli a fi ke joŋaaru, nan daga a wara ma a segekoota, n da a su ko in kitaabi fana ke noxon ŋa. Ganta, saado a gaa segene, a da sero ya sugandi na i ɲa yi, na i xaranŋundi golle ke dabarimoxon ŋa ti Alla senben ŋa. 3 Isa faati falle, a yille du koyini kun seri baanu ya yi moxo gabe, na a xurandi i da nan ti i biranten ya ni, tannaxate bito, a gaa du koyini i ya, na maxankutu i da.

4 Koota yogo, a do i gaa yigeyokken kanma, a da i kaba nan ti i da : « Xa maxa giri yi de ! Xa, xa taaxu ya na in Faaba laayidun dugu. Ke laayidu, n demu na a sefen ko axa da nan ti : 5 Yahaya da seron wanqi ti jin ya yi, xa axakun faayi riini wanqi ti Alla Fanka Sennen ya yi, a nta hari dallana. »

6 I gaa ken taaxe yi, koota yogo faaru ku da a tirindi nan ti : « Kamanyugo, an na tunkaaxun kurunbaaxunu ken bire ya yi ba ? » 7 Isa ti i da : « Axa fi feti ken bire muurunden ŋa na a tu, ken ni o Faaba ya waxati rakutunte yi. 8 Fanka Sennen ga na yanqa axa kanma bire su, axa wa fankan kitta. Axa na ɲaŋi in da seedaano yi Yerusalaamu noxon ŋa, axa na ɲaŋi in da seedaano yi maran su yi, hari mara, nan daga a wara ma duna yinmen ŋa. » 9 Ku sefo konŋen falle, Isa wuti bakka i naxan ŋa, a su yaaxen gaa a segenten ŋa, ma tabullen gaa roono i do a naxa. 10 Isa do i yaaxon firi, xa harisa, i yaaxon tontonten ya n finna kanxotten ŋa, i wa ken ŋa tan, ma yiranxullugumu filli ga nta ri sigi do i batte 11 nan ti i da : « Galiilenko, axa finna manne xa faayini kanmun ŋa ? Axa ga da Isa ke be segenten wari de, axa riini a yanqanten xa wari ken moxo baane ya yi. »

[Isa faaru]

12 Ken falle, gide ke be, i gaa a xilli « Jayituunangide », Isa faaru ku yanqa bakka a kanma nan daga Yerusalaamu. I naxa nta laatu, hacenda haqe ya ni tan, kilo baane me. 13 I ga saage katta Yerusalaamu yi, i ga ɲi konpe ke be noxon ŋa sankanson kanma, i daga me ɲi no. Sero be ga da me ɲi no, i toxonun faayi : Piyeeri, Yohanna, do Handere, kafiini Filipu do Tooma, Baritoloome do Mace, ken do Haalife ren yugo Yaaxuba, kafiini Simoona i gaa aken xilli «  », ken do Yaaxuba ren yugo . 14 Ku sero ya ni ŋanniyi baane yi, i gaa me ɲiini waxatin su yi na Alla batu, kafiini yaxaru yogo, ken do Isa ma, do Isa waaxinu.

15 Koota yogo, i gabo nan kiɲe ma kame do tanpille sere. Piyeeri giri sigi nan ti : 16 « N maarenmu, fi rakutunte be gaa Safandi Sennun ŋa, a nan xawa tinmeene ya, ken ga ni fi be Alla Fanka Sennen ga da a ro Daawuda raqen ŋa, Yehuuda xibaaren ŋa. Ken Yehuuda ya n ɲa Isa ragandaanon kaananken ŋa. 17 A xa ɲi kafo ke noxon xa ya yi mene. Duran sigiran ɲi a maxa xoyi o su moxo. » 18 Jaxa i ga da a tuga ti naaburu mexente ke be, a da soxante xobo. A xenu i xannun kanma ken soxante ya noxon ŋa, ma a noxon gaa kareene, a nuxunlenmun bogu. 19 Yerusalaamu su da xibaare ke mugu, i da te ke toxora i xannen ŋa ti « Hakkelidaama », ken wure ga ni « foron te ». 20 Piyeeri sukke do sefen ŋa nan ti : « A sefe kitaaben noxon ŋa nan ti :

“ Hari na a kan duuraaxundi

Sere ga nta daaxene non ŋa. ”

« A wa noqu tana yi xadi nan ti :

“ Hari na a siga ke kini sere tana yi. ”

21 « Ken kuŋa, o do Kamane Isa ga ɲi doome, sero ku beenu ga ɲi do o yi, 22 gelli Yahaya ga da Isa wanqi koota be, nan daga a wara ma a gaa segene, waajibin ya ni kun sero du baananbe nan kafu o yi, kuudo a xa na ɲa seeda yi Isa wundiye bakka furun naxan ŋa. » 23 I da sero filli sugandi kuŋa, kun ga ni Yuusufu, i gaa a xilli « Barisaabu », yogonu xa na ti a da « Yuusiti ». Aken do Matti. 24 Ken falle i da Alla ɲaaga ti ku sefo yi nan ti : « Kamane, anken be gaa sere su sondomen tu, an seri sugandinten koyi o yi bakka ku sero filli yi, 25 kuudo a na faarannaaxun sigan wutu, siga ke be Yehuuda ga wuru a yi nan sukke do i liŋun ŋa. » 26 I da sokkun wutu sero ku filli naxa, sokken da Matti raga, a kafi tanmi do baanen ŋa.