Ɲangollu 2

[Faarun seedeye ti Isa Alimasiiwu yi Yerusalaamu yi]

(2.1-8.3)

[Alla Fanka Sennen riye]

gaa riini, a da xaranlenmon su ɲi me kanma noqu baane ya yi. 2 Kuusuyi xoore yogo giri ti kanmun ŋa, an tini dundon ya ni. I gaa konpe ke be noxon ŋa, a fogu kuusuye yi. 3 Ken sigira su yi, ma i yaaxen ga nta neene yogo yi xoyi yinbinkuma, nan kuti-kuti, fo nan yere baane su kanma. 4 Alla da i su faga, i su saage sefene ti a ga da xanne be ro i raqun ŋa, ken do i yinmenu xannun ga nta baana.

5 Yehuudiya gabe taaxunten ɲi yi, i jonkoyinton gaa Alla yi, i ga giri ti duna tattu ku naxati su yi. 6 I ga da kuusuye ke mugu, i su da me ɲi noqu baane yi, i kaawafi na a sababu ɲa, baane su gaa faaru ku terinkana, i gaa ike yinme saarexannen koono. 7 I kaawafi moxoburu nan lasame, i ti : « Ku sero gaa sefene kundu, keti Galiilenkon ya fe gani ? 8 Ko baane ni o yi an taron ga nta i ya, an xanne ke koono ? 9 O yogonu giri Parati jamaanen ŋa, yogonu giri Medi do Yelaamu, yogonu giri Mesuputaami do maran ŋa, yogonu giri Kapadooke, do Ponti, a do Haasi jamaane, 10 ken do Firigi do Panfiili, yogonu giri Misira do Libi, kaaran ŋa, ken do Roomu, 11 Kireetinkon do Laarabu, oku beenu ga ni Yehuudiyanu, ken do ku beenu ga yille nan ɲa Yehuudiyanu, Alla ga da kaawafi su ɲa, o xa da a su mugu oku xannu ya yi de ! » 12 Ken da i kaawafi moxoburu, i haqilun ga bono, i ti me da : « Ke ni manne moxon danbe ? » 13 Yogonu xa wa soyini i ya nan ti : « Ku da xonsin ya mini nan fogu sa ! »

14 Ken sigira, Piyeeri do faarun tanmi do baanen giri sigi, a xan xoore a ti jaman da : « Axakun Yehuudanko, do axakun Yerusalaamunko, xa da in sefon terinka moxosiri : ke be ga ɲaŋi, axa na a faamu. 15 Axa gaa a sinmana nan ti ku sero mande ya, i ma mande de, baawo o faayi finna wulluhan ya yi. 16  Yooweli ga da sefe be ko, ken ya faayi ga ɲaŋi, a ga ti :

17 Alla ti : “ Duna lagaren ga na kiɲe,

n wa in Fanka Senne guujini duna seren su kanma.

Axa ren yugun do axa ren yaxarun wa allanfaarinsefene axa danŋa.

N wa axa fonnanxayun ɲaana wallaano yi, na axa xirisi xason ɲa kuyaano yi.

18 Tonŋu, ken bire, n wa in Fanka Sennen guujini in komon kanma, yugon do yaxaren su.

I na ɲa allanfaarinsefaano yi.

19 N wa taagumansen danben su dabarini kanmun ŋa,

na kaawafiinun dabari ɲiiɲen kanma,

foren wa gabono, ken do yinben do tiidi xolonte,

20 kiyen wa bitana,

xason na dunbu xoyi fore,

katta Tunka Duumanten kootan gaa riini.

Ken koota ni koota xoore ya yi,

koota nooronte.

21 Ken bire, sere wo sere ga laxaraxaasa ti Tunka Duumanten toxon ŋa,

ken kanman wa kisiini. ”

22 « Ee , xa da in terinka : Isa ni sere ya yi, Alla ga da a daliiluganxaaxu axa su jon ŋa ti fankan ŋa, taagumansun do kaawafiinu, axa yinmenu wa ken tu. 23 Ke sere ro axa kittun ŋa na a gemundi Alla yinme ga da a fiinun rakutu moxo be ya yi nan xaso, axa da a kini Allankannanbalinun ŋa, i da a genge do sallibinsollen ŋa na a kari. 24 Xa, Alla da a girindi na a bogu kallen tooran ŋa. A nan toxo kallen kacun ŋa ra ma ɲi ɲaana, 25 ken ya n sigi Tunka Daawuda ga da a fin ko nan ti :

“ N yaaxen ma ɲi gilli Tunka Duumanten ŋa du kaane yi,

tonŋu, a gaa in kaaran ŋa,

n nta kanna.

26 Ken ya saabu da in butten ga sewo, n suugu.

N butten xoten na saxu in xaburan ŋa,

27 baawo Kamane, an nta wurunu in ŋa furun naxa.

An nta riini in wara in gaa motto xaburan noxon ŋa, an seri senne.

28 An da bireyen killun su koyi in ŋa,

an da in sewondi ti an hadariyen ŋa. ”

29 « Ee in maarenmu, a daga in na o kisima Daawuda fin maxankutu axa danŋa xuraye yaaxe maxa. A kara nan buli, o su wa a xaburan noqu tu. 30 Xayifaaren ya ni, a wa a tu nan ti Alla kuna na laayidun wutu i da nan ti i bonsonŋen yogo ya n riini taaxu i falle tunkanyugaaxun ŋa. 31 Ke be gaa riini ɲa, Daawuda da a tu. A digaamu wundiyen kanma nan ti :

“ Munguye ma ɲa do a yi furun naxa,

sakkati a tiyen xa na moti xaburan noxon ŋa. ”

32 « N gaa ke Isa be fin koono, Alla da a wundu bakka kallen ŋa, oku wa ken seedaaxun ŋa. 33 Alla da a segendi na a wara i tayen ŋa. Faaben ga da Fanka Sennen be laayidun wutu a da, a da ken kita, na a sanqi o kanma, axa yaaxen faayi ken ya yi, axa taron na a ya yi. 34 Daawuda ma sege kanmun ŋa, xa a ti :

“ Tunka Duumanten ti in Kamanyugon da :

‘ Taaxu in tayen ŋa, taaxura sugandinte,

35 ma in ga n da an xonnon ro an taanun wure. ’ ”

36 « Ken ya ni , axa su n xawa saqa a yi na a faamu nan ti : axa ga da ke Isa be ŋa, Alla da a ya ɲa Kisindaana do Kamane ke yi. »

37 Ku sefo ro jama ke xotten ŋa. I jooti moxosiri. I da Piyeeri do kuttun tirindi nan ti : « O maarenmu, o n xawa manne xa ɲaana kuŋa ? » 38 Piyeeri ti i da : « Xa da axa du rasaaga katta Alla yi, axa na axa jikkunun faraaxu, axa du baananbe su nan wanqi ti Isa Alimasiiwu toxon ŋa, kuudo axa junuubunun na xafari. Ken ŋa, axa na Alla kuyen kita, ken ga ni Fanka Sennen ŋa. 39 Baawo, Alla da laayidu ke wutu axa ya da, na a wutu axa renmun da, do hari sero beenu gaa laatoyen ŋa, ken do , o Alla gaa sere ke be xilli. » 40 Piyeeri da sefe gabe tana ko i da kuudo i nan katu i niyini, na i ɲa duruxotaano yi, a saage tini i da : « Lenki seron ma ɲa, xa da du tanga i ya, xa na kisi. » 41 Sero beenu ga da Piyeeri sefon mugu nan saxu a yi, i wanqi. Ken koota, wujunu sikki sere me ya n kafi isanjaman ŋa.

[Toŋondinton biremoxo]

42 I duume terinkanden ŋa, do i nan ɲa maaren baanu ; i wa buurun kutu-kutunu me yi, sinmaye yi Isa faatiyen ŋa, nan allanbati doome. 43 Faarun gaa kaawafi xooro be do taagumansi xooro be dabarini, kun da jaman allankannen gabondi. 44 Toŋondinton su kafi me yi nan ɲa baane ; fo gaa sere su maxa, i da a su ɲa jamankafo yi. 45 I da i ɲiiɲon do i naaburen su xannewara toŋondinton da. Haaju ga na ri, i na i gaaga ; baane su do ke be ga n xawa, i na ken kini an ŋa. 46 Koota su, i na me ɲi Allanbatikaxooren noxon ŋa ti ŋanniyi baane, ken ga ni Allanbatten ŋa, i na Isa faatiyen sadaxa taxandi me yi i kaanun noxon ŋa, i sewonten na yige doome, dundaraaxu nta baane su maxa. 47 I wa Alla batta, a su wa i xanna. Koota su, sero wa Kamanen kisiyen kitta nan kande kafiini jama ke yi.