[Muruxunten terende]
3
Koota yogo laxasaran batibiren ŋa,¤
Piyeeri do Yohanna daga allanbati Allanbatikaxooren noxon ŋa.
2 Allanbatikaxoore ke fonlaqe yogo toxon ya ni « Fonlaqi Gemunte ».
Yugo yogo,
gelli a ga saare,
a muruxunten ya ni,
koota su a seron na a wutu nan daga a taaxundi fonlaqe ke kaaran ŋa,
kuudo seron royinto,
a na salume.
3 A do Piyeeri do Yohanna royinton gemu.
A da sadaxan muuru i maxa.
4 Piyeeri do Yohanna da i yaaxon tonto a yi,
Piyeeri ti a da :
« An yinmen wutu an na o faayi. »
5 Yugon da i yinmen wutu na i faayi,
a da a sinma keeta nan ti i na fo ya kinni i ya.
6 Xa Piyeeri ti a da :
« Xaalisi nta in maxa in gaa a kinni an ŋa sakkati kanŋe xa.
Ke be gaa in maxa,
n da a kini an ŋa :
giri,
an nan tere,
ti Isa Alimasiiwu Nasaaranken toxon ŋa ! »
7 Piyeeri da a raga ti i kitti tayen ŋa na a girindi sigi,
ken sigira su,
a taanun do solaadiɲiinmun xoto,
a sigi xa gedi.
8 A gerebesi,
nan tere.
A do Piyeeri do Yohanna su ro doome Allanbatikaxooren noxon ŋa.
A terente,
a wa bonte-bontene na Alla tiiga.
9 Jaman su yaaxen wa a yi terene,
a gaa Alla tiigana.
10 A su ga da a tu nan ti yugo ke be ga ɲi salumene Allanbatikaxooren « Fonlaqi Gemunten » ŋa,
a ya ni.
Ken da seron kaawafi moxoburu ma i nan kanu,
na a sababun ɲa ke be ga da a kita.
11 Yugo ke gaa do Piyeeri do Yohanna yi,
ken da jaman kaawafi,
i wuru katta i ya na gomaaren fana i ya noqu yogo i gaa tini non da « Sulemaanu Jinjanŋe ».
12 Piyeeri ga da ken wari,
a ti jaman da :
« Banisirayilaganko,
manne saabu da axa ga kaawa ke yi ?
Manne saabu da axa gaa a faayini xoyi o da ke yugo terendi ti o yinme senben do o muuminaaxun ya yi ?
13 Annabi Ibirahiima do annabi Isiyaaxa do annabi Yaaxuba* do o faabanu Alla,
a ga da i kome Isa ke be daro axa ga bara a yi,
na a ro kittu yi Pilaati jon ŋa,
a baariyen ɲi ga n liŋa Pilaati ken yinme danŋa ya xa mene,
xa,
axa ma duŋe.
14 Sere ke be sennen ga ni,
a teleŋonten ga ni,
axa bara ken ŋa.
Axa ti Pilaati na serikallaanan ya baari.
15 Axa da birandaanan kari,
xa Alla da a girindi bakka furun naxan ŋa,
oku seede ken ŋa.
16 O saxu Isa toxon ŋa ya.
Ken ya n sigi ke yugo be axa gaa a tu ga saha kundu.
Yugo ke ga ɲi moxo be,
axa wa a tu.
O saxu Isa toxon ŋa ya,
a ga saha axa su jon ŋa.
17 « Saasa,
n maarenmu,
n da a tu nan ti samuntaaxun ya n da axa do axa yinmankon kita,
axa ga da ke ɲa Isa yi.
18 Xa,
Alla ga ti Kisindaana ke tooreene ya,
a da ken ya tinmandi.
A da ke ro annabinyinmun su raqun ŋa golle ke ɲanŋen kaane.
19 Xa da du rasaaga na axa jikkunun faraaxu,
axa nan saage katta Alla yi,
kuudo axa junuubunun na xafari.
20 Ke moxo,
Kamanen neeman na ri katta axa yi.
A na yinmanken saagandi katta axa yi,
ken ga ni Isa yi,
Kisindaana ke,
xoyi a ga da a rakutu moxo be.
21 Saado ken ŋa,
Isa n xawa toqo kanmun ŋa ya,
ma fiinun su ga n tinme bire ke be,
xoyi Alla ga da a ko annabinyinmun su da moxo ke be nan xaso.
22 Annabi Muusa da a ko nan ti :
“ Tunka Duumante,
axa Alla wa riini xayifaare bogu an ŋa xoyi in moxo,
a ga na fo wo fo su ko,
axa na a terinka.*
23 Sere wo sere ga ma a terinka,
ken kaman wa xateene bakka jaman ŋa nan halaki. ”*
24 « Annabinyinmu ku su,
gelli annabi Samuyeli do i battamoxo,
a su da ke kiye xibaaren ko.
25 Axakun ya ni annabinyinmun bonsonŋun ŋa.
Alla da laayidun wutu axakun ya faabanu da,
nan ti annabi Ibirahiima da :
“ Duna su barekiini ti an bonsonŋun sababun ya yi. ”*
26 « Alla da i komen bangandi axa fina ya danŋa.
A da a xayi katta axa ya yi,
kuudo a na axa barekindi,
na axa baananbe su jikku burun faraaxu. »