Ɲangollu 4

[Piyeeri do Yohanna do kiitaana]

Na Piyeeri do Yohanna toxo sefene jaman da, ma do Allanbatikaxooren tangandaanon yinmanken do ga nta ri sigi i ya. 2 I yaaxen gaa Isa Alimasiiwu faarun ŋa seron xaranŋundini kallen falle wundiyen ŋa, ti baawo Isa yinme wundi, ken da i butundi. 3 I da i raga nan daga i wuyindi kason ŋa, baawo ken da a ɲi kiyen xenu. 4 Xa ken do i fi su, jama ke be ga da waajunden terinka, wujunu karagi sere me saxu a yi nan tuubi.

5 Ken yillakara, Yehuudiyanun yinmanko, xirisu, , i su da me ɲi yi. 6 Hanna, , Yohanna, Lekandooro do sadaxakiɲandaana xooron su do i kaadunkon ɲi no. 7 I da i bagandi nan ri sigindi na i tirindi ti : « Axa ga da ke muruxunte be terendi, axa da a terendi ti kan senbe yi, ma axa da a terendi ti ko baane toxo ? » 8 Ken noqu, Alla da Piyeeri faga tuwaaxun ŋa, a ti i da : « Jaman yinmankon do xirisu, 9 o ga da ke fi sire ɲa ke muruxunte da lenki, axa da o tirindi ken ya yi. O ga da a terendi moxo be, o na ken ko. 10 Axa su kafumanto, kafiini su yi, axa na a tu nan ti, axa ga da Isa ke be de, Alla ga da Isa ke be wundu bakka furun naxan ŋa de, o da ke muruxunte terendi ti ken Isa ya toxon ŋa. 11 A safanten wa Jabuuri noxon ŋa nan ti :

“ Axakun tagandaano, axa ga nexu tuufa ke be yi,

ken ya n ɲa gonbontuufan ŋa. ”

12 « A baane ya n katta o kisini. Baawo Alla ma sere tana riiti duna yi, seren ra gaa kisiini ti ke be toxon ŋa. »

13 Piyeeri do Yohanna haqilun taaxunton ga ni moxo be, ken da kiitaanon kaawafi moxosiri, baawo i da i raga xoyi sero ya yi tan i ma xara. Ken falle ya ni, i ga da a tu nan ti jaxa Isa teranlenmon ya ni. 14 I yaaxen gaa muruxunte ke sellanten xa yi sikki do Piyeeri do Yohanna batten ŋa, i ma katu fo wo fo koono i da, sakkati na fo xa ɲaŋi i ya. 15 I da i ɲaamari nan ti i nan bogu kiitikutiran ŋa. Ken falle, i yinmenu duurun da me wari sero ku fin kanma. 16 I ti me da : « O katta manne ɲaana ku sero yi ? Yerusalaamu su bogu a xala nan ti i ya n da ke kaawafi xoore dabari, o ra ntaxa ken ɲaana gaare yi de ! 17 Xa, ke be xoten ga ni, ke xibaare nan maxa tallan sanqi do jamaanen noxon ŋa ya lewu ! Ken kuŋa, o na i baxa-baxa ya, nan ti i nan maxa sefe ma nan xaranŋundindi sere su da ti Isa toxon ŋa keeta. » 18 I saage Piyeeri do Yohanna xilli na i gongo nan ti a kabe i maxa bogo-bogo Isa toxon gaa mugiini i ya sakkati nan xaranŋundindi ti a toxon ŋa. 19 Xa Piyeeri do Yohanna da i jaabi nan ti : « O na axa tirindini fiinu filli ya, axa yinmenu na ken jaabi. Alla sefen do axakun sefe, seren nan xawa kanni batta ? 20 Moxo su kanma, oku kun ga da ke be mugu na a wari, o ra nta kuurunu ken kanma lewu. » 21 I da fo kafu Piyeeri do Yohanna baxabaxanden ŋa, i ga ma rorexe kita i ya, i da i wara. I da ken ɲa jaman xaaxantaaxun ya saabu da, baawo a su ɲi Alla tiigana na a saxu i golli ɲaŋunte ke ya kanma. 22 Muruxunte ke be terende ga da jaman kaawafi, a wuyin nan fuŋu tannaxate siine yi.

[Isa Alimasiiwu xaranlenmon allanɲaageye]

23 Piyeeri do Yohanna ware falle, i saage katta i kapanlenmon ŋa. Sadaxakiɲandaananyinmankon do xirisun ga da sefe su koni i da, i da a su saagandi i da. 24 Kapanlenmon ga da ku sefo mugu, i su kafi ti anniyi baane yi, na Alla ɲaaga ti ku digaamu nan ti : « O Kama, an ya n da kanmun do ɲiiɲen do geejin taga, a do fo wo fo su gaa i noxo. 25 An ya n da ku digaamu ro an komen laqen ŋa, ken ga ni o kisima Daawuda yi, ti Fanka Sennen ŋa nan ti :

“ Xabiila kuttun da ke direye xa ni manne yi ?

I da ku feera buru xa ni manne yi ?

26 Ɲiiɲen tunkanyugun kafi

jamaanen xirisun gemu xanbaane yi,

kuudo na Tunka Duumanten do i Kisindaana sugandinten gaja. ”

27 « Tonŋu, Hantipaasi do Ponti do xabiilan tanan do Banisirayilagankon yinme kafi ke debe noxon ŋa ti an komo senne Isa yi. An ga da ke be sugandi na a ɲa Alimasiiwu yi, duna kisindaana, 28 a ga da a ɲi an ga da fo wo fo rakutu, i da a su tinmandi ti an senben ŋa. 29 Tunka Duumante, saasa an yaaxen wa i baxabaxande ke yi de. Ken kuŋa, an komon deema i na an daalen kiɲandi seron ŋa ti saakoye yi. 30 An senben koyi kuudo jaareyen do kaawafiinun do taagumansun gabun nan ɲaŋi ti an komo senne Isa toxon ŋa. » 31 I ga da me ɲi noqu ke be na Alla ɲaaga, i duguta falle allanɲaageyen ŋa, non saralle. I su ga fogu Fanka Sennen ŋa, i da Alla digaamen gangu. I buttun xoto.

32 Jama ke be ga saxu Isa yi, genmen wa i naxan ŋa moxosiri. I sondomun do i yonkinun su ɲa baane. Duudan xalle ma ɲi sere su maxa ; be su xallen ni jaman kafon ya yi. 33 Kamane Isa da a wundiye bakka furun naxan ŋa koyi ti kaawafi xooron ŋa, horoma xoore wa i kanma. 34 Fo wo fo kontonte nta i du baananbe su yi, na a sababun ɲa, soxante, ma ka gaa sere su maxa, i wa a su gaagana do a jonkon nan ri, 35 na a kini faarun ŋa, i xa na a taxandi be su do ke be ga n xawa. 36 Misaale, yogo ɲi kapa i ya, a burujun ga giri Kiporo dunden ya yi, a toxon ni Yuusufu. Faarun da a xiri « Barinaabu », ken wure ga ni : « Buttu xotondaana ». 37 A da i soxante yogo xobo do a jonkon nan ri. A dumaxayanqante, na a kini Isa faarun ŋa.