Ɲangollu 5

[Hannaani do Safiira gaare]

Yugo yogo, a toxon ga ni Hannaani, ken xa do i yaqe Safiira kafi na i ɲiiɲe yogo gaaga. 2 I kafi xadi, na fo buruta bakka ɲiiɲe ke jonkon ŋa, Hannaani daga xaalisi kutte ke kini Isa Alimasiiwu ŋa. A da a ɲa xoyi ɲiiɲe ke jonkon su ya ga ni ken ŋa. 3 Xa, Piyeeri ti a da : « Hannaani, da an kita kan moxo, an ga da ke benaaxu ɲa Alla ŋa ? Mannen sigi an ga da ɲiiɲe ke jonkon buruta ? 4 An ra ɲi toqo ti an ɲiiɲen ŋa, ma an na a gaaga na a xaalisin ɲaŋi an haajun ŋa. Ke sinmayi bure da an kita kan moxo ? An ma benaaxu ɲa seron ŋa de ! An da benaaxun ɲa Alla ya yi. » 5 Hannaani ga da ku sefo mugu tan, a xenu nan kara. Sere wo sere ga da ke xibaare mugu, a su kanu moxoburu. 6 Maxanbaanun giri na a kasanka nan daga a bulu.

7 Leerinu sikki me dangi falle, Hannaani yaqen xa ri. Fi be ga ɲaŋi, a tuwaaxun nta a yi. 8 Piyeeri da a tirindi ti : « Axa da ɲiiɲe ke gaaga ke jonko ya yi ba ? » A da a jaabi nan ti : « O da a gaaga ke jonko ya yi ke. » 9 Ken noqu Piyeeri ti a da : « An do an kiina katu baqa Tunka Duumanten Fanka Sennen ŋa kan moxo ? Terinke, ku be ga daga an kiina bulu, i riyinton faayi, i na daga an xa bulu. » 10 Ken sigira su, yaxaren xenu Piyeeri wure nan kara. Ken do maxanbaanun riyinten ɲa baane, i yaaxen wa a furen wa saqa. I da a wutu nan daga a bulu i kiina kaaran ŋa. 11 Isanjaman do sere su ga da ke xibaare mugu, a su kanu moxoburu.

[Isa Alimasiiwu faarun kaawafi ɲaŋunto]

12 Isa Alimasiiwu da kaawafin do taagumansen gaben dabari jaman ŋa. Xaranlenmon su wa me ɲiini Sulemaanu perinŋen ŋa, i su ya ni ŋanniyi baane yi. 13 Seren su wa kanna i sagatana, ken do i fi su, i wa i tiigana moxosiri. 14 Seron gaa tallan saqa Kamanen ŋa, yugon do yaxare, jaman wa tallan gabono nan kafi xaranlenmon ŋa. 15 I do jangiranton do i daagonun do i saxufoonun saage riini killinxannen ŋa, kuudo Piyeeri danginte, ma hari a sirawun wa xenne i du baananbe kanma. 16 Ken me jama ya n gilli debinlenmu be gaa do kaaran ŋa. I do i watunton do i jinnagumun wa riini, i su na saha. 17 Ku fiinu saabu da, do i jama, kun ga ni ŋa, i su butu. 18 I da faaru ku raga nan daga i ro kasonka xooren ŋa. 19 Xa Tunka Duumanten maliikan yogo da faaru ku bagandi do wuron ŋa nan ti i da : 20 « Xa daga Allanbatikaxooren noqun ŋa, xa nan xaranŋundindi ti ke bireyi kurunba sefen ŋa. » 21 Faarun da maliikan sefen batu. I furute dagana Allanbatikaxooren noqun ŋa, nan xaranŋundindi.

Sadaxakiɲandaananyinmanken da xirisun su do kafu me yi. Ken falle, i da Allanbatikaxooren tangandaanon wara dagana faaru ku bagandi kason ŋa, kuudo i do i nan ri. 22 Tangandaanon ga daga, i ma i ɲi non ŋa. I saage katta kiitikutiran ŋa, i ti : 23 « O daga, o da kasonkonpon texenton ɲi, tangandaanon wa fonlaqun ŋa. Xa o ga da fonlaqun wuɲi, o ma sere baane ɲi i noxon ŋa. » 24 Tangandaanon yinmanken do sadaxakiɲandaananyinmankon ga da ken mugu, i lasame. I toxo du tirindini faarun ɲa moxon ŋa. 25 I gaa ken lasamayen noxon ŋa tan, yogo ri a koni i da nan ti : « Axa ga da sero ku be raga kason ŋa, i faayi jaman xaranŋundini Allanbatikaxooren noqun ŋa. »

26 Ken sigira su yi, tangandaanon yinmanken do i yugun daga do i batten ŋa. Xa i ma katu senbe koyini i ya, baawo i kanu jaman nan maxa gullon sedi i ya. 27 I ri i sigindi Kiitikutaanon sapan jon ŋa. Sadaxakiɲandaananyinmanken da i tirindi : 28 « O da axa kaba waajundini ti ke yugo toxon ŋa. Xa, axa da Yerusalaamu su xaranŋundi ti axa tuwaaxun ŋa. Ken bire keeta, axa na a mulla na a yonkin jongi oku ya yi ba ? » 29 Piyeeri do faarun ti a da : « Alla sagon ya n xawa dabarini, na seron sagon toxo no. 30 Axa ga da Isa ke be genge do sallibinsollen ŋa na a kari de, o faabanu Alla da ken ya wundu bakka furun naxan ŋa. 31 Alla da a wara du kaaran ŋa na a ɲa yinmanke, na a ɲa kisindaana kuudo Banisirayilagankon na katu du rasaagana na i jikkunun faraaxu, i junuubunun na xafari. 32 Oku wa ke su seedaaxun ŋa, o do Fanka Senne ke be Alla ga da a kini i battaanon ŋa. »

33 Kiitikutaanon sapan ga da ku sefo mugu, i butu ma i nan ti i wa faaru ku karini. 34  yogo ɲi kapa ke sapa ke yi, a toxon ga ni Gamaleeli. Sariyanxaranmoxon ya ni, a su kaawanten wa a yi. Aken ya n giri sigi nan ti i na faaru ku bagandi sellan ŋa fina. 35 Ken falle, a ti jaman da : « , axa ga na ɲi fo wo fo ɲaana ku sero yi, axa jaatiraga ya fina ken de ! 36 A ma hari dalla, Teyida ga da du ɲa seri xoore yi, komo naxati sere ya n sukke do a yi, a kara. Sere su ga ɲi do a yi, a su sanqi ; hari seri baane ma toxo a jaman falle. 37 Teyida dangi falle, Galiilenke yogo, ken ga ni yi, a xa da jama xoore sukkandi do du yi, ken gemu bire be tunkanyugon gaa jamaanen seron jaatene ya, a xa sanku. A jaman sanqi. 38 N gaa fi be koono axa da, xa da axa fi bogu ku sero xibaaren ŋa de. Selli i sinmayu ku do i gollun ga giri sere ya yi, i wa ɲamene wo. 39 Selli i sinmayu ku do i gollun ga giri Alla ya yi, axa ra nta fo wo fo bakka a yi de ! O na o kiilun toxo o yinmenu yi, o n maxa ɲa Alla da xonno yi. »

Kiitikutaanon duŋe ti Gamaleeli sefon ŋa. 40 I da faaru ku xiri, na katundaanon wara i ya na i katu, na i gongo ti i nan maxa sefe ti Isa toxon ŋa ke ta dangi falle. Ken falle na i wara. 41 Faaru ku ɲaxalinta xooron bogu kiitikutiran ŋa, baawo Alla da darontaaxun ɲaŋi i da, i ga da ke yaagu xoore kita do Isa fin batten ŋa. 42 Koota su, i wa seron xaranŋundini Allanbatikaxooren noqun do kaanun noxon ŋa, na kiɲandi Isa fin kanma.