[Seron ɲeri sugandinde]
6
A waxatin ŋa,
koota su fo ya n kapa isanxaranlenman gaboyen ŋa.
Yehuudiyanu be gaa gerekinxannen koono,
i jigi Yehuudiyanu be gaa habaraaninxannen koono nan ti,
i wa yigeene nan mungu do ikun furujanton ŋa koota su.
2 Faarun tanmi do fillon da isanxaranlenmon su kafu me yi kuŋa nan ti i da :
« A ma daga o na Alla digaamen konŋen toxo no ti yigandi taxandinde.
3 Ken kuŋa,
n waaxinu,
axa yinmenu na sero ɲeri sugandi,
sero beenu ga ni sondon sirun ŋa,
i ga fogu ti Alla Fanka Sennen ŋa,
fontuwaano ga ni,
o na ke golle xaliifa i ya.
4 Ken ŋa,
oku na sukke do allanbatiyen do Xibaari Liŋen kiɲanden ŋa seron da. »
5 Jaman su duŋe ti ke sefe yi.
I da Sittifana sugandi ;
sere ya ni,
a ga toŋondi moxosiri,
a ga fogu ti Fanka Sennen ŋa,
a do Filipu,
kafiini Poroxoora,
Nikkanooro,
Timoona,
do Parimeena,
do Nikkola,
ken gaa bakka Hansooxi-siiri jamaanen ŋa,
a da a ɲi aken tuubi nan ro Yehuudiyan diinan ŋa.
6 I da i koyi faarun ŋa,
faarun da i kittun saxu i yinmun kanma na Alla ɲaaga i da.
7 Alla Alimasiiwu Xibaari Liŋen wa tallan sanqini,
isanxaranlenmon wa tallan gaboono Yerusalaamu yi.
Sadaxakiɲandaanan fo gabe danqanaaxu ti Isa yi.
[Sittifana rageye]
8 Alla senben do a horoman wa Sittifana kanma siri.
A wa taagumansun do kaawafi xooron gabun ɲaana jaman jon ŋa.
9 I gaa Yehuudiyanun allanxaranka be xilli « Komohooronton Allanxaranka »,
Kireenenka Yehuudiyanun yogo do Lekandooronkan Yehuudiyanun yogo wa me ɲiini no.
Ikun do Kiliikinkan Yehuudiyanu yogo do Haasinkan Yehuudiyanu yogo,
i ya do Sittifana nan saage me kutana.
10 Xa i ra nta a fanqana,
a sefene ti faamuyen do Alla Fanka Sennen senben ya yi.
11 I ga konto a yi,
i da seron tuga ti i nan ti :
« O da a mugu a gaa Alla do annabi Muusa diganburunu. »
12 Ke saabu da,
i da jaman murutindi,
na xirisun do sariyanxaranmoxonun murutindi.
I da Sittifana muuru na a raga nan daga a sigindi Kiitikutaanon sapan jon ŋa.
13 I do seedaana gaaranto xa daga.
Kun xa ti :
« Ke yugo na o allanbatika senne ke do Tawureeta ya botoburunu de !
14 O da a mugu a gaa tini Isa Nasaaranke ke riini o allanbatika ke ya guruja.
Muusa ga da laada be kini o yi,
na ken xa bonondi. »
15 Sere su gaa kiitikutira ke yi,
a su da i yaaxen tonto Sittifana yi ;
a yeeson nooronten wa xoyi maliikan yeeson moxo.