Ɲangollu 7

[Sittifana maaba]

ti Sittifana da : « I ga da ke be ko an ŋa, tonŋun ya ni ba ? » 2 Sittifana ti : « N maarenmu, n faabanu, xa da in terinka. O kisima Ibirahiima gaa Mesuputaami yi bire be, saado a gaa dagana Haraana, Alla nooronten da du koyi a yi. 3 A ti a da :

“ Giri an jamaanen do an faabankan ŋa, an nan daga in gaa jamaane ke be koyini an ŋa. ”

4 « Ibirahiima giri Kasaadinun jamaanen ŋa, nan daga Haraana. Faaben faati falle, Alla da a girindi Haraana nan ri a taaxundi axa gaa jamaane ke be yi lenki. 5 Alla ma duudan ɲiiɲe su kini a yi, hari tansaqa baane haqe. Ganta, a da laayidun ken wutu a da nan ti i wa jamaane ke kinni a yi, a bonsonŋun gaa a xallaaxunu hari a faati falle. Na a ɲi, hari renme nta Ibirahiima maxa ken bire yi. 6 Alla ti a da :

“ An bonsonŋun telle mukkaaxu wandi jamaane ya yi, i na i ɲa komo, i na i roxo kamo naxati siine.

7 Xabiila ke be ga da i ɲa komo, ma in ga ri ken xabiila yanganxata.

Ken falle ya ni, i na giri non ŋa, i na ri in batu yere. ”

8 « Ken falle, Alla da laayidun tafu i do Ibirahiima naxan ŋa, ke be taagumansen ga ɲa sunnanden ŋa. Ken ya saabu da, Ibirahiima ren yugo Isiyaaxa saaraye koyen ga tinme, a ga da a sunnandi. Isiyaaxa xa da i ren yugo Yaaxuba sunnandi, Yaaxuba xa da i renmun sunnandi, kun ga ni o kisimanun tanmi do fillon ŋa.

9 « O kisimanu da i waaxi Yuusufu xoni, na a gaaga Misiranka dagaanon ŋa. Xa Alla ɲi do Yuusufu batten ŋa. 10 A da a bogu tanpiyen su yi. Alla da Yuusufu deema na a ɲa haqila xoora gume yi, na a fin liŋondi Firawunan da, ken ga ni Misira tunkanyugon ŋa. Firawunan da Yuusufu toorindi na a ɲa jamaanen yinmanken ŋa, na i kan fiinun su toxo a kitten ŋa. 11 Dullun xosi kutundi Misira jamaanen do Kanaana su yi. Haadamaaxun tanpi moxosiri ; biraado fo wo fo ntaxa o kisimanu maxa. 12 Yaaxuba ga da a mugu nan ti biraadon wa Misira yi, a da o kisimanu deni biraadomuuri. 13 I ga daga ta fillandin ŋa, Yuusufu da du tuyindi o kisimanu yi, Firawunan xa da a mugu ti Yuusufu waaxinun ya ni. 14 Yuusufu da seron wara dagana do i faaba Yaaxuba do i kan su batten ŋa. Ka ke seran jaaten wa tanɲere do sero karagi. 15 Yaaxuba do i koren ri Misira yi kuŋa, a do o kisimanu su faati non ya yi. 16 Ibirahiima ga da xabura be xobo Hamooro renmun ŋa Sixemu jamaanen ŋa, i daga i firindi non ŋa. 17 Alla ga da laayidu ke be wutu Ibirahiima da, a biren ga tinko, o xabiilan tallan xooro Misira noxon ŋa. 18 Ken falle, tunka kurunba ri taaxu Misira yinmen ŋa, ken ma ɲi Yuusufu tu. 19 Ken tunka sanga ti o xabiilan ŋa, na o kisimanu roxo. A da i waajibi nan ti i na i renmun sedi kuudo i na kara.

20 « Annabi Muusa teeri ken bire yinme ya yi. A siren ni moxosiri, Alla wa a mulla. A da xasu sikki ɲaŋi i ma maxa i faaba kan ŋa. 21 Ken falle ya ni, saaxen ga daga a sedi. Misira tunkanyugon ren yaxaren da a sagara nan daga a xoorondi xoyi i yinme renmen moxo. 22 Kundu ya ni, Muusa ga da Misira tuwaaxun su kita. A ɲa sere yi, a sefen do a gollen su ga n dara. 23 A ga kiɲe tannaxate siine yi, a da a ŋanniya i nan daga i maarenmun wari, kun ga ni ŋa. 24 A ga daga, a da a ɲi Misiranke yogo gaa a maarenmu ku du baananbe roxono. A faasandi a da. A da Misiranke ke katu, na a kari. 25 A sinmaye, i maarenmun wa a faamunu nan ti Alla na i bakka komaaxun ŋa ti ike ya yi, xa i ma a faamu. 26 Ken bitafilla, Muusa ga daga non ŋa xadi, a da Banisirayilaganko filli ɲi gajanŋa, a ga ɲi a mulla na tonŋun ko i naxa, a ti i da : “ N maarenmu, axa ya feti sere baanu yi gani, manne ni axa gaa me toorono kundu ? ” 27 Xa kuudo na Muusa raqen bogu sefen ŋa, baqalla ke ti a da :

“ Ko n da an ɲa o da yinmanke yi ti an na o kiiti ?

28 An na a mulla an na in xa kari xoyi daaru Misiranke ke moxon ya yi ba ? ”

29 « Ke sefe saabu da, Muusa wuru nan daga ɲa mukke yi Mediyaana jamaanen ŋa. Na a toxo no, a yaxi nan jiidi ti ren yugu filli yi.

30 « Tannaxate siine ken falle, maliikan da du koyi Muusa yi badagi kuminten noxon ŋa Tuurisiina giden gunjuran ŋa. 31 Muusa ga da ken wari, a kaawafi. Xa a ga ɲi a mulla nan tinko a yi kuudo i na a duuxura, a da Tunka Duumanten sefexannen mugu nan ti :

32 “ Nke ya ni an kisimanu Alla yi, Ibirahiima do Isiyaaxa do Yaaxuba Alla. ”

« Xaaxantaaxun saabu da, Muusa maxa katu a faayini. 33 Tunka Duumanten ti a da kuŋa :

“ An tepunun bagandi, baawo an gaa dingira ke be yi kundu, a sennen ya ni.

34 N da in jaman tooran wari Misiranko maxa ; n da i laxaraxaasaxannen mugu.

N yanqa ya keeta nan ri i bogu ken toora yi. Saasa daga, n wa an xayini Misira yi. ”

35 « Banisirayilaganko ga bara Muusa ke be yi de, i ga ti :

“ Ko n da an ɲa o da yinmanke yi ti an na o kiiti ? ”

« Alla da ken ya xayi na a ɲa yinmanke do maxawasandaana yi ti maliika ke be ga sefe a da badagi kuminten noxon ŋa. 36 Ken Muusa ya n da Banisirayilagankon bagandi Misira yi, na kaawafiinun do taagumansun dabari Misira jamaanen noxon do Xulunjuumu fanŋen kutunden ŋa, na kun me kaawafiinu do taagumansun dabari gunjuran ŋa tannaxate siine. 37 Aken Muusa ya n ti Banisirayilagankon da xadi :

“ Alla wa riitini katta axa yi, a gaa xoyi in moxo,

a bakka axa xabiila ke ya yi. ”

38 « Banisirayilaganko ga da wuce su ɲa gunjura ke yi, i do ken Muusa ya ni, maliikan gaa sefene a da Tuurisiina giden kanma. Bireyen sefon kini a ya yi ti a na i kiɲandi o yi. 39 Xa o kisimanu ma ɲi a terinkana. I da a yinme xoni nan nimisi do saagayen ya yi katta Misira yi. 40 I ti da :

“ Kamanu dabari o da i gaa wareene o kaane,

baawo aken Muusa be ga da o girindi Misira, o ntaxa a moxo tu. ”

41 « I da gunbunlenme taga kuŋa, na a ɲa muno yi na a sadaxi. I da i yinmenu kittirangollen ɲaxa ɲaxa xoore yi. 42 Ke saabu da, Alla da i fi bogu i maxa. I toxo kanmun saanun batta xoyi munonu, xoyi a safante gaa kitaaben ŋa moxo be nan ti :

“ Banisirayilaganko,

Axa gaa gunjura ke noxon ŋa ke tannaxate siine,

Yaala axa da naabure ya sadaxi in danŋa ba, ma axa da fo tana ya sadaxi in da ?

43 Aayi, xa muno ke be toxon ga ni Moleexi, axa da a tilliisen wutu.

Ke be xa toxon ga ni Lefaana, axa da a xa saanen wutu.

Axa yinmenu xa ya n da kun dabari na i batu xa de.

Ke ya saabu da, n gaa axa gengene dagana ma Baabila falle. ”

44 « Genmanlenmaaxun tilliisen ɲi o kisimanu maxa gunjura ke yi. Muusa da tilliise ke dabari xoyi Alla ga da a koni a da moxo ke be ya yi. A da a dabari xoyi a ga demu ke be me ya walla. 45 Genmanlenmaaxun tilliisen ga mare o faabanu yi, i do a daga Alla ga da i deema xabiilanun xatana bakka jamaane ke be yi. Ken bire, Yuusawu ya ni jamangumen ŋa. Tilliisen toxo no, ma Tunka Daawuda kiyen gaa riini. 46 Alla da Tunka Daawuda neema, a xa da Alla ɲaaga, a nan duŋe i da, i na ka taga a da, aken be ga ni Yaaxuba Alla yi. 47 Xa, Tunka Daawuda renme Sulemaanu ya n ɲa ka ke tagandaanan ŋa. 48 A xa de, seron ka tagante ra nta ɲaana Alla wuruginten da wuyira yi. Xoyi annabinyinmen ga da a ko moxo be nan ti :

49 Tunka Duumanten ti :

“ Kanmun ni in tunkantaaxaaden ya yi ;

ɲiiɲen ni in taanun yanqaran ya yi.

Axakun katta manne ka xa tagana inke da ?

N katta tuumana kan noqu yi ?

50 Keti inke ya kitten ma ke su taga gani ? ” »

51 Sittifana sefon lagarun ŋa, a ti kiitikutiran seron da : « Ku xandunxoto ku, sondonkaafirinu ku, axa nta Alla xirinden mukku. Axa ma duŋe da harisa. Axa do axa faabanu su ya nta baana gani ! 52 Kan annabinyinmen ri, axa faabanu ga ma a tooro ? Ke be ga ni seron su seri teleŋonten ŋa, ku be ga sefe ti a riyen ŋa, axa da i kari. Axa da ken seri teleŋonte yinme ya janba, axa ga da a kari a ma hari dalla. 53 Alla da kini hari maliikan ŋa ti a nan ri a kini annabi Muusa yi, axa ma a batu. »

[Sittifana gididunwarande]

54 Sittifana ga da ku sefo ko, kiitikutaanon butu ma a su yaaxon nan dunbu xoyi fore. 55 Xa Sittifana fakkan ya ni ti Fanka Sennen ŋa. A ga da i yaaxon tonto kanmun ŋa, a da Alla nooron wari, Isa Alimasiiwu siginten wa a tayen ŋa. 56 Sittifana ti : « Xa terinke ! N yaaxen faayi kanmun raqen wuɲinten ŋa, siginten wa Alla tayen ŋa. » 57 I da wonjoŋen gabondi na a ɲa xoyi i taron nta fo yi. I su dire katta Sittifana yi na a raga. 58 I da i yiraamun xaliifa maxanbaane yogo yi, a toxon ni Sawulu. Ken falle i do Sittifana bogu deben ŋa, na a gididunwara. 59 I gaa a gididunwalla, a wa talla Kamanen gangunu nan ti : « N kama Isa, n yonkin raga. » 60 Ken falle, a xenu nan tusi. A ferenpenti nan ti : « Maxa i raga ti i junuubunun ŋa de, n Kama ! » A kara na ku sefo ya toxo a raqen ŋa.