Ɲangollu 8

Sittifana kallen liŋo Sawulu da.

[Isanjaman tooreye]

Ken koota baane su, i da isanjaman tooronden jopa yi. Jama ke su sanqi do debun ŋa, do jamaane, a ga ma ɲa Isa ya yi ga fe. 2 Seri siru yogonu da Sittifana firindi, nan taaxu a baaden ŋa, na a wu moxosiri.

3 Sawulu ken ɲi i duruxotoyen su ya dabarini isanjama ke ra gaa sanqini moxo be yi. A wa roono do kaanun ŋa na i bagandi, yugon do yaxare, nan daga i sedi kason ŋa.

[Xibaari Liŋen kiɲande maran do Somooro maran ŋa]

(8.4-12.25)

[Filipu Xibaari Liŋin kiɲandiye Somooro maran ŋa]

4 Ku beenu ga sanqi, i da jamaanen wura, na kiɲandi seron ŋa. 5 Filipu xa daga Somooro debe yogo yi na Xibaari Liŋen kiɲandi no. 6 Filipu gaa sefene, ken debe seron su tarun tugunton ya ni, baawo a ga da kaawafi su dabari, i da a xibaaren mugu, i da a wari. 7 Na tugu ti, jinnagumun xa jinnan do xaaruyen gaa bakka i ya, a wa muruxunton do jogooninton xa sahandini. 8 Ken debe sewo moxosiri.

9 Simoonantoxo yogo xa ɲi non ŋa, a gaa du walla xoyi seri siita ya yi, Somooronkon kaawanten wa a jinnamansaaxun ŋa. 10 A su ɲi a terinkana ya xa mene, leminen do xirise. Ma i nan ti : « I gaa Alla senbe ke be xilli “ Senbe Dare ”, ke yugo ya ni. » 11 I saxunton ɲi Simoona jinnamansaaxun ŋa buru, baawo a dalla kaawafi dabarini i jon ŋa. 12 Xa Filipu ga saage sefene i da ti do Isa Alimasiiwu Xibaari Liŋen kiɲanden ŋa, i saxu a yi. Yugun do yaxarun su saage wanqini nan tuubi. 13 Aken Simoona be ga ɲi jinnamansaaxu ke yi, a xa saxu Isa yi nan wanqi. A do Filipu ɲa doome yi. Filipu gaa kaawafi xooro be do taagumansu be dabarini, Simoona ma xenpa su kita i ya.

14 Isa be ga ɲi Yerusalaamu yi, i ga da a mugu nan ti Somooronkon saxu Alla digaamen ŋa, i da Piyeeri do Yohanna deni non ŋa. 15 Piyeeri do Yohanna ga kiɲe, i da Alla ɲaaga, kuudo i na Alla xa kita. 16 I ɲi ga wanqi ya tan nan sukke do Kamane Isa killen ŋa, xa Fanka Sennen ma yanqa i du baananbe su kanma fina. 17 Piyeeri do Yohanna ga da i kittun saxu i yinmun ŋa baane-baane, ken bire ya ni, a su da Fanka Sennen kita.

18 Simoona ga da a wari nan ti toŋondinton da Fanka Sennen kita, a xa da xaalisin bagandi katta Piyeeri do Yohanna yi 19 nan ti : « Xa da ke golle toŋo in xa yi ! N ga na in kitten saxu sere be yinmen ŋa, a gaa Fanka Sennen kitta. » 20 Xa, Piyeeri ti a da : « Hari na an do an xaalisi ke su halaki, an da a sinma nan ti an ra wa Alla kuyen xobono ya ba ? 21 Taqe su nta an maxa yere, sigira xa nta kiniini an ŋa, baawo an sondomen xulle fe katta Alla yi. 22 An da fo buru xoore dabari. Nimisi, an na Kamanen ɲaaga, a me wa du, a na yanpa an maxa. 23 N da a tu nan ti jikkuburugumu xoore ya ni an ŋa, an xannen fakkan ya ni junuubu. » 24 Simoona ti kuŋa : « Ee Piyeeri ! Ee Yohanna ! Xa duruxoto axa na Kamanen ɲaaga in da. Ken ga fe, n nan maxa ɲa axa ga da ke be ko. »

25 Piyeeri do Yohanna ga seede ti ke be yi Kamanen fin kanma, i da a kiɲandi seron ŋa. Ken falle, i saage katta Yerusalaamu yi. I da Xibaari Liŋen kiɲandi Somooronkon debi gabe yi do killen ŋa.

[Filipu do Copinkan fankama yogo me wariye]

26 Tunka Duumanten maliika yogo ti Filipu da : « Daga do banboxun ŋa, kille be gaa gilli Yerusalaamu nan daga Gaaja, an na ken wutu a seren ma gabo. » 27 Ken sigira su, Filipu daga. A dagante, a do Copinkanfankama sanante yogo gemu, a gaa gilli hiiji Yerusalaamu yi. Yugo ke ni Copi Kandaaxe yaxaren golliɲaŋaanon yinmanken ya yi, a ya na a naaburen xa yinmen ŋa. 28 Yugo ke saaganten ya ni katta i kaara. A taaxunten gaa i wotoron noxon ŋa, kitaaben wa a maxa, a gaa a xaranŋa. 29 Fanka Sennen ti Filipu da : « A soobe katta ke wotorogume yi. » 30 Filipu da i tan jawondi. A taron wa yugo ke yi, a wa annabi Yesayaahu kitaaben xaranŋa. A ti a da : « An gaa ku be xaranŋa, an wa i wure tu ba ? » 31 A ti a da : « Sere ya ga ma a wure koni in da, n katta a tuunu kan moxo ? » A ti Filipu nan setu kapa i ya, a n taaxu i kaaran ŋa. 32 A ga ɲi noqu be xaranŋa Safandi Sennun ŋa, a faayi :

« A ɲa xoyi jaxe, i do a gaa telle karindiran ŋa,

a muumu xoyi i gaa jaxanlenme be yinten xece.

Hari “ n ti ”, a ma a ko.

33 I ma a jaate sere yi, sakkati i na sigira xa ɲaŋi a da.

Ko n katta bonsonŋe sefe koono a fin ŋa ?

Baawo, i da a dunadunbireyen ya bonondi. »

34 Yugo ke ti Filipu da : « Haqutoxo, n na an tirindi : annabinyinme ke wo, a na ko baane fin koono kundu yi, a yinme ba, ma sere tana ? » 35 Filipu da sefen wutu kuŋa. A xosi a jopa ke aaye ya yi, na Isa Alimasiiwu Xibaari Liŋen kiɲandi yugon ŋa. 36 I gaa killen kanma dagana, i ri ware jinyaaxe yogo yi. Yugo ke ti Filipu da : « Jin faayi ! An nta xosini in wanqini dubaane ? » 37 {Filipu ti a da : « An sondomen xullen ga ni su, an ra wa wanqini. » A ti : « N saxu a yi nan ti Isa ni ya yi. »} 38 Filipu ti a na wotoron sigindi. I yanqa jin ŋa, a da a wanqi. 39 I sege falle bakka jin ŋa, Tunka Duumanten Fanken do Filipu daga. A sanku yugo ke yi, xa aken sewonten toxo do i killen ŋa. 40 Filipu ken yinme daga du ɲi ma Hajooti. A giri non ŋa nan daga deben ŋa. A ga bogu ti debe su yi, a da Xibaari Liŋen kiɲandi non ŋa.