Ɲangollu 9

[Sawulu tuubiye]

Ken da a ɲi Sawulu wa Kamanen xaranlenmon baxa-baxana nan ti i wa i karini. A daga katta ŋa koota yogo 2 ti a na ɲaamarindi bataaxe kini i ya, i nan daga Yehuudiyanun ŋa Damaasi yi. I ga na sero beenu ɲi Kamanen killen kanma non ŋa, i na i raga, i do i na ri yi. 3 Aken gaa killen ŋa, fonne ya n toxo a na kiɲe Damaasi yi. A gaa seedene ke be yi, nooro xoore xosi giri kanmun ŋa na a xufaari. 4 Ken ga ɲaŋi, a ɲa xa bura. Fo yogo ti a da : « Sawulu ! Sawulu ! An na in toorono manne ? » 5 A da a tirindi nan ti : « Kamane, ko ke ni an ŋa de ? » Ken fo yogo ti a da : « Nke Isa ya ni. An na inke ya toorono. 6 Xa giri, an nan kiɲe kaanun ŋa. An ga na kiɲe, an ga n xawa ke be dabarini, i wa a koono an da. » 7 Sawulu teranlenmon wa sikki, hari « n ti », i ma katu a koono. I taron wa sefexannen ŋa, xa i yaaxen nta sere yi. 8 Sawulu giri na i yaaxon wuɲi, xa a yaaxen nta fo wo fo yi. I da a raga ti kitten ŋa, do a nan kiɲe Damaasi yi. 9 Bito sikki, a yaaxen nta fo wo fo yi ; a ma yige, a ma mini.

10 Isanxaranlenma yogo wa Damaasi yi, a toxon ga ni Hannaani. Kamanen da du koyi a yi nan ti a da : « Hannaani ! » A ti : « N da an ɲumi, Kamane. » 11 Kamanen ti a da : « I gaa kille ke be xilli “ Killiteleŋonte ”, a raga dagana, ma an ga n kiɲe kan ŋa. Taarisinke yogo wa no, a toxon ga ni Sawulu, a do allanbatten wa me yi. 12 Na a toxo allanbatte ke yi, n da anken Hannaani ya koyi a yi wuraaxun ŋa, an ga ro kan ŋa, na an kitten saxu a yinmen ŋa, kuudo a yaaxon na wuɲi. » 13 Hannaani ti : « Kamane, ke yugo ga da golli bure su ɲa an jama sennen ŋa Yerusalaamu, n da a laxamin mugu seri gabe yi de ! 14 A ga ri yere yi kundu, sadaxakiɲandaananyinmankon da ɲaamariyen ya kini a yi nan ti a nan ri sere su gaa an toxon ya koono, a na i raga. » 15 Xa Kamanen ti a da : « Anke nan daga tannu. Nke yinme ya n da a sugandi xoyi golliɲanyokke. A na in toxon tuyindi xabiilan tananun do i tunkanyugun do su yi. 16 A gaa toora su walla do in batten ŋa, n yinme wa a su koyini a yi. » 17 Hannaani daga kuŋa. A ga kiɲe, a ro kan ŋa na i kitten saxu Sawulu yinmen kanma nan ti a da : « N waaxi Sawulu, Kamane Isa ke be ga da du koyi an ŋa killen ŋa, ken ya n da in xayi nan ti in nan ri an yaaxon wuɲi, an na fogu ti Alla xa yi. » 18 Ken sigira su yi, koronmaanu yogo yere bakka Sawulu yaaxon ŋa, a da fo wari. A wanqi nan tuubi. 19 Ken falle a yige nan xoto.

[Sawulu waajunde Damaasi yi]

Sawulu do Damaasi isanxaranlenmon da bitan jaatu ɲa doome. 20 Karama a saage waajundini Yehuudiyanun allanxarankaanun noxon ŋa, nan ti Isa ni ya yi. 21 Sere su ga da a terinka, a ɲaŋi i maxa kaawafi. I toxo me tirindini nan ti : « Ku beenu ga ɲi sefene ti Isa toxon ŋa, keti ke yugo ya ma ɲi i baxa-baxana ti i wa i karini gani ? A ya ma ri yere ti i wa i ragana na surunmen ro a su yi do i nan daga katta Yerusalaamu sadaxakiɲandaananyinmankon ŋa ? » 22 Ken do i fi su, Sawulu ken tallan xoto do sefen ŋa, na a koyi nan ti Isa ni ke ya yi. Ken da Damaasi Yehuudiyanun lasama ma a gaa dangini haqen ŋa. I ntaxa a tu i gaa ke be jaabini a yi.

23 Wuce dangi falle, Damaasi Yehuudiyanun kafi na Sawulu kallen feeran kutu. 24 I da deben roraqun do a boguraqen su raga wuron do kiye kuudo i na a raga na a kari. Xa, Sawulu da i janbayen xibaaren mugu. 25 Ken ya ni koota yogo wuron ga ro, isanxaranlenmon xa da Sawulu ro kacingolla xoore noxon ŋa, na a yanqandi ti deben tageyen falle.

[Sawulu saageye katta Yerusalaamu yi]

26 Sawulu ga kiɲe Yerusalaamu, a da a xanu i nan kafi isanxaranlenmo beenu gaa non ŋa, xa a su kanu a yi, baawo i ma saxu a tuubiyen ŋa. 27 Ken kuŋa, Barinaabu da feera kutu a do Sawulu nan kiɲe ŋa. Sawulu ga da Kamanen wari killen ŋa moxo be, a da a koni i da nan ti a sefe a danŋa yinme ya. A do Sawulu gaa waajundini ti Isa toxon ŋa Damaasi yi moxo be ti duruxotoye yi, Barinaabu da a su ko. 28 Gelli ken ŋa, Sawulu kafi faarun ŋa. A do i wa do Yerusalaamu banŋe wo banŋe, nan waajundi ti Kamanen toxon ŋa, a haqilen taaxunte. 29 Yehuudiyanu be gaa gerekinxannen koono, Sawulu ɲi telle masala kun xa banŋe, xa kun finna a kara feeran ya muurunu. 30 Sawulu kapanlenmon ga da ken mugu, i da a tunsi katta yi, na a girindi non ŋa, na a deni Taarisi yi.

31 Isa yinmotoonun da laxafiya kita do do maran su yi keeta. Allankannen do Fanka Sennen deemanden saabu da jaman wa gaboono, a danqanaaxun wa tallan xoorono.

[Yeene sahande]

32 Piyeeri be gaa do jamaanen muuman ŋa, koota yogo, a kiɲe Liidi jama sennen ŋa. 33 A da yugo yogo ɲi non ŋa, a toxon ga ni Yeene, siino segi a muruxunten gaa i batten ŋa. 34 Piyeeri ti a da : « Yeene ! Isa Alimasiiwu da an sahandi. Giri an na an saxan gunu. » Ken sigira su, Yeene giri. 35 Liidinko do Saroona xunan su ga da ken wari, i teleŋo Kamanen ŋa.

[Taabita furen wundiye]

36 Xaranlenmo beenu gaa Yaafo, yaxare yogo ɲi kapa i ya, a toxon ga ni Taabita. Gerekinxannen ŋa, Taabita wure ya ni « tibille ». A gollen ma ɲi fo wo fo nan siro misikiinun da ga fe. 37 Koota yogo, a xaji nan faati. I da a wanqi nan daga a saxundi konpe yogo noxon ŋa sankanson kanma. 38 Yaafo isanxaranlenmon ga da a mugu nan ti Piyeeri wa Liidi, a do Yaafo ma laato, i da sero filli xayi a yi nan ti a nan duruxoto a n ri karama. 39 Ken sigira su, Piyeeri do sero ku filli sukke me yi. A ga kiɲe, i da a sege sankanson kanma. Taabita ga da yiraame su miri birantaaxun ŋa, kiinakariidonun ri i koyi Piyeeri yi, i do sonqo. 40 Piyeeri da haadamaaxun bagandi, nan tusi na Alla batu. Ken falle, a felexite katta fure ke yi nan ti : « Taabita, giri ! » A da i yaaxon wuɲi. A ga da Piyeeri wari, a giri a taaxu. 41 Piyeeri da a raga ti kitten ŋa na a girindi sigi. Ken falle, a da jama sennen do furujanton xiri na Taabita biranten koyi i ya. 42 Yaafonkon su bogu ken xala. Seri gabe saxu Kamanen ŋa na a killen batu. 43 Piyeeri da wucu laate ɲa garanka yugo yogo kan ŋa Yaafo yi, a toxon ya ni Simoona.