Ɲangollu 10

[Koroneeli maliikawariye]

Yugo yogo ɲi deben ŋa, a toxon ya ni Koroneeli. A ɲi kame kuranlenma ya yinmen ŋa Roomunko kurunkitte yogo yi, i gaa ken xilli « Yitaali kurunkitte ». 2 Yugo ke do i kan su ni muumininun ya yi, allankannaanon ya ni. A wa Yehuudiya misikiinun deemana ti jakkan ŋa. A wa Alla batta moxosiri. 3 Koota yogo, sallifanan biren ŋa, Alla maliika yogo ro a kan ŋa, a da a wari na a laaba. Maliika ke ti a da : « Koroneeli. » 4 Xaaxantaaxu saabu da, a taaxu na i yaaxon tonto maliika ke yi nan ti a da : « Kamane, manne ni ? » Maliika ke ti a da : « Alla da an duwanŋun raga, a do an ga da deemande su ɲa misikiinun da, a kiilun wa an kanma. 5-6 Saasa, sero wara dagana do yugo yogo batten ŋa Yaafo yi, a toxon ya ni Simoona, i gaa tini Piyeeri, a yanqanten ni garanka yugo yogo ya yi, i wa tini a xa da Simoona, a kan wa geejinxannen ŋa, ti i do mukke ke nan ri. » 7 Maliika ke ga da ku sefo ko, a daga. Koroneeli da sero filli xiri i golliɲaŋaanon ŋa, sorodaasi xa be siginten gaa aken yinme fiinun ŋa, muuminin ya ni. 8 A da fi ke su laxami i da, ken falle a da i xayi Yaafo.

9 A yillakaran ŋa, i ware killen ŋa katta Yaafo. Ken waxati da Piyeeri ɲi xuben kanma kinsigan ŋa, a gaa allanbatini. 10 Dullen da a raga. A da a xanu i n yige. I gaa a yiganden soronden kanma, a da fo yogo wari. 11 A da kanmun raqen ya wari a ga wuɲi. Fo yogo banbanten wa yanqana riini katta ɲiiɲen ŋa, xoyi yiran xoore. 12 Daaban xabiila ke su wa yiraame ke noxon ŋa : tannaxaton do gonxiila, ken do yelin xabiila ke su. 13 Sefexanne yogo ti a da : « Piyeeri ! Giri ku kari an na i yiga. » 14 Xa Piyeeri ti : « Kamane, abada ! N nta fo kabante yigana. N ma fo sobinte ro in raqen ŋa abada. » 15 Sefexanne ke yille tini a da : « Alla ga da ke be senondi, maxa a raga fo sobinte yi. » 16 Ke koni xanne ta sikko ; yiranma ke sege kanmun ŋa ken sigira su yi.

17 Piyeeri ga da ke be wari, ken da a lasama. Ken da a ɲi Koroneeli ga da sero be xayi, i do Simoona kan muurunden wa me yi, ma i gaa riini siga a ganlaqen ŋa. 18 I gangundi nan tirindindi ti : « I gaa tini Simoonantoxo ke be da Piyeeri, a yanqa yere ya yi ba ? » 19 Piyeeri ga da fo lasamante ke be wari, a do sinmayen wa finna me yi a kanma. A gaa ken ŋa, Alla ti a da : « Sero sikki wa an muurunu. 20 A soobe yanqana, an nan sukke do i batten ŋa, maxa sikka de, nke ya n da i xayi an ŋa. » 21 Piyeeri yanqa katta sero ku sikki yi nan ti i da : « Axa gaa sere ke be muurunu, nke ya ni. Axa ti kan moxo ? » 22 I ti a da : « Koroneeli ken ga ni sorodaasinxirisen ŋa, a ya n ti o nan ri do an ŋa. Seri teleŋonte ya ni, allankannaana xoore, sere ya ni xadi Yehuudiyanun su kaawanten gaa a yi. Alla maliika yogo ya n ti a na faare wara an ŋa, kuudo an nan ri a ka ke yi. An ga na fo wo fo koni a da, a nan sukke do ken ŋa. » 23 Piyeeri da i bisimilla na wuyiran kini i ya. Yillen ga kare, a do i sukke me yi dagana. Isanwaaxinu beenu gaa Yaafo, yogonu daga i tunsi.

[Piyeeri dagaye Koroneeli banŋe]

24 Ken yillakara, i daga Kesaariye. Ken da a ɲi, Koroneeli xa da i maarenmun do i xananun xiri. I su taaxu na Piyeeri dugu. 25 Piyeeri ga kiɲe, Koroneeli giri nan gemu a yi, na i dumaxayanqa nan tusi a da, na a darontankuuɲi. 26 Xa Piyeeri da a girindi nan ti a da : « Giri, baawo fo wo fo feti inke yi ma sere. » 27 Piyeeri toxo sefene a da ma i gaa roono a kan noxon ŋa. Piyeeri ga da jaman ɲi taaxunu, 28 a ti i da : « Axa su tuwaaxun wa a yi nan ti a ma daga Yehuudiya gaa roono xabiila tana kan ŋa sakkati i na ɲa fi xa yi de. Xa Alla da a koyi inke yi nan ti in nan maxa sere bexu. 29 Ken ya saabu da, n ga ri ɲumi axa yi. N wa a mulla kuŋa in na in xiri yinmen tu. » 30 Koroneeli ti : « A bita naxatandin yinme ya faayi ke lenki, sallifanan dangi falle, n gaa allanbatini in konpen ŋa, ma in ga nta yugo yogo do yiran ŋaalinto wari sikki in jon ŋa. 31 A ti in da : “ Koroneeli, Alla da an duwanŋun raga, a do an ga da deemande su ɲa misikiinun da, a kiilun wa an kanma. 32 Saasa, sero wara dagana do yugo yogo batten ŋa Yaafo yi, a toxon ya ni Simoona, i gaa tini Piyeeri, a yanqanten ni garanka yugo yogo ya yi, i wa tini ken xa da Simoona, a kan wa geejinxannen ŋa, ti i do mukke ke nan ri. ” 33 Ken sigira su, n da sero wara dagana do an ŋa, an duŋe riyen ŋa. Saasa o su faayi me kanma Alla jon ŋa ; Kamanen ga da fo be ro an raqen ŋa katta o yi, o wa an terinkana. »

34 Piyeeri ga da sefen wutu a ti : « A xura in danŋa lenki nan ti jaxa seren su ni baane ya yi Alla maxa. 35 An ga na ɲa seran xabiila su yi, an ga kanu Alla yi nan teleŋo, Alla na an ya mulla. 36 , ken ga ni xeerikitayen sefen ŋa, Alla da a ko da ti Isa ya sababun ŋa. A ya ni Kamane yi seron su da. 37 Annabi Yahaya wanqinden gangunden falle, fiinu beenu ga jope maran ŋa, ma a gaa kiɲene maran ŋa, axa wa a xala yi. 38 Axa wa a tu Alla ga da Isa sugandi na a barekindi ti Fanka Sennen ŋa moxo be, na senben ro a yi, Isa ga da jamaane ke su wura moxo be yi, a gaa a sirono seron ŋa na jinnagumun su jaara, baawo Alla ya n ɲi do a batten ŋa. 39 A ga da fo wo fo ɲa Yehuudiyanun jamaanen do noxon ŋa, oku seeda a su yi. I da a genge do sallibinsollen ya yi, na a kari. 40 Xa ken bita sikka, Alla da aken yinme ya wundu bakka kallen ŋa, kuudo a na du koyi. 41 A ma du koyi seren su yi de, ganta Alla yinme ga da ku be sugandi na i ɲa seedaano yi ga fe. Alla ga da a wundu bakka furun naxan ŋa, oku ya do a nan yige nan mini doome. 42 Ke su falle, a da sefo ro o raqun ŋa nan ti o na i kiɲandi jaman ŋa, a do na seron seedandi a yi nan ti : Alla da ike ya sugandi kuudo i na furun do ŋalinton kiiti. 43  su da a fin ko nan ti sere su ga saxu a yi, an junuubunun wa xafarini ti a toxon ŋa. »

44 Na Piyeeri toxo sefen ŋa, Fanka Sennen yanqa terinkaanan su kanma. 45 Yehuudiyanu beenu saxunten gaa Isa yi, i ga ri do Piyeeri batten ŋa, i ga da a wari Fanka Sennen ga yanqa xabiilan tanan kanma, ken da i kaawafi. 46 Baawo i taron wa i ya xan tana koono, i gaa Alla tiigana i darontaaxun ŋa. Piyeeri ti i da kuŋa : 47 « Ko n katta ku sero kabana wanqini ? O ga da Fanka Sennen kita moxo be, i xa da a kita kundun ya yi. » 48 A da ɲaamariyen kini i na i wanqi ti Isa Alimasiiwu toxon ŋa. Ken falle, i da a muuru a maxa, a na bito ɲaŋi i maxa non ŋa.