Ɲangollu 11

[Piyeeri xibaarinde Yerusalaamu yi]

do isanwaaxinu beenu taaxunton gaa maran ŋa, i da a mugu nan ti xabiilan tananun saxu Alla digaamen ŋa nan tuubi na a ɲi Yehuudiyanu fe. 2 Piyeeri ga saage katta yi, Yehuudiya tuubinton da a bexu 3 nan ti : « He, an daga sunnantanbalinun kaanun ŋa manne yi, ma an do i nan yige doome ? » 4 I ga da ke ko, fo wo fo ga ɲaŋi gelli joŋaarun ŋa, Piyeeri saage a su yi i da baane ti baane. 5 A ti : « N gaa allanbatini Yaafo yi, Alla da fo yogo koyi in ŋa, a gaa xoyi yiran xoore, a banbante gaa yanqana gilli kanmun ŋa nan ri boyi in kaaran ŋa. 6 N ga toxo a faayini, n yaaxen wa daaba ke danben su yi : kaadufon do gundufo ke danben su, gonxiilan do yeliŋe. 7 Sefexanne yogo xosi ti in da : “ Piyeeri ! Giri ku kari an na i yiga. ” 8 Xa, n xa ti : “ Kamane, abada ! N ma demu fo kabante yigana ; n ma fo sobinte ro in raqen ŋa abada. ” 9 Sefexanne ke saage tini in da : “ Alla ga da ke be senondi, maxa a raga fo sobinte yi. ” 10 Ken ɲaŋi ta sikko ; yiranma ke sege kanmun ŋa. 11 Ken sigira su yi, sero sikki ri nan giri , i ga da i xayi in ŋa, i da o ɲi ka ke yi. 12 Alla Fanka Sennen ti in nan maxa hari sikka in nan daga do i ya. Axa yaaxen gaa ku maarenmu sero tunmi be yi, i ya n daga in tunsi Kesaariye. O ga kiɲe, o daga yanqa yugo ke kan ŋa, a toxon ya ni Koroneeli. 13 Koroneeli ti o da, i da maliikan ya wari i ka ke yi, a ga ti i da : “ Sero wara dagana do Simoona batten ŋa Yaafo yi, i gaa a xilli ‘ Piyeeri ’. 14 A na fiinun koni an da, kun gaa ɲaana sababu yi na an do an koren su kisi. ” 15 N ga da sefen jopa, Fanka Sennen yanqa i kanma xoyi a ga yanqa o kanma moxo ke be yi fiinun joŋaarun ŋa. 16 Ken kuŋa, n ma mungu Kamanen ga da fo be xa ko, a ga ti : “ Yahaya da seron wanqi ti jin ya yi, xa axakun, Alla na axa wanqini ti Fanka Sennen ya yi. ” 17 Alla yinme ya ga da o kuyen me kini i ya, i ga saxu Kamane Isa Alimasiiwu yi, n xa ni ko yi, n ra gaa Alla liŋun fatana ɲaana ? » 18 I ga da ku sefo mugu, i su mulo, i da Alla tiiga nan ti : « Tonŋu, Alla da kille ke kini xabiilan su ya yi, kuudo i ra gaa du rasaagana katta Alla yi, na i jikkunun faraaxu, i na kisi. »

[Hansooxi-siiri isanjama]

19 Sittifana kallen ga ɲa sababu yi na isanwaaxinu beenu sanqi, i yogonu ga daga Finiika, do Kiporo, do , i ma Xibaari Liŋen kiɲandi sere tana su yi ma Yehuudiyanun baane. 20 Na a ɲi ku be ga giri Kiporo do yi, i ga kiɲe Hansooxi-siiri, i da Kamane Isa kiɲandi Gerekinkon ŋa. 21 Tunka Duumanten da i bareken kafi i maxa, seri gabe saxu Kamanen ŋa nan duŋe a da. 22 Isanjama be taaxunte gaa Yerusalaamu, i ga da xibaare ke mugu, i da Barinaabu xayi katta Hansooxi-siiri yi. 23 A ga da a wari Alla ga da ku sero neema moxo be, a sewo moxosiri. A da i buttun tallan xotondi nan ti i nan sukke do Kamanen baane ya yi ti duruxotoye yi. 24 Seri sire ya ni Barinaabu xa yi, a ga toŋondi moxosiri, a ga fogu ti Fanka Sennen ŋa. Ken da jama xoore saxundi Kamanen ŋa.

25 Ken falle, Barinaabu daga Sawulu muuru Taarisi yi. 26 I ga da me wari, a do a daga Hansooxi-siiri yi. I do isanjaman da siine ɲa doome yi, i gaa jama xoore ke xaranŋundini. Nan ti isanxaranlenmon da « Isaganko », a koni ken debe fina ya yi. 27 Ken waxati, yogonu giri Yerusalaamu nan daga Hansooxi-siiri. 28 Baane wa kapa i ya, a toxon ya ni Hagaabu. A xibaarindi ti Fanka Sennen ŋa nan ti : « A nta hari dallana dullu xoore wa roono duna yi. » A ga da a ko moxo be, a ɲa kundun xa ya yi mene. A gemu tunka Koloodi kiyen ya yi. 29 Isanxaranlenmon da a ŋanniya kuŋa beesu senben lanɲara, i na fo kafu me yi na a xayi katta isanwaaxinu be gaa Yehuuda maran ŋa. 30 I da a ɲa ken moxo ya yi, na i kittun kafu me yi, na a kini Barinaabu do Sawulu yi, i nan daga a kini isanjaman xirisu beenu gaa Yehuuda maran ŋa.